بىشكەك قالاسىندا ورتالىق ازياداعى ەڭ ءىرى سپورتتىق نىسان, FIFA ستاندارتتارىنا ساي حالىقارالىق دەڭگەيدەگى ستاديوننىڭ قۇرىلىسى جالعاسۋدا. 51 مىڭ كورەرمەنگە ارنالعان جاڭا كەشەن قىرعىزستاننىڭ سپورت ينفراقۇرىلىمىنداعى ماڭدايالدى جوباعا اينالدى, دەپ جازادى Egemen.kz.
ستاديون قۇرىلىسى تۋرالى العاش رەت 2024 جىلدىڭ ءساۋىر ايىندا بەلگىلى بولدى. جوبا ەل استاناسىنىڭ شەت ايماعىندا ورنالاسقان وروك اۋىلىندا جۇزەگە اسىرىلىپ جاتىر. العاشقى كۇننەن-اق نىساننىڭ ساۋلەتتىك كەلبەتى كوپشىلىكتىڭ نازارىن اۋداردى. ارحيتەكتۋرالىق تۇجىرىمدامانىڭ نەگىزىنە قىرعىزدىڭ ۇلتتىق كيىز ءۇيىنىڭ بەينەسى الىنعان.
قازاقستانداعى ەڭ ۇلكەن ستاديون قاشان اشىلادى؟
ديامەترى 280 مەتر, بيىكتىگى 70 مەتر بولاتىن سەگىز قاباتتى عيمارات ازيا فۋتبول كونفەدەراتسياسىنىڭ جاڭارتىلعان تالاپتارىنا ساي سالىنىپ جاتىر. باستاپقىدا ستاديون 45 مىڭ ورىنعا ەسەپتەلگەنىمەن, كەيىن سىيىمدىلىعى 51 مىڭعا دەيىن ۇلعايتىلدى. مۇنداي اۋقىم ازيا كۋبوگىنىڭ اشىلۋ سالتاناتىن, سونداي-اق ءتۋرنيردىڭ العاشقى جانە فينالدىق ماتچتارىن وتكىزۋگە مۇمكىندىك بەرەدى.
نىساننىڭ تەحنيكالىق كورسەتكىشتەرى دە تاڭداي قاقتىرادى: كوگالداندىرۋ اۋماعى − 70 مىڭ شارشى مەتر, قۇرىلىس الاڭى − 180 مىڭ شارشى مەتر, ستاديوننىڭ ءوز اۋماعى − 85 مىڭ شارشى مەتر. جوبا اياسىندا 3 600 اۆتوكولىككە ارنالعان جابىق اۆتوتۇراق پەن 60 مىڭ شارشى مەتر تەحنيكالىق بولمەلەر قاراستىرىلعان.
قىزىلورداداعى 21 ملرد تەڭگەگە سالىنعان ستاديون ۋەفا تەكسەرىسىنەن قاشان وتەدى؟
قۇرىلىسشىلار جارىقتاندىرۋ مەن الاڭ جابىنىنا ەرەكشە كوڭىل بولمەك. فۋتبول الاڭى FIFA بويىنشا ا ساناتىنداعى LED-جارىق جۇيەسىمەن جابدىقتالادى. ال حالىقارالىق ۇيىمدار اياسىنداعى ويىندار ءۇشىن گيبريدتى گازون تەحنولوگياسى قولدانىلادى.
ستاديون بىشكەكتەگى كوپفۋنكتسيونالدى سپورتتىق حابتىڭ ءبىر بولىگىنە اينالادى. ونىڭ اۋماعىندا 35 مىڭ شارشى مەتر جەردە ساۋدا ورتالىقتارى مەن سپورت دۇكەندەرى بوي كوتەرمەك.
جوباعا حالىقارالىق ماماندار تارتىلعان. نەگىزىنەن تۇركيادان كەلگەن ارحيتەكتورلار, ينجەنەرلەر مەن كونسترۋكتورلار ەڭبەك ەتۋدە. سونىمەن قاتار قۇرىلىس بارىسىنا تۇركيا مەن ۇلىبريتانيادان كەلگەن ساراپشىلار كەڭەس بەرىپ وتىر. ەل باسشىلىعىنىڭ ايتۋىنشا, جوبانىڭ قارجىلاندىرۋ ماسەلەسى سمەتا بەكىتىلگەن كەزەڭدە-اق تولىق شەشىلگەن. ناقتى قۇنى رەسمي جاريالانباعانىمەن, بۇعان دەيىن باق-تا جوبانىڭ 60 ميلليون اقش دوللارى شاماسىندا ەكەنى ءمالىم بولدى.
قازىرگى تاڭدا بىشكەك ارەنا حالىقارالىق ستاديونىندا ءمونوليتتى جۇمىستار تولىق اياقتالعان. ستاديون 80 پايىزعا دايىن. ۇكىمەت وكىلدەرىنىڭ مالىمەتىنشە, تريبۋنالار مەن بارلىق فۋنكتسيونالدى ايماقتاردا مۇمكىندىگى شەكتەۋلى جاندارعا ارنالعان ارنايى ورىندار مەن قولايلى جاعدايلار قاراستىرىلادى.
25 مىڭ ورىندىق ستاديوننىڭ قۇرىلىسى باستالدى
ستاديوننىڭ رەسمي اشىلۋى 2026 جىلدىڭ تامىز ايىنا, قىرعىزستاننىڭ تاۋەلسىزدىك كۇنىنە جوسپارلانعان.