الەم حالىقتارى ءۇشىن جاڭا جىل – كۇنتىزبەدەگى جاڭا كۇن ەمەس, ءۇمىت پەن جاڭارۋدىڭ, وتكەنگە ەسەپ بەرىپ, بولاشاققا سەنىممەن قاراۋدىڭ باستاماسى. جەر شارىنىڭ ءار تۇكپىرىندە بۇل مەرەكە ءارتۇرلى اتالىپ, ارقيلى داستۇرمەن تويلانعانىمەن, جاھان جۇرتىن جاقسىلىققا دەگەن سەنىم بىرىكتىرەدى, دەپ جازادى Egemen.kz.
جاڭا جىل قارساڭىندا اقش-تىڭ ءىرى قالاسى نيۋ-يوركتىڭ Times Square الاڭى الەم نازارىن وزىنە اۋدارادى. جاڭا جىل ءتۇنى مىڭداعان ادام جينالىپ, ءتۇن ورتاسىندا اسپاننان باياۋ تومەندەگەن الىپ شاردى تاماشالايدى. بۇل ءسات امەريكالىقتار ءۇشىن ەسكى جىلدىڭ اياقتالىپ, جاڭا جىلدىڭ باستالعانىن بىلدىرەتىن ەرەكشە بەلگى. ءىس-شارا اياسىندا وتشاشۋ ۇيىمداستىرىلىپ, ادامدار جىلى شىرايمەن ءبىر-بىرىنە ىزگى تىلەكتەرىن ارناپ جاتادى.
فرانتسۋزدار Le Réveillon-دى, ياعني جاڭا جىلدى وتباسىمەن بىرگە اتاپ وتكەندى ءجون كورەدى. ولار ءۇشىن مەرەكەلىك داستارقاندا تەڭىز ۋستريتساسى, ىرىمشىك, فۋا-گرا سەكىلدى ۇلتتىق تاعامداردىڭ بولۋى مىندەتتى.
جاڭاجىلدىق كوڭىل كۇي سىيلايتىن ۇزدىك فيلمدەر
جاپونيا جۇرتى ءۇشىن جاڭا جىل ەڭ ماڭىزدى رۋحاني مەرەكەلەردىڭ ءبىرى. جىل سوڭىندا عيباداتحانالاردا قوڭىراۋ 108 رەت سوعىلادى. قوڭىراۋ ءۇنى ادام بالاسىنىڭ بويىنداعى جامان قاسيەتتەردەن ارىلۋعا ۇندەيدى. تاڭەرتەڭ جاپوندار عيباداتحاناعا ارنايى بارىپ, جاڭا جىلعا وراي اق تىلەكتەرىن ايتادى.
قىتايدا جاڭا جىل اي كۇنتىزبەسىنە سايكەس تويلانىپ, ون بەس كۇنگە دەيىن جالعاسادى. مەرەكەلىك بەزەندىرۋلەردە قىزىل تۇسكە باسىمدىق بەرىلەدى. ۇيلەردىڭ ماڭى مەن كوشەلەردە ايداھار ءبيى بيلەنىپ, وتشاشۋمەن كومكەرىلەدى. قىتايلىقتار ءۇشىن بۇل مەرەكە – وتباسى مۇشەلەرىنىڭ باسى قوسىلىپ, مولشىلىق پەن باق-بەرەكەنى شاقىرۋعا ارنالعان سالتاناتتى ءسات.
ال شۆەيتساريالىقتار جاڭا جىلدى بايىپپەن قارسى الۋدى ءجون سانايدى. وتباسى مۇشەلەرى ءبىر داستارحان باسىنا جينالىپ, ىرىمشىك پەن فونديۋدەن ءدام تاتادى. ەلدىڭ كەي وڭىرلەرىندە تۇرعىندار جاماندىقتى قۋىپ شىعۋ ماقساتىندا ءداستۇرلى كيىممەن اۋىلدى ارالايدى.
جاڭا جىل الدىندا اقشانى قالاي جوسپارلاعان دۇرىس؟
ءۇندىستاندا جاڭا جىل ءار ايماقتا ءارتۇرلى كۇندەرى اتالىپ وتىلەدى. كەي جەرلەردە ول كوكتەمدە تويلانىپ, ادامدار عيباداتحانالارعا بارىپ, ۇيلەرىن گۇلمەن, شاممەن بەزەندىرەدى. بۇل مەرەكە – رۋحاني تازارىپ, جاڭا ومىرگە قادام باسۋدىڭ بەلگىسى.
تۇركيادا دا جاڭا جىل وتباسىلىق سيپاتتا ءوربيدى. ادامدار ۇيلەرىن بەزەندىرىپ, Noel Baba بەينەسىن ورناتىپ جاتادى. باۋىرلاس ەل حالقى ءتۇن ورتاسىندا انار جەمىسىن جارۋ ءداستۇرى ارقىلى مولشىلىق پەن بەرەكەنى شاقىرادى.
جاڭا جىل مەرەكەسى قارساڭىندا استانا مەن الماتىدا قانداي ءىس-شارالار وتەدى؟
ال ورتالىق ازيا ەلدەرىندە جاڭا جىلدى وتباسىلىق مەرەكە سانايدى. اسىرەسە بالالار ءۇشىن مەرەكەلىك كوڭىل كۇي جاساۋ داستۇرگە اينالىپ كەتكەندەي. ءىس-شارالارعا اياز اتا مەن اقشاقار قاتىسىپ, بالالاردىڭ تىلەگىن ورىنداپ جاتادى. دەسە دە اتالعان ايماقتا كوكتەمدە اتاپ وتىلەتىن ناۋرىز مەرەكەسى ۇلتتىق جاڭا جىلدىڭ باستى نىشانى ەكەنى ءسوزسىز.