8-10 قاڭتار ارالىعىندا جالعان مەملەكەتتىك ءنومىر پايدالانۋ فاكتىلەرىن انىقتاۋ ماقساتىندا جەدەل-پروفيلاكتيكالىق ءىس-شارا ءوتتى. پروفيلاكتيكالىق ءىس-شارانى كولىك پروكۋراتۋراسى, پوليتسيا, كولىك باقىلاۋ ينسپەكتسياسى جانە «قازاۆتوجول» اق بىرلەسە ۇيىمداستىردى, دەپ جازادى Egemen.kz.
ءىس-شارا بارىسىندا ەلدىڭ رەسپۋبليكالىق ماڭىزى بار اۆتوموبيل جولدارىندا جالعان, قولدان جاسالعان نەمەسە وقىلمايتىن مەملەكەتتىك تىركەۋ نومىرلەرى بار كولىكتى تىزگەندەۋ بويىنشا 900-دەن استام فاكتى انىقتالدى.
باس پروكۋراتۋرانىڭ مالىمەتىنشە, جۇرگىزۋشىلەر جالعان نومىرلەردى, كوبىنەسە اقىلى اۆتوموبيل جولدارىمەن وتكەندە تولەم جاساۋدان جالتارۋ, بەلگىلەنگەن جىلدامدىق شەكتەۋلەرىن اسىرۋ, سونداي-اق سالماق-گاباريتتىك باقىلاۋدان ءوتۋ كەزىندە جۇك كولىكتەرىنىڭ ناقتى سالماعىن جاسىرۋ ماقساتىندا پايدالانادى.
ەلدەگى اقىلى جولدارمەن قانشا كولىك ءجۇردى
انىقتالعان فاكتىلەرگە قاتىستى اكىمشىلىك ىقپال ەتۋ شارالارى قابىلدانىپ, ونىڭ ىشىندە ايىپپۇل سالۋ, سونداي-اق سوت شەشىمدەرىنە سايكەس وزگە دە جاۋاپقا تارتۋ شارالارى قولدانىلعان.
بىلتىر وسى سيپاتتاعى زاڭ بۇزۋشىلىقتاردىڭ 40 مىڭنان استام فاكتىسى انىقتالعان.
ەندى ادەمى ءنومىردى كەزەككە تۇرماي, ونلاين الۋعا بولادى
بۇعان دەيىن پوليتسيا مەملەكەتتىك ءنومىرىن جاسىرعان كولىك جۇرگىزۋشىلەرىمەن كۇرەستى باستاعانىن حابارلاعانبىز.
ال دەنساۋلىق ساقتاۋ مينيسترلىگى مەن ىشكى ىستەر مينيسترلىگى كولىك جۇرگىزۋگە مەديتسينالىق قارسى كورسەتىلىمى بار ازاماتتاردى انىقتاپ, 1787 جۇرگىزۋشىنىڭ كۋالىگىنىڭ كۇشىن جويدى.