ماڭعىستاۋ وبلىسىنىڭ اكىمى نۇرداۋلەت قيلىبايدىڭ قاتىسۋىمەن اۋىل مەكتەپتەرىنىڭ وقۋشىلارى اراسىندا وتكەن رەسپۋبليكالىق وليمپيادانىڭ جەڭىمپازدارى مەن سپورت سالاسىندا جوعارى ناتيجە كورسەتكەن سپورتشىلاردى ماراپاتتاۋ ءراسىمى ءوتتى, دەپ حابارلايدى Egemen.kz.
سالتاناتتى ءىس-شارادا ءوڭىر باسشىسى پرەزيدەنت قاسىم-جومارت توقاەۆ ۇلتتىق قۇرىلتاي وتىرىسىندا سپورتتى, اسىرەسە بالالار مەن جاسوسپىرىمدەر سپورتىن دامىتۋ مەملەكەتتىك ساياساتتىڭ نەگىزگى باعىتتارىنىڭ ءبىرى ەكەنىن اتاپ وتكەنىن ەسكە سالدى. وسى ستراتەگيالىق مىندەتكە سايكەس, ماڭعىستاۋ وبلىسىندا بۇقارالىق سپورتتى دامىتۋ, سپورتتىق ينفراقۇرىلىمنىڭ قولجەتىمدىلىگىن ارتتىرۋ جانە جاستاردىڭ تۇراقتى تۇردە سپورتپەن شۇعىلدانۋىنا جاعداي جاساۋ باعىتىندا جۇيەلى جۇمىس جۇرگىزىلىپ كەلەدى.
وبلىس اكىمىنىڭ ايتۋىنشا, سوڭعى ەكى جىلدا دەنە شىنىقتىرۋ مەن سپورتتى دامىتۋ ماقساتىندا 10 قوسىمشا مەملەكەتتىك مەكەمە اشىلعان. تەك 2025 جىلدىڭ وزىندە 6 سپورت نىسانى پايدالانۋعا بەرىلگەن. سونىمەن قاتار ول دارىندى بالالارعا ارنالعان وبلىستىق مامانداندىرىلعان مەكتەپ-ينتەرنات-كوللەدجىنىڭ جانە سپورتتى دامىتۋ ديرەكتسياسىنىڭ اشىلۋى ءوڭىر سپورتشىلارىنا بولاشاقتا حالىقارالىق ارەنالاردا, سونىڭ ىشىندە وليمپيادا ويىندارىندا ەل نامىسىن ابىرويمەن قورعاۋعا مۇمكىندىك بەرەتىنىنە سەنىم ءبىلدىردى.
ءىس-شارا بارىسىندا ءبىلىم سالاسىنداعى جەتىستىكتەر دە ەرەكشە اتاپ ءوتىلدى. استانا قالاسىندا وتكەن اۋىل مەكتەپتەرىنىڭ وقۋشىلارىنا ارنالعان رەسپۋبليكالىق وليمپيادانىڭ قورىتىندىسى بويىنشا ماڭعىستاۋ وبلىسىنىڭ وقۋشىلارى جاراتىلىستانۋ-ماتەماتيكالىق باعىت بويىنشا «ۇزدىك وليمپيادالىق كوماندا» نوميناتسياسىندا گران-پري يەلەنىپ, قوعامدىق-گۋمانيتارلىق باعىت بويىنشا «ۇزدىك وليمپيادالىق كوماندا» نوميناتسياسىندا ءى ورىنعا يە بولدى.
ءوڭىر باسشىسى جەڭىمپازداردى, ولاردىڭ اتا-انالارى مەن جەتەكشى ۇستازدارىن قۇتتىقتاپ, اۋىل مەكتەپتەرىندەگى دارىندى بالالاردى قولداۋ الداعى ۋاقىتتا دا ايماق ءۇشىن باسىم باعىت بولىپ قالا بەرەتىنىن اتاپ ءوتتى.
– بۇل جاي عانا ماراپات ەمەس. بۇل تاباندىلىقتىڭ, ۇزدىكسىز ەڭبەكتىڭ جانە بىلىمگە دەگەن شىنايى قۇشتارلىقتىڭ ناتيجەسى. اۋىل مەكتەبىندە وقىپ, رەسپۋبليكالىق دەڭگەيدە ءوز ءبىلىمىڭدى دالەلدەۋ – ۇلكەن جەتىستىك ءارى ماقتانىش. الدا سىزدەردى ۇلكەن جول كۇتىپ تۇر. بۇگىنگى جەڭىس – سول جولداعى العاشقى ماڭىزدى قادامداردىڭ ءبىرى. بىلىمگە دەگەن سۇيىسپەنشىلىكتەرىڭىز ەشقاشان سونبەسىن, ال ماقساتتارىڭىز بيىك بولسىن. ەل مەن ءوڭىردىڭ ابىرويىن اسقاقتاتاتىن تۇلعالار بولىپ وسۋلەرىڭىزگە تىلەكتەسپىن. ماڭعىستاۋ وبلىسىندا دارىندى بالالاردى قولداۋ – باستى باسىمدىقتاردىڭ ءبىرى. الداعى ۋاقىتتا دا اۋىل مەكتەپتەرىندەگى ءبىلىم ساپاسىن ارتتىرىپ, تالانتتى وقۋشىلاردى قولداۋدى جانە ولاردىڭ رەسپۋبليكالىق ءارى حالىقارالىق دەڭگەيدە جەتىستىككە جەتۋىنە بارلىق جاعدايدى جاساۋدى جالعاستىرامىز, – دەدى نۇرداۋلەت قيلىباي.
ءىس-شارا سوڭىندا سپورتشىلار مەن وليمپيادا جەڭىمپازدارىنا ماراپاتتار مەن اقشالاي سىياقىلار تابىستالدى. سونداي-اق جەڭىمپازداردىڭ اتا-انالارى مەن جەتەكشى ۇستازدارى دا ماراپاتتالدى.