جەرگىلىكتى جەرلەردە كاسىپكەرلىككە دەن قويىپ, بەلگىلى ءبىر ىسپەن تىڭعىلىقتى شۇعىلدانىپ جۇرگەن ادامدارعا مەملەكەت تاراپىنان كورسەتىلىپ جاتقان قولداۋ كوپ. سونىڭ ىشىندە «اۋىل اماناتى» باعدارلاماسىن اۋىز تولتىرىپ ايتۋعا بولادى.
وسى باعدارلامانىڭ ارقاسىندا شارۋاسىن شالقىتىپ وتىرعان ازاماتتار از ەمەس وڭىردە. جالپى, بيىل شىعىس قازاقستان وبلىسىندا «اۋىل اماناتى» ارقىلى 115 جوبا رەسىمدەلىپ, وعان قازىنادان 1,5 ملرد تەڭگە قارجى بولىنگەن.
«قازىر ەل بۇرىنعىداي ەمەس, جۇمىس جوق دەپ قول قۋسىرىپ وتىرمايدى. تۇكپىردەگى اۋىل ازاماتتارى دا كاسىپتىڭ كوزىن ىزدەپ, ناپاقا تابۋدى جان-جاقتى ويلاستىرۋعا تىرىسادى. ءبىرى ءتۋريزمدى تۇلەتكىسى كەلسە, ەندى ءبىرى مال ءوسىرۋدى قولعا الىپ, ەت, ءسۇت ونىمدەرىن شىعارىپ جاتىر. قوناقۇي اشىپ جاتقاندار دا بار. بۇل ورايدا ءبىزدىڭ پارتيا تاراپىنان كورسەتىلىپ جاتقان قولداۋ قوماقتى», دەيدى «Amanat» پارتياسى شقو فيليالى ءباسپاسوز قىزمەتىنىڭ جەتەكشىسى تاتتىمبەت اسحان ۇلى.
«اۋىل اماناتى» باعدارلاماسى شىنىندا دا اۋىل كاسىپكەرلەرىنە جاڭا مۇمكىندىكتەر اشىپ وتىر. قارجىلاي كورسەتىلگەن قولداۋ كاسىبىن ەندى باستاعان ازاماتتارعا وتە ىڭعايلى. قاجەتتى قۇجاتتاردى جيناستىرىپ, بەلگىلى ەرەجەلەرگە ساي بولسا بولعانى. گلۋبوكوە اۋدانى بەلوۋسوۆكا كەنتىنىڭ تۇرعىنى وسى باعدارلامانىڭ ارقاسىندا ارمانىن شىندىققا اينالدىرىپتى. ەرتەدە ول ەت ونىمدەرىن تۇرلەندىرىپ, ساتۋدى ويلاستىرعان. جوباسى ويدا جۇرگەنىمەن, جۇزەگە اسۋ-اسپاۋى ەكىتالاي ەدى. الايدا باعدارلاماعا قاتىسقان كاسىپكەر امانتاي تانكاەۆ بۇگىندە ءىسىن دوڭگەلەتىپ, جەرگىلىكتى نارىقتا جوعارى سۇرانىسقا يە ءونىم شىعارىپ وتىر. ول وتباسىلىق شارۋاشىلىعىن دامىتۋعا, ەت ونىمدەرىن قايتا وڭدەۋ ءىسىن جولعا قويۋعا نيەتتەنىپ, «Amanat» پارتياسىنىڭ اۋداندىق فيليالىنا, سونداي-اق اۋداندىق كاسىپكەرلىك جانە اۋىل شارۋاشىلىعى بولىمىنە جۇگىنگەن ەكەن. قولداۋ تاپقان جوبا جەڭىلدەتىلگەن نەسيە ارقىلى قارجىلاندىرىلىپ, كاسىپكەر زاماناۋي قۇرال-جاب- دىق ساتىپ الۋعا مۇمكىندىك الدى.
بۇگىندە ول جۇبايىمەن بىرگە قاقتالعان, ۆاكۋمدالعان قازى, جايا, شۇجىق تۇرلەرىن ءوندىرۋدى جولعا قويدى.
«اۋىل اماناتى» باعدارلاماسى بولماسا, مۇنداي جوبانى ىسكە اسىرۋ الدەقايدا قيىنعا تۇسەر ەدى. قازىر ءوندىرىستى كەڭەيتۋ جوسپارىن قولعا الىپ جاتىرمىز. جۇرتشىلىق ءبىزدىڭ ءونىم ءوز شارۋاشىلىعىمىزدان شىققان تابيعي ءارى تازا تاعام ەكەندىگىن بىلەدى. سوندىقتان سۇرانىس كۇن ساناپ ارتىپ كەلەدى», دەيدى ا.تانكاەۆ.
ءبىر سوزبەن ايتقاندا, «اۋىل اماناتى» باعدارلاماسى اۋىلداعى كاسىپكەرلىكتى دامىتۋعا, تۇرعىنداردىڭ تابىسىن ارتتىرۋعا, وڭىرلىك ەكونوميكانى نىعايتۋعا باعىتتالعان ءتيىمدى باستاما ەكەندىگىن جان-جاقتى دالەلدەپ كەلەدى.
شىعىس قازاقستان وبلىسى,
گلۋبوكوە اۋدانى