پرەزيدەنت قاسىم-جومارت توقاەۆ قاڭتار وقيعاسىنا قاتىسقان ازاماتتارعا بايلانىستى سوت پروتسەستەرى مەن تەرگەۋ جۇمىستارى جونىندە پىكىر ءبىلدىردى. مەملەكەت باسشىسى بۇل تاقىرىپقا قاتىستى نەگىزگى دەرەكتەر الدەقاشان بەلگىلى بولعانىن ايتىپ, كەيبىر سوت ىستەرى مەن ۇرلانعان قارۋدى ىزدەستىرۋ جۇمىستارى ءالى دە جالعاسىپ جاتقانىن مالىمدەدى, دەپ حابارلايدى Egemen.kz.
پرەزيدەنت قاسىم-جومارت توقاەۆتىڭ ايتۋىنشا, قاڭتار وقيعاسىنا بايلانىستى تەرگەۋ بارىسىندا قۇقىق قورعاۋ ورگاندارى ازاماتتىق قوعام وكىلدەرىمەن تىعىز بايلانىستا جۇمىس ىستەگەن. بىرقاتار قوعامدىق كوميسسيالار قۇرىلىپ, ولارعا بەدەلدى زاڭگەرلەر جەتەكشىلىك ەتكەن. بۇل تەرگەۋدىڭ بەيتاراپ ءارى ءادىل جۇرگىزىلۋىنە مۇمكىندىك بەرگەن.
«وسى ورايدا, ازاماتتىق جاۋاپكەرشىلىك تانىتىپ, كاسىبي بىلىكتىلىگىن كورسەتكەنى ءۇشىن ولارعا ريزاشىلىعىمدى بىلدىرگىم كەلەدى», دەدى مەملەكەت باسشىسى.
پرەزيدەنت 2022 جىلعى ناۋرىز ايىندا پارلامەنتتە ارنايى قوعامدىق تىڭداۋ ءوتىپ, قاڭتار وقيعاسىنا جانە ەلدىڭ كونستيتۋتسيالىق قۇرىلىمىن بۇزۋعا باعىتتالعان ارەكەتتەرگە جان-جاقتى باعا بەرىلگەنىن ەسكە سالدى.
ء«يا, كەيبىر سوت پروتسەستەرى, سونداي-اق, قاڭتاردا ۇرلانعان كوپتەگەن قارۋدى ىزدەستىرۋ جۇمىستارى ءالى جالعاسىپ جاتىر. سول كۇندەرى قىلمىسكەرلەر ءۇش مىڭنان استام قارۋ-جاراقتى يەمدەنىپ كەتكەن ەدى. بىراق كۇشتىك قۇرىلىمداردىڭ ارقاسىندا قارۋ-جاراق جاسىرىلعان قويمالاردىڭ كوبى تابىلدى», دەدى قاسىم-جومارت توقاەۆ.
پرەزيدەنت قاڭتار وقيعاسىن تالقىلاۋ كەزىندە ونىڭ تۇپكى سەبەپتەرى مەن اۋقىمىن ءتۇسىنۋدىڭ ماڭىزىن اتاپ ءوتتى. ونىڭ ايتۋىنشا, تارتىپسىزدىك ءبىر عانا قالادا ەمەس, ءبىر مەزەتتە ون ەكى قالادا ۇيىمداستىرىلعان. ناتيجەسىندە وبلىس اكىمدىكتەرى مەن قۇقىق قورعاۋ ورگاندارىنىڭ عيماراتتارى باسىپ الىنىپ, مەملەكەت ءۇشىن اسا قاۋىپتى جاعداي قالىپتاستى.
«توڭكەرىس» جاساۋعا ابدەن ماشىقتانعان مامانداردىڭ جەتەكشىلىگىمەن تارتىپسىزدىكتى ۇيىمداستىرۋشىلار ۇكىمەتتىڭ جانار-جاعارماي باعاسىن ءوسىرۋ تۋرالى شەشىمىن جەلەۋ ەتىپ, ادامداردى جاپپاي شەرۋگە شىعۋعا يتەرمەلەدى. سوسىن ازاماتتاردىڭ, مەملەكەتتىك قىزمەتشىلەردىڭ, ءبىر تاڭعالارلىعى, كۇشتىك قۇرىلىم قىزمەتكەرلەرىنىڭ ەداۋىر بولىگىنىڭ اراسىندا دۇربەلەڭ تۋعىزدى. ولار قارۋ-جاراق پەن قۇپيا قۇجاتتاردى قاراۋسىز قالدىرىپ, جۇمىس ورىندارىن تاستاپ, كەتە باستادى. ۇلتتىق قاۋىپسىزدىك كوميتەتىنىڭ جانە ىشكى ىستەر مينيسترلىگىنىڭ كەيبىر باسشىلارى سىن ساعاتتا وتان الدىنداعى ادالدىعىن ساقتاپ قالا المادى, كاسىبي دەڭگەيى دە تومەن ەكەنىن كورسەتتى», دەدى قاسىم-جومارت توقاەۆ.
مەملەكەت باسشىسى سول كەزەڭدە ۇلتتىق قاۋىپسىزدىك كوميتەتى مەن ىشكى ىستەر مينيسترلىگىنىڭ كەيبىر باسشىلارى كاسىبي السىزدىك تانىتىپ, وتان الدىنداعى جاۋاپكەرشىلىگىن ساقتاي الماعانىن دا اتاپ ءوتتى.
اسىرەسە الماتى قالاسىندا جاعدايدىڭ اسا كۇردەلى بولعانىن ايتقان پرەزيدەنت اسكەري قىزمەتشىلەر مەن بەيبىت تۇرعىنداردىڭ جاپا شەككەنىن, اكىمشىلىك عيماراتتار مەن بيزنەس نىساندارىنىڭ قيراپ, تونالعانىن جەتكىزدى. وسىنداي جاعدايدا توتەنشە شارالار قابىلداۋ قاجەتتىگى تۋىنداعان.