ەرتەڭ باستالاتىن ەڭ بەلدى جارىستاردىڭ ءبىرى – «Australian Open-2026» ءتۋرنيرىنىڭ تۇساۋكەسەر كەزدەسۋلەرىندە ەلىمىزدىڭ تەننيسشىلەرى كىمدەرمەن كۇش سىناساتىنى بەلگىلى بولدى.
سوڭعى كەزدەرى ايشىقتى ونەرىمەن جانكۇيەرلەردى قۋانتىپ جۇرگەن ەرلەر اراسىنداعى ەلىمىزدىڭ ءبىرىنشى راكەتكاسى الەكساندر بۋبليك (اتر №10) دجەنسون برۋكسبيمەن شەبەرلىك بايقاسادى. 25 جاستاعى اقش-تىڭ وكىلى پالەندەي تابىستارعا قول جەتكىزە العان ەمەس. ەڭ ۇزدىك كورسەتكىشى – وسىدان بەس جىل بۇرىن «US Open» دوداسىنا دەيىن جەتىپ, اتر تۋرنيرىندە ءبىر مارتە توپ جارۋى. ال الەكساندردىڭ قازىرگى قارقىنى كەرەمەت. بىلتىر وتانداسىمىز اتر-ءدىڭ ءتورت بىردەي تۋرنيرىندە جەڭىمپاز اتانسا, جىل باسىندا گونكونگتا وتكەن جارىستا دا الدىنا جان سالمادى. بۇل جاعداي بۋبليكتىڭ مەلبۋرندە ۇزدىكتەر ساناتىنا قوسىلۋعا زور مۇمكىندىگى بار ەكەنىن اڭعارتادى. ەلىمىزدىڭ تاعى ءبىر تانىمال تەننيسشىسى الەكساندر شەۆچەنكونىڭ قارسىلاسى ىرىكتەۋ سىنى اياقتالعاننان كەيىن انىقتالادى.
ايەلدەر اراسىنداعى ەل ۇزدىگى ەلەنا رىباكينا (WTA №5) كايا يۋۆانمەن (WTA №97) كەزدەسەدى. 25 جاستاعى سلوۆەنيالىق سۇلۋدىڭ اۋىز تولتىرىپ ايتارلىقتاي تابىسى جوق. سول سەبەپتى تالاي دۇرمەكتەردە دارا شىققان اككى ەلەناعا بۇل قارسىلاسىن قاپى قالدىرىپ, كەلەسى كەزەڭگە ءوتۋ ەش قيىندىق تۋعىزا قويماس دەپ ويلايمىز. يۋليا پۋتينتسەۆا (WTA №105) بەاتريس ادداد مايامەن (№ 59 WTA) كۇش سىناسادى. بيىل جازدا 30 جاسقا تولعالى وتىرعان برازيليانىڭ ويىنشىسى جۇپتىق باسەكەدە وتە مىقتى. 2022 جىلى اۋستراليا اشىق بىرىنشىلىگىنىڭ فينالىنا دەيىن جەتتى. جەكەلەگەن سىندا WTA-نىڭ ءتورت تۋرنيرىندە توپ جارىپ, رولان گارروستىڭ جارتىلاي فينالىندا وينادى.
Wild-card ارقىلى مەلبۋرندەگى باسەكەدە باق سىناۋ مۇمكىندىگىنە يە بولعان زارينا دياس (WTA № 285) پاۋلا بادوساعا (WTA № 25) قارسى شىعادى. ءدال قازىر يسپانيا سپورتشىسىنىڭ ءبىزدىڭ قىزعا قاراعاندا قارقىنى ەداۋىر كۇشتى ەكەنى داۋسىز. 28 جاستاعى پيرەنەي تۇبەگىنىڭ تۋماسى بىلتىر ءدال وسى تۋرنيردە ۇزدىك تورتىككە ەندى. ونىڭ الدىندا رولان گارروس پەن اقش-تىڭ اشىق بىرىنشىلىگىنىڭ شيرەك فينالىنا شىعىپ, الەمنىڭ ەكىنشى راكەتكاسى اتاندى.