قازۇۋ-دا ۇشقىشسىز اۆياتسيا ورتالىعى اشىلدى

«Aerial Solutions» جشس اراسىنداعى ءوزارا ىنتىماقتاستىق اياسىندا اشىلعان عىلىمي-يننوۆاتسيالىق ورتالىقتا وتاندىق ۇشقىشسىز ۇشۋ اپپاراتتارىنىڭ مودەلدەرىن ازىرلەۋ, وقۋ-وندىرىستىك زەرتحانالار مەن سىناق پوليگونىن قۇرۋ, سونداي-اق دۋالدى ءبىلىم بەرۋ جانە سەرتيفيكاتتاۋ باعدارلامالارىن جۇزەگە اسىرۋ جوسپارلانىپ وتىر.

ورتالىقتىڭ اشىلۋىنا قازۇۋ باسقارما توراعاسى-رەكتور جانسەيىت تۇيمەباەۆ, «Aerial Solutions» جشس اۆياتسيالىق وقۋ ورتالىعىنىڭ باس ديرەكتورى پەريزات قۇدايبەرگەنوۆا, قورعانىس مينيسترلىگىنىڭ ۇشقىشسىز ۇشۋ جۇيەلەرىن دامىتۋ جانە قولدانۋ دەپارتامەنتىنىڭ باسشىسى يسا تەيمۋراز ۇلى, قورعانىس مينيسترلىگى اۋە قورعانىسى كۇشتەرى اسكەري-اۋە كۇشتەرى قولباسشىلىعىنىڭ باس ورتالىعىنىڭ باسشىسى ساكەن رۇستەموۆ, ۇلتتىق قاۋىپسىزدىك اكادەمياسىنىڭ كافەدرا مەڭگەرۋشىسى ارتۋر يماشەۆ, قازاقستان اۆياتسيا اكىمشىلىگىنىڭ ليتسەنزيالاۋ دەپارتامەنتىنىڭ ديرەكتورى ءادىلجان سۇلتانوۆ, بەلىگىلى عالىمدار, وقىتۋشى-پروفەسسورلىق قۇرام قاتىستى.

جيىندى قازۇۋ باسشىسى جانسەيىت تۇيمەباەۆ اشىپ, ورتالىقتىڭ ىسكە قوسىلۋى قازاقستاننىڭ تەحنولوگيالىق دامۋى ءۇشىن ەرەكشە ماڭىزى بار ەكەنىن اتاپ ءوتتى.

قازاقستاندا ۇشقىشسىز اۆياتسيا ەكوجۇيەسىن دامىتۋدىڭ كەلەشەگى قانداي؟

− مەملەكەت باسشىسى قاسىم-جومارت توقاەۆ جاساندى ينتەللەكتىنى دامىتۋ جونىندەگى كەڭەستىڭ العاشقى وتىرىسىندا ء«بىزدىڭ ۇلت رەتىندە باسەكەگە قابىلەتتىلىگىمىز بەن ەگەمەندىگىمىز وسى تەحنولوگيانى قالاي پايدالاناتىنىمىزعا تىكەلەي بايلانىستى. ءار مامان تسيفرلىق داعدىلاردى جەتىك مەڭگەرىپ, جاساندى ينتەللەكتىنىڭ مۇمكىندىكتەرىن جۇمىس بارىسىندا ءتيىمدى قولدانا ءبىلۋى قاجەت» دەپ اتاپ وتكەن بولاتىن. سونداي-اق ءۇش جىل ىشىندە ەلىمىزدى تولىق تسيفرلاندىرۋعا بايلانىستى ستراتەگيالىق ماقسات قويدى. وسى مىندەتتى جۇزەگە اسىرۋدا عىلىمي قاۋىمداستىق پەن بىرلەستىكتەرگە زور جاۋاپكەرشىلىك جۇكتەلدى. قازۇۋ-دا ۇشقىشسىز اۆياتسيانى دامىتۋ يننوۆاتسيالىق ورتالىعى اشىلۋى اۋقىمدى عىلىمي جوبالاردى ىسكە اسىرۋعا, زاماناۋي درونداردى جاساپ, قۇراستىرۋعا, بىلىكتى مامانداردى دايارلاۋعا جانە ستۋدەنتتەردىڭ تاعىلىمدامادان وتۋىنە مۇمكىندىك بەرەدى. مۇندا جاسالعان دروندار ەكونوميكانىڭ ءتۇرلى سالاسىندا ءتيىمدى قولدانىلاتىن بولادى. بىرلەسكەن ورتالىق ءوندىرىس پەن ۋنيۆەرسيتەت اراسىنداعى ماڭىزدى سەرىكتەستىكتىڭ ناقتى ناتيجەسىن كورسەتەدى. جوبانىڭ ىسكە اسۋى ەلىمىزدەگى تسيفرلىق ينفراقۇرىلىمنىڭ دامۋىنا, ازاماتتىق ۇشقىشسىز اۆياتسيا سالاسىنداعى مەملەكەتتىك ستراتەگيانى جۇزەگە اسىرۋعا ەلەۋلى سەرپىن بەرەدى, – دەدى رەكتور.

