Instagram جەلىسىندە 17,5 ميلليون قولدانۋشىنىڭ جەكە دەرەكتەرى جاريا بولىپ كەتكەن. بۇل دەرەكتى كيبەرقاۋىپسىزدىكپەن اينالىساتىن Malwarebytes كومپانياسى راستادى. كومپانيانىڭ مالىمەتىنشە, دەرەكتەر قازىردىڭ وزىندە حاكەرلىك فورۋمداردا تارالىپ جاتىر, دەپ جازادى Egemen.kz.
تارالعان بازاعا پايدالانۋشى اتتارى, تولىق ەسىمدەر, ەلەكتروندى پوشتا مەكەنجايلارى, تەلەفون نومىرلەرى, ءىشىنارا فيزيكالىق مەكەنجايلار جانە وزگە دە بايلانىس دەرەكتەرى كىرگەن.
كومپانيا مۇنداي اقپاراتتىڭ كيبەرالاياقتار قولىنا ءتۇسۋى ناقتى قاۋىپ تۋدىراتىنىن ەسكەرتەدى:
«قىلمىسكەرلەر بۇل اقپاراتتى وزگەنىڭ اتىنان شىعۋ, فيشينگتىك ناۋقاندار جۇرگىزۋ جانە اككاۋنت دەرەكتەرىن قولعا ءتۇسىرۋ ءۇشىن پايدالانۋى ابدەن مۇمكىن. اسىرەسە Instagram-داعى قۇپيا ءسوزدى قالپىنا كەلتىرۋ تەتىگىن قولدانۋ ارقىلى پايدالانۋشىلاردىڭ ەسەپتىك جازبالارىنا كىرۋگە تىرىسادى».
ساراپشىلاردىڭ ايتۋىنشا, بۇل دەرەكتەر فيشينگتىك شابۋىلدار, جالعان حاتتار تاراتۋ جانە اككاۋنتتاردى بۇزۋ ءۇشىن پايدالانىلۋى مۇمكىن. اسىرەسە ەلەكتروندى پوشتا مەن تەلەفون ءنومىرى بەلگىلى بولعان جاعدايدا, اككاۋنتقا زاڭسىز كىرۋ الدەقايدا جەڭىلدەيدى.
Malwarebytes قولدانۋشىلارعا ءپارولدى جاڭارتۋ, ەكى فاكتورلى قورعانىستى قوسۋ جانە كۇماندى حابارلامالارعا جاۋاپ بەرمەۋ كەرەكتىگىن ۇسىنادى.
ەسكە سالا كەتەيىك, بىلتىرعى جىلدىڭ ماۋسىم ايىندا دا وسىنداي جاعداي قايتالانعان. وسىعان قاتىستى قۇزىرلى مينيسترلىكتىڭ نە دەيتىنىن, ۇلتتىق قاۋىپسىزدىك كوميتەتىنىڭ ارەكەتىن Egemen.ءkz تىلشىسى تارقاتىپ جازعان ەدى.
الايدا ەل ازاماتتارىنىڭ جەكە دەرەكتەرى تاراپ كەتتى دەپ جالعان اقپارات تاراتقاندار دا بولعان. سونداي جاعدايدىڭ ءبىرى الماتى مەكتەپ وقۋشىلارىنا بايلانىستى بولعان.
ال جەكە دەرەكتەردى راسىمەن جاريا قىلعاندار بۇدان بىلاي اكىمشىلىك جاۋاپكەرشىلىككە تارتىلىپ, ايىپپۇل ارقالايدى.