قازاقستان ءبىلىم بەرۋ سالاسىندا جاساندى ينتەللەكتىنى جۇيەلى ەنگىزۋ جولىندا جاڭا كەزەڭگە قادام باستى. ەل OpenAI-دىڭ Edu for Countries باعدارلاماسىنىڭ العاشقى حالىقارالىق كوگورتاسىنا قوسىلىپ, ۇستازدىڭ ءرولىن كۇشەيتۋگە جانە ادام كاپيتالىنىڭ ساپاسىن ارتتىرۋعا باعىتتالعان ستراتەگيالىق باستامانى ىسكە اسىرا باستادى, دەپ حابارلايدى Egemen.kz.
عىلىم جانە جوعارى ءبىلىم ءمينيسترى ساياسات نۇربەكتىڭ ايتۋىنشا, قازاقستان بۇل باستاماعا ەستونيا, سينگاپۋر, ءباا, يوردانيا جانە گرەكيامەن قاتار قوسىلدى.
«قازاقستان ورتالىق ازيادا العاش بولىپ جاساندى ينتەللەكتىنى جۇيەلى ەنگىزۋگە كوشكەن ەل», دەدى ول.
مينيستر جاساندى ينتەللەكت ۇستازداردىڭ ورنىن الماستىرا المايتىنىن, الايدا ونىڭ ءرولىن كۇشەيتەتىنىن اتاپ ءوتتى.
«الەمدە «جاساندى ينتەللەكت ۇستازداردى الماستىرا ما؟» دەگەن سۇراق ءجيى قويىلادى. ءبىزدىڭ جاۋابىمىز تۇبەگەيلى وزگەشە: جاساندى ينتەللەكت ۇستازدى الماستىرمايدى, كەرىسىنشە ونىڭ ءرولىن كۇشەيتەدى. ول كۇندەلىكتى رۋتينانى ازايتىپ, اكىمشىلىك جانە ادىستەمەلىك جۇكتەمەنى جەڭىلدەتەدى, ەڭ باستىسى - مۇعالىمگە ستۋدەنتپەن تىكەلەي جۇمىس ىستەۋگە, ويلاۋدى دامىتۋعا ۋاقىتىن كوبىرەك بولۋگە سەپتىگىن تيگىزەدى.
ChatGPT Edu ءبىز ءۇشىن جاي عانا تسيفرلىق ءونىم ەمەس, ينفراقۇرىلىمدىق قۇرال. ول وقۋ ماتەريالدارىن ازىرلەۋگە, كونتەنتتى ءبىلىم الۋشىلاردىڭ دەڭگەيىنە بەيىمدەۋگە, كەرى بايلانىستى جاقسارتۋعا, زەرتتەۋ جۇمىسىن جەدەلدەتۋگە كومەكتەسەدى. بىراق پەداگوگيكالىق, ەتيكالىق جانە باعالاۋ شەشىمدەرىنىڭ بارلىعى ادام قۇزىرىندا قالادى. بۇل - ءبىزدىڭ باستى ۇستانىمىمىز», دەدى ول.
بۇل جوبانىڭ جۇزەگە اسۋ فورماتى ماڭىزدى. سەبەبى, ول مەملەكەت باسشىسىنىڭ اقش-قا ساپارى بارىسىندا قول جەتكىزىلگەن كەلىسىمدەرگە نەگىزدەلگەن جانە مەملەكەتتىك بيۋدجەتكە سالماق سالماي, جەكە قاراجات ەسەبىنەن قارجىلاندىرىلادى. بۇل - بيزنەس پەن مەملەكەتتىڭ ادام كاپيتالىنىڭ بولاشاعىنا بىرلەسىپ ينۆەستيتسيا سالۋىنىڭ ناقتى ۇلگىسى.
استانادا مەكتەپ وقۋشىلارىنىڭ قاۋىپسىزدىگىن جاساندى ينتەللەكت باقىلايدى
ءبىلىم بەرۋدىڭ بارلىق دەڭگەيىندەگى پەداگوگتار, ۋنيۆەرسيتەتتەر جانە Astana hub ەكوجۇيەسى ءۇشىن ۇسىنىلعان 165 مىڭ تەگىن ليتسەنزيا جاي سان نەمەسە ستاتيستيكا ەمەس, بۇل - اۋقىم جانە وزگەرىستەردىڭ نەگىزگى قوزعاۋشىسى رەتىندە ۇستازدارعا دەگەن سەنىم.
«مەن ءۇشىن ەڭ ماڭىزدىسى - ءبىز جاساندى ينتەللەكتىنى قولدانۋشىلاردى عانا ەمەس, ويلايتىن, ويلانا الاتىن ۇرپاقتى تاربيەلەۋدى ماقسات ەتىپ وتىرعانىمىز. بولاشاقتىڭ ءبىلىمى - ادام الەۋەتىن كەڭەيتۋ. سىني ويلاۋ, جاۋاپكەرشىلىك, تەحنولوگيامەن جۇمىس ىستەۋ مادەنيەتى, وسىنىڭ بارلىعى ەلدىڭ باسەكەگە قابىلەتتىلىگىن ايقىندايتىن نەگىزگى داعدىلار.
قازاقستان جەدەل ناتيجە ەمەس, ۇزاق مەرزىمدى تراەكتوريانى تاڭداپ وتىر. بۇگىن ءبىز ءبىلىم بەرۋ جۇيەمىزدىڭ بىرەۋگە ەلىكتەۋشى ەمەس, بولاشاقتى قالىپتاستىرۋشى بولۋىنا تاعى ءبىر ناقتى قادام جاسادىق», دەيدى ول.
ءبىلىم سالاسىنا جاساندى ينتەللەكت ەنگىزۋ جونىندەگى جۇمىس توبى قۇرىلدى