«قازگيدرومەت» 2026 جىلدىڭ قاڭتار ايىنا ارنالعان كونسۋلتاتيۆتىك اۋا رايى بولجامىن ۇسىندى. مامانداردىڭ مالىمەتىنشە, الداعى قاڭتار ايى ەلىمىزدىڭ باسىم بولىگىندە كليماتتىق نورماعا قاراعاندا 1-2 گرادۋسقا جىلىراق بولادى. جاۋىن-شاشىن مولشەرى جالپى رەسپۋبليكا بويىنشا نورما شاماسىندا كۇتىلەدى, دەپ جازادى Egemen.kz.
سونىمەن بىرگە پاۆلودار وبلىسىندا, سولتۇستىك قازاقستان مەن شىعىس قازاقستان وبلىستارىنىڭ باسىم بولىگىندە, قوستاناي وبلىسىنىڭ سولتۇستىگىندە, اقمولا, قاراعاندى جانە اباي وبلىستارىنىڭ سولتۇستىك-شىعىسىندا جاۋىن-شاشىن كوبىرەك ءتۇسۋى ىقتيمال. سونداي-اق الماتى جانە جامبىل وبلىستارىنىڭ وڭتۇستىك جارتىسىندا, تۇركىستان وبلىسىنىڭ وڭتۇستىك-شىعىسىندا جانە جەتىسۋ وڭىرىندە قار مولشەرى قالىپتى دەڭگەيدەن جوعارى بولۋى مۇمكىن.
اۋا رايى قۇبىلمالى بولادىقاڭتار ايىندا قار جاۋىپ, جەل كۇشەيىپ, بوران مەن تۇمان, كوكتايعاق قۇبىلىستارى بايقالاتىن كەزەڭدەر مەن اشىق ءارى ايازدى كۇندەر الما-كەزەك اۋىسادى.
ەلىمىزدىڭ باتىسىندا ايدىڭ العاشقى ونكۇندىگىندە تۇندە اۋا تەمپەراتۋراسى -10…-18 گرادۋسقا دەيىن تومەندەپ, كۇندىز -5…-12 گرادۋس شاماسىندا بولادى. كەيىن بىرتىندەپ جىلىنۋ كۇتىلەدى.
سولتۇستىك-باتىس, سولتۇستىك جانە ورتالىق وڭىرلەردە تۇنگى اۋا تەمپەراتۋراسى -10…-20 گرادۋستان -3…-8 گرادۋسقا دەيىن قۇبىلىپ, كۇندىز -12 گرادۋستان +3 گرادۋسقا دەيىن جەتۋى مۇمكىن.
شىعىس ايماقتاردا تۇندە -2…-18, كۇندىز -6…+2 گرادۋس ارالىعىندا ساقتالادى. ال وڭتۇستىك جانە وڭتۇستىك-شىعىستا تۇنگى تەمپەراتۋرا -12 گرادۋستان +5 گرادۋسقا دەيىن, كۇندىز +8…+10 گرادۋسقا دەيىن كوتەرىلەدى. ەلدىڭ ەڭ وڭتۇستىگىندە كۇندىزگى اۋا تەمپەراتۋراسى +15 گرادۋسقا جەتۋى ىقتيمال.
قاڭتاردىڭ ەكىنشى جارتىسىندا اياز كۇشەيەدىسينوپتيكتەردىڭ بولجامىنشا, قاڭتاردىڭ ەكىنشى جانە ءۇشىنشى ونكۇندىكتەرىندە سولتۇستىك, سولتۇستىك-باتىس, ورتالىق جانە شىعىس وڭىرلەردە سۋىق اۋا ماسسالارىنىڭ ەنۋىنە بايلانىستى كۇرت اياز بولادى. تۇندە اۋا تەمپەراتۋراسى -25…-35 گرادۋسقا دەيىن تومەندەپ, كۇندىز -15…-20 گرادۋسقا دەيىن سۋىتۋى مۇمكىن.
باتىس وڭىرلەردە ايازدى كۇندەرى تۇنگى تەمپەراتۋرا -20…-27 گرادۋسقا دەيىن تومەندەيدى. كەي كۇندەرى كۇندىز 0…+5 گرادۋسقا دەيىن جىلىنۋ ىقتيمالدىعى دا جوق ەمەس.
ال ەلىمىزدىڭ وڭتۇستىگىندە تەمپەراتۋرا قۇبىلمالى بولادى: تۇندە 0…-20, كۇندىز +12…-13 گرادۋس ارالىعىندا ساقتالادى. قاڭتاردىڭ سوڭىنا قاراي كەيبىر وڭىرلەردە تۇنگى اياز -30 گرادۋسقا دەيىن جەتۋى مۇمكىن.
قارسىز قىس قالىپتى جاعدايعا اينالا ما؟ايتا كەتەيىك, بيىل قىستىڭ العاشقى كۇندەرى ەلىمىزدىڭ كوپتەگەن وڭىرىندە قارسىز ءوتتى. سينوپتيكتەردىڭ ايتۋىنشا, ەگەر وسىنداي اۋا رايى ساقتالسا, ەلىمىز ءۇشىن قار از تۇسەتىن نەمەسە قارسىز قىس بىرتىندەپ قالىپتى قۇبىلىسقا اينالۋى ىقتيمال.