اتىراۋ اۋەجايىندا جولاۋشىلار 15 قاڭتاردان باستاپ بىرقاتار باعىت بويىنشا ۇشا الماي وتىر, بارلىق رەيستەر 16 قاڭتارعا اۋىستىرىلعان. الايدا بۇگىن دە جاعداي كۇردەلى كۇيىندە قالىپ وتىر, دەپ حابارلايدى Egemen.kz.
اۋە كومپانيالارىنىڭ مالىمەتىنشە, جاپپاي كەشىگۋلەرگە قولايسىز اۋا رايى سەبەپ بولعان. ۇشۋ-قونۋ جولاعىنداعى كوكتايعاق سالدارىنان رەيستەردى ورىنداۋ قاۋىپتى بولعان.
سونىڭ سالدارىنان 15 قاڭتارداعى كۇندىزگى جانە كەشكى رەيستەر كەيىنگە قالدىرىلدى. اتاپ ايتقاندا, استانا – اتىراۋ – استانا, الماتى – اتىراۋ, اتىراۋ – الماتى باعىتتارىنداعى رەيستەر توقتاتىلدى. ال امستەردام – اتىراۋ حالىقارالىق رەيسى ءماجبۇرلى تۇردە اقتاۋ قالاسىنداعى قوسالقى اۋەجايعا قوندى.
الەۋمەتتىك جەلىلەردە جولاۋشىلاردىڭ شاعىمدارى دا پايدا بولدى.
«بۇگىن تاڭعى 05:00-دە ءبىزدى قوناقۇيدەن الىپ كەتىپ, ۇشۋ ۋاقىتى 09:00 بولادى دەدى. كەيىن 11:00-گە, ودان سوڭ 11:30-عا اۋىستىردى. تاماق تا, سۋسىن دا بەرىلمەدى. دەمالاتىن بولمە دە جوق. ءوز ەسەبىمىزدەن تاماق پەن سۋسىن ساتىپ الۋعا ءماجبۇرمىز. اۋە كومپانياسى ناقتى ۇشۋ ۋاقىتىن ايتپاي وتىر», دەپ جازدى جولاۋشىلار.
ونىمەن قوسا اتىراۋدا قار قايتا جاۋا باستادى. بۇل اۋا رايى جاعدايىن ودان ءارى ناشارلاتتى. الداعى ساعاتتاردا رەيستەردىڭ ورىندالۋ-ورىندالماۋى ازىرگە بەلگىسىز.
Air Astana اۋە كومپانياسىنىڭ ءباسپاسوز قىزمەتى 15 قاڭتارداعى بارلىق كەشكى رەيستەردىڭ 16 قاڭتارعا اۋىستىرىلعانىن راستادى.
«كس 983/984 استانا – اتىراۋ – استانا, كس 885 الماتى – اتىراۋ, كس 878 اتىراۋ – الماتى رەيستەرى, سونداي-اق اقتاۋعا باعىتتالعان كس 904 امستەردام – اتىراۋ رەيسى كەيىنگە قالدىرىلدى. كەشىكتىرىلگەن رەيستەردىڭ جولاۋشىلارىنا تاماق پەن سۋسىن ۇسىنىلادى. جولاۋشىلاردان رەيستەردىڭ مارتەبەسىن اۋە كومپانياسىنىڭ سايتىنان نەمەسە ءموبيلدى قوسىمشاسىنان تەكسەرۋدى سۇرايمىز», دەلىنگەن حابارلامادا.
ەسكە سالا كەتەيىك, ءبىر كۇن بۇرىن حيۋاز دوسپانوۆا اتىنداعى اۋەجايدا تاعى ءبىر وقيعا تىركەلگەن. الماتىدان كەلگەن FlyArystan اۋە كومپانياسىنىڭ ۇشاعى قونعاننان كەيىن رۋلدەۋ جولىنان شىعىپ كەتكەن. ۇشاقتا 166 جولاۋشى بولعان, زارداپ شەككەندەر جوق.