شۆەيتساريانىڭ داۆوس قالاسىنا بەت العان اقش پرەزيدەنتى دونالد ترامپ مىنگەن Air Force One ۇشاعى كەنەت باعىتىن وزگەرتىپ, مەريلەند شتاتىنداعى بازاعا كەرى ورالدى, دەپ حابارلايدى Egemen.kz Daily Mail-گە سىلتەمە جاساپ.
Daily Mail باسىلىمىنىڭ مالىمەتىنشە, اقش باسشىسى دۇنيەجۇزىلىك ەكونوميكالىق فورۋمعا قاتىسۋ ءۇشىن داۆوسقا ۇشىپ بارا جاتقان ساتتە پرەزيدەنت ۇشاعى كۇرت كەرى بۇرىلىپ, مەريلەند شتاتىنداعى ەندريۋس بىرىككەن اۋە بازاسىنا قونعان. بۇعان «ەلەكتر سىمدارىنداعى اقاۋ» سەبەپ بولعانى ايتىلدى.
ۇشاق بورتىندا ترامپ اكىمشىلىگىنىڭ مۇشەلەرى بولعان. ولاردىڭ قاتارىندا مەملەكەتتىك حاتشى ماركو رۋبيو, اكىمشىلىك باسشىسى سيۋزي ۋايلز, كەڭەسشى ستيۆەن ميللەر, ليۆيتت, كوممۋنيكاتسيالار جونىندەگى ديرەكتور ستيۆەن چانگ جانە پروتوكول قىزمەتىنىڭ جەتەكشىسى مونيكا كروۋلي بار.
ترامپ قاسىم-جومارت توقاەۆتى گازا بويىنشا بەيبىتشىلىك كەڭەسىنىڭ مۇشەسى بولۋعا شاقىردى
ۇشاقتىڭ تسيۋريح قالاسىنا قونۋى كۇتىلەدى, ودان كەيىن ترامپ تىكۇشاقپەن داۆوسقا اتتانادى. بۇل قالادا جىل سايىن كوپتەگەن ميللياردەرلەر جينالاتىن دۇنيەجۇزىلىك ەكونوميكالىق فورۋم وتەدى.
ۇشار الدىندا ترامپ Truth Social الەۋمەتتىك جەلىسىندە «امەريكا داۆوستا لايىقتى تۇردە ۇسىنىلادى. قۇداي بارشاڭىزدى جارىلقاسىن!» دەپ جازعان ەدى.
ترامپ بۇعان دەيىن دە Air Force One ۇشاعىنىڭ كولەمى مەن زاماناۋيلىعىنا قاتىستى نارازىلىق بىلدىرگەن بولاتىن.