پرەزيدەنتتىڭ كومەكشىسى – ءباسپاسوز حاتشىسى رۋسلان جەلدىباي قاسىم-جومارت توقاەۆتىڭ بيىل اتقارعان نورماتيۆتىك-قۇقىقتىق جۇمىستارىنىڭ قورىتىندىسىن جاريالادى. مەملەكەت باسشىسى ستراتەگيالىق ماڭىزى بار كودەكستەرمەن قاتار, جاڭا قالالاردىڭ مارتەبەسىن ايقىندايتىن قۇجاتتاردى بەكىتتى, دەپ حابارلايدى Egemen.kz.
«بيىل مەملەكەت باسشىسى 95 زاڭعا, 388 جارلىققا, 80 وكىمگە, 22 وتىرىس حاتتاماسىنا, 3504 قىزمەتتىك قۇجاتقا قول قويدى», دەپ جازدى رۋسلان جەلدىباي.
قابىلدانعان قۇجاتتاردىڭ ىشىندە ەلدىڭ ەكونوميكالىق جانە تەحنولوگيالىق دامۋىنا سەرپىن بەرەتىن بيۋدجەت, سالىق, سۋ كودەكستەرىنىڭ جاڭا رەداكتسيالارى مەن «جاساندى ينتەللەكت تۋرالى» زاڭنىڭ ماڭىزى زور.
سونىمەن قاتار پرەزيدەنت وڭىرلەردى دامىتۋ ماقساتىندا ەكى ماڭىزدى شەشىم قابىلدادى:
«تۇركىستان قالاسىنىڭ ەرەكشە مارتەبەسى تۋرالى» زاڭعا قول قويىلدى. بۇل قۇجات تۇركىستاندى ءىرى مادەني-تۋريستىك ورتالىق رەتىندە دامىتۋدى كوزدەيدى. «الاتاۋ قالاسىنا دامۋ قارقىنى وزىق قالا» ارناۋلى مارتەبەسىن بەرۋ تۋرالى» جارلىق بەكىتىلدى. بۇل شەشىم الاتاۋدى جوعارى تەحنولوگيالىق يندۋسترياسى دامىعان ىسكەرلىك حابقا اينالدىرۋعا باعىتتالعان.رۋسلان جەلدىبايدىڭ ايتۋىنشا, قاسىم-جومارت توقاەۆتىڭ بۇل شەشىمدەرى ەلدە ەكونوميكالىق ءوسىمنىڭ جاڭا ورتاسىن قالىپتاستىرۋ ءۇشىن قابىلدانىپ وتىر.
بيىل ەل ەكونوميكاسىنداعى ءوسىم سوڭعى ون جىلداعى ەڭ جوعارى كورسەتكىشكە جەتتى
بۇعان دەيىن بيىل مەملەكەت باسشىسىنىڭ سىرتقى جانە ىشكى ساياسات باعىتىنداعى قىزمەتى وتە قاۋىرت ءارى جەمىستى وتكەنىن جازعان ەدىك. سونىمەن قاتار پرەزيدەنت اۋە جۇك تاسىمالى بويىنشا ۇلتتىق كومپانيا قۇرۋ باستاماسىن قولدادى.