«مۇنداي پىكىرلەردەن حابارىم بار. ونىڭ ءبارىن دۇرىس تۇسىنبەۋشىلىك نەمەسە كەيبىر «ارام ويلى» ادامداردىڭ بوس اڭگىمەسى دەپ سانايمىن. سىبايلاس جەمقورلىققا قارسى ءىس-قيمىل اگەنتتىگى دەربەس مەملەكەتتىك ورگان رەتىندە وزىنە جۇكتەلگەن مىندەتتى تابىستى ورىندادى. وعان كىنا ارتا المايمىز», دەدى قاسىم-جومارت توقاەۆ.
مەملەكەت باسشىسى بۇعان دەيىن انتيكور مەن ۇلتتىق قاۋىپسىزدىك كوميتەتىنىڭ (ۇقك) فۋنكتسيالارى ءبىر-ءبىرىن قايتالاپ كەلگەنىن, بۇل جۇمىس ساپاسىنا كەرى اسەر ەتكەنىن اتاپ ءوتتى.
«ۇلتتىق قاۋىپسىزدىك كوميتەتى دە جەمقورلىقپەن كۇرەسەدى. ەكى مەكەمەنىڭ ءبىر مىندەتتى قاباتتاسا اتقارۋى مەملەكەتتىك ماڭىزى بار جۇمىسقا كەسىرىن تيگىزە باستادى. قابىلدانعان شەشىم قاتارداعى جەمقورلاردى عانا ەمەس, قىلمىستىڭ يدەولوگتارى مەن ۇيىمداستىرۋشىلارىن دا جاۋاپقا تارتۋعا مۇمكىندىك بەرەدى», دەدى قاسىم-جومارت توقاەۆ.
جاڭا رەفورما بويىنشا, جەمقورلىققا قارسى كۇرەس تەك جازالاۋمەن شەكتەلمەيدى. ەندى اعارتۋ جانە ءتۇسىندىرۋ جۇمىستارىنا مەملەكەتتىك قىزمەت ىستەرى اگەنتتىگى جاۋاپتى بولادى.
«جەمقورلىقتان اۋلاق بولۋ قاجەتتىگىن بالالاردىڭ قۇلاعىنا جاستايىنان قۇيا بەرگەن ءجون. بۇل جەردە مەكتەپتەر, قوعامدىق ۇيىمدار, اسىرەسە اتا-انالار شەشۋشى ءرول اتقارۋعا ءتيىس. سول كەزدە ەلىمىزدە جەمقورلىققا مۇلدەم توزبەۋ مادەنيەتى قالىپتاسادى», دەپ تولىقتىردى پرەزيدەنت.
مەملەكەت باسشىسى ۇقك-نىڭ الدىنا ناقتى تالاپ قويدى: قۇزىرلى ورگان سان قۋالاماي, ساپاعا ءمان بەرۋى كەرەك. بۇل مەملەكەتتىك قىزمەتشىلەردىڭ ۇنەمى جالتاقتاپ جۇرمەي, باتىل جۇمىس ىستەۋىنە مۇمكىندىك بەرەدى.
«سىبايلاس جەمقورلىقپەن بارلىق دەڭگەيدە كۇرەسۋ مەملەكەتتىك ساياساتتىڭ باسىم باعىتى بولىپ قالا بەرەدى. بۇعان قاتىستى ەشقانداي كۇمان تۋماۋعا ءتيىس», دەدى مەملەكەت باسشىسى.