قاراعاندى وبلىسىنىڭ شەت اۋدانىندا العاش رەت تراسسالاردا جۇمىس ىستەۋگە ارنالعان ارنايى رەانيموبيل پايدالانۋعا بەرىلدى. قۇتقارۋ قىزمەتىنىڭ جاڭا كولىگى توتەنشە جاعدايلار مينيسترلىگىنىڭ جول-مەديتسينالىق-قۇتقارۋ قىزمەتىنىڭ قاراماعىنا بەرىلىپ, جول-كولىك وقيعالارى مەن وزگە دە توتەنشە جاعدايلار كەزىندە تىكەلەي اۆتوجولدارعا شىعادى, دەپ حابارلايدى Egemen.kz.
جاڭا رەانيموبيلدىڭ باستى مىندەتى – زارداپ شەككەندەرگە ەڭ العاشقى, شەشۋشى مينۋتتاردا شۇعىل مەديتسينالىق كومەك كورسەتۋ. ارنايى اۆتوكولىك زاماناۋي مەديتسينالىق قۇرال-جابدىقتارمەن تولىق قامتىلعان, بۇل وقيعا ورنىندا رەانيماتسيالىق شارالار جۇرگىزۋگە, ناۋقاستىڭ جاعدايىن تۇراقتاندىرۋعا جانە ونى جەدەل جاردەم بريگادالارىنا نەمەسە مەديتسينالىق مەكەمەلەرگە جەتكىزۋگە مۇمكىندىك بەرەدى.
سونىمەن قاتار تراسسا بويىنداعى جول-مەديتسينالىق-قۇتقارۋ بەكەتىنە وزدىگىنەن جۇگىنگەن جۇرگىزۋشىلەر مەن جولاۋشىلار دا قاجەتتى كومەكتى الا الادى.
مۇنداي رەانيموبيلدىڭ ىسكە قوسىلۋى اۆتوجولداردا مەديتسينالىق كومەكتى قامتاماسىز ەتىپ, ادام ءومىرىن ساقتاپ قالۋ مۇمكىندىگىن ارتتىرادى.