جاساندى ينتەللەكت جانە تسيفرلىق دامۋ مينيسترلىگى مەن «ترانستەلەكوم» اق (تتس) قازاقستان اۆتوجولدارىنىڭ بويىندا تۇراقتى ءموبيلدى ينتەرنەت پەن بايلانىستى قامتاماسىز ەتەتىن تەلەكوممۋنيكاتسيالىق ينفراقۇرىلىم سالۋ تۋرالى كەلىسىمگە قول قويدى, دەپ جازادى Egemen.kz.
جوبا «قولجەتىمدى ينتەرنەت» ۇلتتىق جوباسى اياسىندا جۇزەگە اسىرىلادى. جوبانى ىسكە اسىرۋ ناتيجەسىندە جۇرگىزۋشىلەر مەن جولاۋشىلار جول بويىندا ينتەرنەتتى ناۆيگاتسيا ءۇشىن, شۇعىل قوڭىراۋلار جاساۋعا, سونداي-اق مەملەكەتتىك جانە بانك سەرۆيستەرىن پايدالانا الادى.
جاساندى ينتەللەكت جانە تسيفرلىق دامۋ مينيسترلىگىنىڭ مالىمەتىنشە, جوبا كەزەڭ-كەزەڭىمەن ىسكە اسىرىلادى. رەسپۋبليكالىق ماڭىزى بار اۆتوموبيل جولدارىن ءموبيلدى بايلانىسپەن قامتاماسىز ەتۋ جۇمىستارى 2026 جىلدىڭ سوڭىنا دەيىن, ال وبلىستىق ماڭىزى بار جولداردا 2027 جىلدىڭ سوڭىنا دەيىن اياقتالادى. كەلىسىم اياسىندا «ترانستەلەكوم» اق جوبانى مەملەكەتتىك قارجىلاندىرۋسىز, ءوز قاراجاتى ەسەبىنەن جۇزەگە اسىرادى.
ەلدەگى پويىزداردا ينتەرنەت جۇيەسى ىسكە قوسىلدى
«جوسپارعا سايكەس, جوبا ەكى كەزەڭدە جالپى ۇزىندىعى 40 مىڭ شاقىرىمنان استام اۆتوموبيل جولىن قامتيدى. جول بويىنداعى تۇراقتى بايلانىستىڭ بولۋى جول قوزعالىسى قاۋىپسىزدىگىن ارتتىرىپ, جەدەل قىزمەتتەردىڭ ارەكەت ەتۋ جىلدامدىعىن جاقسارتادى. سونداي-اق كولىك اعىنىن ينتەللەكتۋالدى باسقارۋ جۇيەلەرى مەن جول جاعدايىن مونيتورينگتەۋ تەحنولوگيالارىن ەنگىزۋگە مۇمكىندىك بەرەدى. جوبا اياسىندا 500-دەن استام انتەننا-ماچتالىق قۇرىلىستار مەن ءموبيلدى بايلانىس بازالىق ستانتسيالارى سالىنادى. بۇل ەلدىڭ نەگىزگى كولىك باعىتتارىندا بايلانىستىڭ قامتۋ اۋماعىن كەڭەيتىپ, قىزمەت ساپاسىن ەداۋىر جاقسارتادى», دەلىنگەن مينيسترلىك حابارلاماسىندا.
پويىزدار مەن ۇشاقتاردا Starlink دەڭگەيىندەگى ينتەرنەت پايدا بولادى
بايلانىستىڭ قولجەتىمدىلىگىن ارتتىرۋ ماقساتىندا «ترانستەلەكوم» اق سالعان ينفراقۇرىلىمدى باسقا ۇيالى بايلانىس وپەراتورلارىنىڭ پايدالانۋىنا دا مۇمكىندىك بەرىلەدى.
Starlink جەلىسىنە 7 ميلليوننان استام ادام قوسىلدى