شىمكەنتتە تۇزەۋ مەكەمەسىنىڭ ءۇش قىزمەتكەرى سوتتالعانداردى ازاپتاۋ ءىسى بويىنشا كۇدىككە ىلىگىپ وتىر. بۇل تۋرالى ادام قۇقىقتارى جونىندەگى ۋاكىلدىڭ ءباسپاسوز قىزمەتى حابارلاپ وتىر, دەپ جازادى Egemen.kz.
كۇدىكتىلەردىڭ زاڭسىز ارەكەتى شىمكەنت قالاسى بويىنشا وڭىرلىك وكىل نۇرجان ابدەزوۆتىڭ ازاماتتاردى قابىلداۋ كەزىندە اشكەرە بولعان.
قابىلداۋعا كەلگەن سوتتالعان ازامات 2025 جىلدىڭ ماۋسىم ايىندا مەكەمە قىزمەتكەرلەرى ازاپتاعانىن ايتقان.
سونىمەن قاتار قابىلداۋ بارىسىندا تاعى ءبىر سوتتالعاننىڭ سوققىعا جىعىلىپ, سالدارىنان جاق سۇيەگىنىڭ سىنعانى انىقتالدى.
اتالعان ىستەرگە بايلانىستى وڭىرلىك وكىل جەدەل تۇردە ءتيىستى ارەكەت ەتۋ شارالارىن قابىلداعان. ناتيجەسىندە مەديتسينالىق كومەكتى ۋاقتىلى كورسەتپەگەنى ءۇشىن مەديتسينا قىزمەتكەرلەرى جاۋاپكەرشىلىككە تارتىلىپ, مەكەمە قىزمەتكەرلەرى تەرگەلگەن.
قۇقىق قورعاۋ ينستيتۋتى مەكەمە قىزمەتكەرلەرىنىڭ ارەكەتتەرىندە ازاپتاۋ بەلگىلەرىنىڭ بولۋىنا بايلانىستى ولاردىڭ ارەكەتتەرىن قايتا قاراۋ جونىندە جوعارى قاداعالاۋ ورگانىنا جۇگىنگەن. باس پروكۋراتۋرا اتالعان ۇستانىمدى قولداپ, وتكەن جىلدىڭ سوڭىندا سوتقا دەيىنگى تەرگەپ-تەكسەرۋدى قايتا سارالاپ, مەكەمەنىڭ ءۇش قىزمەتكەرى قاماۋعا الىنعان.
بۇعان دەيىن مەملەكەتتىك قۇپيانى جاريا ەتكەن پاۆلودارداعى تۇزەۋ مەكەمەسىنىڭ باستىعىنا قاتىستى سوت ۇكىمى شىققانىن جازعانبىز.