جايىق-كاسپي وبلىسارالىق باسسەيندىك بالىق شارۋاشىلىعى ينسپەكتسياسى مەملەكەتتىك ينسپەكتورلاردىڭ كۆادروتسيكلمەن جايىق وزەنىنە ءتۇسىپ كەتكەنىن راستادى, دەپ حابارلايدى Egemen.kz.
وقيعا 7 قاڭتاردا براكونەرلىككە رەيدتىك ءىس-شارانى جۇرگىزۋ كەزىندە بولعان.
«مەملەكەتتىك ينسپەكتورلاردىڭ قىزمەتتىك كۆادروتسيكلمەن ابايسىزدا وزەن سۋىنا ءتۇسىپ كەتۋ فاكتىسى تىركەلدى. قىزمەتتىك مىندەتىن اتقارىپ جۇرگەن ينسپەكتورلار ءتيىستى قاۋىپسىزدىك قۇرال-جابدىقتارىمەن, قۇتقارۋ جيلەتىمەن قامتاماسىز ەتىلگەندىكتەن, دەر كەزىندە قاۋىپسىز جەرگە شىقتى. ولاردىڭ ءومىرى مەن دەنساۋلىعىنا ەشقانداي زيان كەلتىرىلگەن جوق», دەپ حاباردار ەتتى ينسپەكتسيادان.
اتالعان وقيعاعا بايلانىستى ءتيىستى قىزمەتتەر حاباردار ەتىلگەن. ال قىزمەتتىك تەحنيكانى سۋدان شىعارۋ, تەحنيكالىق جاي-كۇيىن انىقتاۋ بويىنشا جۇمىس قولعا الىنعان.
«وقيعانىڭ ءمان-جايى انىقتالادى. قولدانىستاعى زاڭناماعا سايكەس ءتيىستى شارالار قابىلداناتىن بولادى», دەپ مالىمدەدى اتالعان ينسپەكتسيادان.