 «Aerial Solutions» جشس اۆياتسيالىق وقۋ ورتالىعىنىڭ باس ديرەكتورى پەريزات قۇدايبەرگەنوۆا قازۇۋ بازاسىندا اشىلعان ۇشقىشسىز اۆياتسيانى دامىتۋ يننوۆاتسيالىق ورتالىعى عىلىمدى, ءبىلىم بەرۋدى جانە زاماناۋي ۇشقىشسىز تەحنولوگيالاردى بىرىكتىرىپ, حالىقارالىق ستاندارتتارعا سايكەس ماماندار دايارلاۋعا مۇمكىندىك بەرەتىنىن اتاپ ءوتتى. ايتۋىنشا, ۋنيۆەرسيتەتتەگى اكادەميالىق بازا ساپالى تاجىريبەلىك ءبىلىمدى قامتاماسىز ەتىپ, ونەركاسىپ, اۋىل شارۋاشىلىعى جانە تسيفرلىق مونيتورينگ سالالارىنىڭ دامۋىنا ىقپال ەتپەك. ورتالىق جاس ماماندارعا اشىلعان جاڭا مۇمكىندىك, ەلىمىزدەگى اۆياتسيالىق جوبالاردى الەمدىك دەڭگەيگە شىعارۋعا ىقپال ەتەتىن بولادى.

قورعانىس مينيسترلىگىنىڭ اۋە قورعانىس كۇشتەرى باس باسقارماسىنىڭ جەتەكشىسى ساكەن رۇستەموۆ ۇلتتىق ۋنيۆەرسيتەتپەن بۇل سالاداعى ىنتىماقتاستىقتىڭ ماڭىزدىلىعىنا توقتالىپ, ەلىمىزدەگى اۋە قوزعالىسى سالاسىنىڭ دامۋىنا ەلەۋلى ۇلەس قوساتىن يننوۆاتسيالىق جوبالاردىڭ دامۋى ۇشقىشسىز اۆياتسيا سالاسىنىڭ جاڭا دەڭگەيگە كوتەرىلۋىنە وڭ ىقپال ەتەتىندىگىن اتاپ ءوتتى.

 «Aerial Solutions» كومپانياسى  اۆياتسيالىق وقۋ ورتالىعىنىڭ باسشىسى ماۋلەن مۇستافاەۆ مۇندا زاماناۋي كادرلار دايارلاناتىنىن اتاپ ءوتتى. ايتۋىنشا, ورتالىق بازاسىندا ازاماتتىق جانە مەملەكەتتىك اۆياتسيا سالاسىنا ماماندار دايارلاۋدا قىسقا كۋرستار وتەدى. ونىڭ بارىسىندا ينجەنەرلەر, قۇراستىرۋشىلار بىلىكتىلىگىن ارتتىرىپ,  عىلىمي-زەرتتەۋ جانە تاجىريبەلىك-كونسترۋكتورلىق جۇمىستارعا قاتىسادى. مۇنىمەن قوسا قازۇۋ-مەن بىرلەسە وتىرىپ, بيىل جاڭا وقۋ جىلىنان باستاپ جوعارى ءبىلىمدى كادرلار دايارلانباق.. باكالاۆردا وقيتىن ماماندار ۇشقىشسىز تەحنولوگيالاردى قۇراستىرۋ, باسقارۋ باعىتىندا ءبىلىم الادى. ورتالىقتىڭ اشىلۋى اسكەردە بورىشىن وتەپ جۇرگەن ساربازدار ءۇشىن ۇلكەن مۇمكىندىك. ولار وتان الدىنداعى بورىشىن 1 جىل وتەگەننەن كەيىن 2 جىل جاڭا وقۋ جىلىنان باستاپ وسى باعىتتا ءبىلىم الادى. وسى ورايدا «سارباز+» جوباسى اياسىندا ىنتىماقتاستىق كوزدەلىپ وتىر. يننوۆاتسيالىق  ورتالىقتا دروندار مەن سەرۆيستەردى ىشكى جانە حالىقارالىق نارىققا شىعارۋ, يننوۆاتسيالىق ستارتاپتاردى قولداۋ, كوممەرتسيالاندىرۋ ىسكە اساتىن بولادى.

بۇگىندە قازۇۋ اۋماعىندا 2 مىڭ شارشى مەتر اۋماقتا درون قۇراستىرۋ ءوندىرىسى ورنالاسقان. از ۋاقىتتا بىلىكتى ينجەنەرلەر ەلىمىزدەگى درون ءوندىرىسىن قولعا الىپ, قورعانىس سالاسى, اۋىل شارۋاشىلىعىنا ارنالعان ۇشقىشسىز ۇشۋ اپپاراتتارىن قۇراستىراتىن بولادى.

 كوللەدجدە «ۇشقىشسىز ۇشۋ اپپاراتتارى» قۇزىرەتتىلىك ورتالىعى اشىلدى

الماتى