پاۆلودارلىق 7-سىنىپ وقۋشىسى يمران كۋسانوۆ باستاۋىش سىنىپتان-اق كومپيۋتەرلىك باعدارلامالاۋعا, ماتەماتيكالىق ەسەپتەرگە جۇيرىكتىگىمەن كوزگە ءتۇسىپ كەلەدى. بيىل ول رەسپۋبليكالىق اۋىل وليمپياداسىندا 9-سىنىپ وقۋشىلارىمەن ءبىر دەڭگەيدە سىنعا تۇسكەن. بۇل تۋرالى وقۋ-اعارتۋ مينيسترلىگىنىڭ ءباسپاسوز قىزمەتى حابارلادى, دەپ جازادى Egemen.kz.
يمران كۋسانوۆ ينفورماتيكا پانىنەن ەرەكشە العىرلىق كورسەتىپ, الگوريتمدىك ەسەپتەردى وڭاي شەشەدى. دارىندى وقۋشى العىرلىعىنىڭ ارقاسىندا اتالعان ءبىلىم بايگەسىنىڭ ينفورماتيكا باعىتىندا ءبىرىنشى ورىندى جەڭىپ الدى.
«ونىڭ زەرەكتىگى مەن ەسەپتەردى شەشۋدەگى العىرلىعى, ويلاۋ قابىلەتىنىڭ جۇيرىكتىگى قازىلار القاسىن دا تاڭعالدىرىپ, ول وليمپيادانىڭ ەڭ جاس قاتىسۋشىسى اتاندى», دەلىنگەن مينيسترلىك تاراتقان حابارلامادا.
يمرانعا 18 جىلدىق تاجىريبەسى بار ينفورماتيكا ءپانىنىڭ مۇعالىمى سويان ەرتاي باعىت-باعدار كورسەتىپ ءجۇر.
اقتاۋلىق جاس ماتەماتيكتەر حالىقارالىق وليمپياداعا جولداما الدى
«مەن ۇستازىممەن كۇندەلىكتى دايىندالامىن. وليمپيادادا الگوريتمدىك ەسەپتەر, دەرەكتەرمەن جۇمىس جانە باعدارلامالىق شەشىمدەر ازىرلەۋ سىندى كۇردەلى تاپسىرمالار بەرىلەدى. ءار كەزەڭ مەن ءۇشىن قىزىقتى بولدى, تاپسىرمالار كۇردەلەنگەن سايىن ءوزىمدى دامىتۋعا ۇمتىلدىم», دەدى جاس دارىن يمران كۋسانوۆ.
بەرىك ءۋالي حالىقارالىق وليمپيادا جۇلدەگەرلەرىنە ستيپەنديا تاعايىندادى
ايتا كەتەيىك, يمران وسى وليمپياداعا 5-سىنىپتان بەرى ۇزبەي قاتىسىپ, جوعارى سىنىپتاردىڭ ەسەپتەرىن شەشىپ ءجۇر. بۇعان دەيىن دە ول 2, 3-ورىنداردى يەلەنىپ, بىرنەشە رەت جەڭىس تۇعىرىنان كورىنگەن.