قىزىلوردادا V ۇلتتىق قۇرىلتاي اياسىندا «الەۋمەتتىك-مادەني دامۋ» سەكتسياسىنىڭ وتىرىسى ءوتتى. وتىرىس جۇمىسىنا پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا توراعالىق ەتتى. تالقىلاۋعا پارلامەنت دەپۋتاتتارى, شىعارماشىلىق زيالى قاۋىم وكىلدەرى جانە قوعام قايراتكەرلەرى قاتىستى, دەپ جازادى Egemen.kz.
جيىندى اشقان ايدا بالاەۆا ۇلتتىق قۇرىلتايدىڭ قوعام ءۇشىن ماڭىزى زور, تۇراقتى ءارى جۇيەلى ديالوگ الاڭىنا اينالعانىن اتاپ ءوتىپ, وندا ەل دامۋىنىڭ ۇزاقمەرزىمدى باعىت-باعدارى ايقىندالىپ, وزەكتى الەۋمەتتىك ماسەلەلەر كەڭىنەن تالقىلاناتىنىن جەتكىزدى.
«ۇلتتىق قۇرىلتاي اياسىندا ايتىلعان بارلىق ۇسىنىس پەن پىكىر مەملەكەت باسشىسى مەن مەملەكەتتىك ورگانداردىڭ ەرەكشە باقىلاۋىندا. مادەنيەت جانە اقپارات مينيسترلىگى قۇرىلتاي مۇشەلەرى ۇسىنعان باستامالاردى ىسكە اسىرۋ جوسپارىنىڭ ورىندالۋىنا تۇراقتى تۇردە مونيتورينگ جۇرگىزىپ كەلەدى. الدىڭعى ءتورت وتىرىستا اسا ماڭىزدى ماسەلەلەر كوتەرىلىپ, اۋقىمدى جۇمىس اتقارىلدى. اتاپ ايتقاندا, زاڭنامانى جەتىلدىرۋ ماقساتىندا 26 زاڭ قابىلداندى. سونىمەن قاتار 10 زاڭ جوباسىنا, سونداي-اق پرەزيدەنت جارلىقتارى مەن كەشەندى دامۋ جوسپارلارىنا وزگەرىستەر ەنگىزۋ بويىنشا جۇمىستار جۇرگىزىلىپ جاتىر», دەدى پرەمەر-ءمينيستردىڭ ورىنباسارى.
سەكتسيا وتىرىسىنا قاتىسۋشىلار ءوز ۇسىنىستارى مەن باستامالارىن ورتاعا سالدى. تالقىلاۋدىڭ نەگىزگى وزەگىن مادەنيەتتى دامىتۋ, كرەاتيۆتى يندۋستريالاردى دامىتۋ, الەۋمەتتىك سالانى جاقسارتۋ جانە وتباسى قۇندىلىقتارىن نىعايتۋ ماسەلەلەرى قۇرادى.
جۇمىس توبى جاڭا پارلامەنتكە قاتىستى ماسەلەلەردىڭ بارلىق قىرىن قاراستىردى
سونداي-اق بالالار كونتەنتىن دامىتۋ جانە انيماتسيا يندۋسترياسىن وركەندەتۋ تاقىرىبى كوتەرىلدى. وسىعان بايلانىستى ايدا بالاەۆا مۋلتفيلم وندىرىسىنە ارنايى توقتالىپ, بۇل باعىتتىڭ ماڭىزدىلىعىن ەرەكشە اتاپ ءوتتى.
«پرەزيدەنت جولداۋىندا بەرىلگەن تاپسىرماعا سايكەس, مينيسترلىك جانىنان كرەاتيۆتى يندۋستريالاردى قولداۋ قورى قۇرىلدى. قازىرگى ۋاقىتتا ونىڭ ماتەريالدىق-تەحنيكالىق بازاسى قالىپتاستىرىلىپ جاتىر, ءارى قور قۇرىلىمىندا انيماتسياعا ارنالعان جەكە باعىت قاراستىرىلادى. مەنىڭ ويىمشا, مۇندا ساننان بۇرىن ساپاعا ءمان بەرۋ ماڭىزدى. كونتەنتتىڭ بالا پسيحولوگياسىنا ىقپالىن, جاس ەرەكشەلىكتەرىن جانە تاربيەلىك اسەرىن مىندەتتى تۇردە ەسكەرۋ قاجەت. قوردىڭ تولىققاندى جۇمىسى باستالعاننان كەيىن انيماتسيا يندۋسترياسى تىڭ سەرپىن الىپ, قارقىندى دامي تۇسەدى دەپ سەنەمىن», دەپ اتاپ ءوتتى مادەنيەت جانە اقپارات ءمينيسترى.
باسقا دا ماسەلەلەردى تالقىلاۋ بارىسىندا قاتىسۋشىلار مەن ساراپشىلار ۇلتتىق ءداستۇردى ساقتاۋ جانە «كىتاپ وقيتىن ۇلت» قالىپتاستىرۋ – قازاقستان قوعامىن جاڭعىرتۋدىڭ ماڭىزدى قۇرامداس بولىگى ەكەنىن باسا ايتتى. وسىعان وراي ايدا بالاەۆا اۋدارۋعا جانە باسىپ شىعارۋعا ۇسىنىلاتىن كىتاپتار تىزبەسىن ايقىندايتىن ارنايى كوميسسيا قۇرۋدى ۇسىندى. سونىمەن بىرگە زاماناۋي جاس اۆتورلاردىڭ شىعارمالارىن ەل كىتاپحانالارىنىڭ قورىنا جۇيەلى تۇردە ەنگىزۋ قاجەتتىگىنە نازار اۋداردى.
توقاەۆ: كونستيتۋتسيالىق رەفورمانىڭ تالقىلانا باستالعانىنا جارتى جىل بولىپ قالدى
بۇگىن قىزىلوردادا ء«بىلىم جانە عىلىم», «ازاماتتىق قوعام» جانە «ەكونوميكالىق دامۋ» باعىتتارى بويىنشا تاعى ءۇش سەكتسيادا تالقىلاۋلار ءوتىپ جاتىر. ەكى كۇن بويى مەملەكەتتىك ساياساتتىڭ وزەكتى ماسەلەلەرى تالقىلاناتىن بولادى.
توقاەۆ: كونستيتۋتسيانىڭ بىردەن بىرنەشە ءبولىمىن قايتا قاراۋ قاجەت بولادى
ال ەرتەڭ, ياعني 20 قاڭتاردا, مەملەكەت باسشىسىنىڭ قاتىسۋىمەن V ۇلتتىق قۇرىلتايدىڭ پلەنارلىق وتىرىسى وتەدى. ءىس-شاراعا قازاقستاننىڭ بارلىق وڭىرىنەن دەلەگات رەتىندە كەلگەن ۇلتتىق قۇرىلتايدىڭ 110 مۇشەسى قاتىسادى.