اتىراۋ وبلىسىندا ءىز-ءتۇزسىز جوعالىپ, كەيىن ەرلى-زايىپتىنىڭ ءمايىتى تابىلعان وتباسىنىڭ تۋىستارى مارقۇم ايەلدىڭ اتىنان جىبەرىلگەن سوڭعى اۋديوحابارلاماعا قاتىستى تىڭ اقپارات ايتتى. جاقىندارى بۇل اۋديوجازبا بۇرىن جىبەرىلگەن ەسكى جازبا بولۋى مۇمكىن ەكەنىن جانە ونى كۇدىكتى تاراتۋى ىقتيمال ەكەنىن العا تارتتى, دەپ حابارلايدى Egemen.kz.
مالىمەت جۋرناليست جانات مولداشوۆانىڭ الەۋمەتتىك جەلىدەگى جازباسىنان بەلگىلى بولدى. وندا مارقۇم ەر ادامنىڭ ءىنىسى شالقار مۇقانعاليەۆپەن تەلەفون ارقىلى سويلەسكەن اۋديوسى جاريالانعان.
ونىڭ ايتۋىنشا, وتباسى مۇشەلەرى قازا تاپتى دەگەن بولجام جاسالعان كۇننەن كەيىن دە تۋىستار اراسىنداعى چاتتاردا ءارتۇرلى حابارلامالار پايدا بولعان.
اتىراۋ ماڭىندا جوعالعان وتباسى وقيعاسى: ىزدەۋ جۇمىسى قالاي ءجۇرىپ جاتىر؟
– كەلىنىمىز ءناسىپ وتەشقاليەۆا بۇرىن تۋىستار چاتىنا ءجيى جىبەرەتىن اۋديوحابارلامالار بار ەدى. سونداي اۋديولاردىڭ ءبىرى 7 قاراشا كۇنى قايتا جىبەرىلگەن. كۇدىك تۋعىزباۋ ءۇشىن بىرەۋ سول بۇرىنعى جازبالاردى قايتا-قايتا تاراتىپ وتىرعان بولۋى مۇمكىن. قازىر بارلىق تەلەفوندار سۇلتاندا (كۇيەۋ بالا, كۇدىكتى) بولدى دەپ ايتىلادى, سوندىقتان ول جىبەرۋى ىقتيمال دەپ ويلايمىز, – دەدى ول.
تۋىستارىنىڭ مالىمەتىنشە, سوڭعى اۋديوجازبانىڭ مازمۇنى كۇندەلىكتى ادەتتەگى سيپاتتا بولعان.
– وندا «قالايسىڭدار, ءبارى دۇرىس پا؟ بۇگىن جۇما, امان جۇرىڭدەر, اۋىرماڭدار» دەگەن سياقتى سوزدەر ايتىلادى. مۇنداي حابارلامالاردى ول ۇنەمى جىبەرەتىن. ءدال سول جازبانى 7 قاراشا كۇنى قايتا جىبەرگەن. الايدا سول كەزدە ەرلى-زايىپتىلاردىڭ ءتىرى بولماعانى بەلگىلى. سوعان قاراماستان تۋىستار كۇدىك تۋعىزباۋ ءۇشىن حات الماسۋ جالعاسقان, – دەدى مارقۇمنىڭ ءىنىسى.
بۇعان دەيىن تۋىستارى جوعالعان وتباسى مۇشەلەرى اتىنان كەلىپ تۇرعان ماتىندىك حابارلامالارعا بايلانىستى قۇقىق قورعاۋ ورگاندارىنا بىردەن جۇگىنبەگەنى حابارلانعان. ول حابارلامالاردا وتباسىنىڭ ۇلى ناۋرىز مۇقانعاليەۆ اناسىنىڭ سىرقاتتانعانىن, ەم-دومعا اقشا كەرەگىن ايتىپ, مالىن ساتىپ جاتقانىن جازعانى كورسەتىلگەن.
اتىراۋداعى جوعالعان وتباسىنىڭ قىزى مەن بالاسىن سۇڭگۋىرلەر ىزدەپ, تابا المادى
اتىراۋ وبلىستىق پوليتسيا دەپارتامەنتى Tengrinews تىلشىسىنە تەرگەۋ جانە جەدەل-ىزدەستىرۋ شارالارى جالعاسىپ جاتقانىن حابارلادى.
– بارلىق نۇسقا تەكسەرىلىپ جاتىر, – دەپ جاۋاپ بەرگەن پوليتسيا.
ۆەدومستۆو دەرەگىنشە, وتباسىنىڭ كىشى قىزى ءالى كۇنگە دەيىن حابار-وشارسىز كەتكەن رەتىندە ەسەپتە تۇر.
ەسكە سالايىق, 66 جاستاعى ماقسوت قارابالين مەن 64 جاستاعى ءناسىپ وتەشقاليەۆا اتىراۋ وبلىسى قىزىلقوعا اۋدانى جانگەلدين اۋىلىندا تۇرعان. 2025 جىلعى 25 جەلتوقساندا تۋىستارى پوليتسياعا ولاردىڭ قاراشا ايىنان بەرى بايلانىسقا شىقپاي كەتكەنىن حابارلاعان.
6 قاڭتاردا پوليتسيا جوعالعان ەرلى-زايىپتىنىڭ ءمايىتىن تاپتى. اتالعان دەرەك بويىنشا قىلمىستىق ءىس قوزعالدى. سونىمەن قاتار باس پروكۋراتۋرا ىزدەۋ پورتالىندا ەرلى-زايىپتىنى ولتىرۋگە كۇدىكتى رەتىندە كورسەتىلگەن سۇلتان سارسەماليەۆكە قاتىستى باعدارلاۋ جاريالانعان.
ايتا كەتەيىك, اتىراۋ وبلىسىندا جوعالىپ كەتكەن وتباسى: تىڭ دەرەكتەر جاريالاندى.