حالىقتى الەۋمەتتىك قورعاۋ سالاسىنداعى جۇمىس ناتيجەسى قاي ءوڭىردىڭ دە دامۋ كورسەتكىشىنە اسەر ەتەتىنى ءسوزسىز. وسى باعىتتاعى جۇمىس اياسى جىل سايىن ارتىپ, الەۋمەت الەۋەتىنىڭ جاقسارۋىنا سەپ بولىپ كەلەدى.
سىر وڭىرىندە بيىلعا جوسپارلانعان جۇمىسپەن قامتۋدىڭ جول كارتاسىندا 46 560 جۇمىس ورنى اشىلاتىنى مەجەلەنسە, 11 اي قورىتىندىسىندا بۇل جوسپار 92% ورىندالدى, ونىڭ 65,3%-ى نەمەسە 27 964-ءى – تۇراقتى جۇمىس ورىندارى. جىل باسىنان بەرى اتاۋلى كومەك الاتىن, مۇمكىندىگى شەكتەۋلى, كوپبالالىلار مەن اسىراۋشىسىنان ايرىلعاندار اراسىنان 1 556 ادام ءوزىنىڭ كاسىپكەرلىك باستاماسىنا 1 572 800 تەڭگەلىك قايتارىمسىز مەملەكەتتىك گرانت الدى.
وسى جىلعا بەلگىلەنگەن كۆوتاعا سايكەس 76 مۇگەدەكتىگى بار ادام جۇمىسقا ورنالاسىپ, جىلدىق جوسپار 100%-عا ورىندالدى. وبلىس اكىمدىگىنىڭ قاۋلىسىمەن كەلەسى جىلى 64 مەكەمەگە 81 تۇرعىندى جۇمىسقا ورنالاستىرۋ جونىندە كۆوتا بەكىتىلىپ وتىر.
بىلتىر مۇگەدەكتىگى بار ادامداردى وڭالتۋدىڭ جەكە باعدارلاماسىن ورىنداۋعا رەسپۋبليكالىق جانە وبلىستىق بيۋدجەتتەن 6,8 ملرد تەڭگە بولىنسە, بيىل قارالعانى 8,3 ملرد تەڭگە بولىپ وتىر. قازىرگى مالىمەتكە سايكەس, الەۋمەتتىك قىزمەتتەر پورتالى ارقىلى 35 604 مۇگەدەكتىگى بار ادامنىڭ 33 368-ءى تەحنيكالىق وڭالتۋ قۇرالدارىمەن قامتاماسىز ەتىلىپ, كورسەتكىش 93,8%-دى قۇرادى.
وبلىستا ينۆاتاكسي قىزمەتىن 67 اۆتوكولىك جۇزەگە اسىرادى. بيىل وسى سالاعا بيۋدجەتتەن 268,9 ملن تەڭگە ءبولىنىپ, جىل باسىنان بەرى 1 742 ادام ينۆاتاكسي قىزمەتىمەن قامتىلدى. ءبىر ايتا كەتەرلىگى, مۇمكىندىگى شەكتەۋلى جانداردىڭ ءجۇرىپ-تۇرۋىن جەڭىلدەتىپ, قوعامعا ارالاسۋىنا جاعداي جاساۋعا ايماقتا جۇمىس ىستەپ جاتقان كومپانيالار دا ۇلكەن ۇلەس قوسىپ وتىر. جۋىردا عانا قىزىلورداداعى جىلۋ-ەلەكتر ورتالىعىنىڭ قۇرىلىسىن جۇرگىزىپ جاتقان «INTERTASCO» جشس وبلىستىق مۇگەدەكتەر قوعامىنا ينۆاتاكسي اۆتوكولىگىن سىيعا تارتىپ, ساۋاپتى ىستەن سىرت قالمايتىنىن كورسەتتى.
بىلتىردان باستاپ «ارناۋلى الەۋمەتتىك قىزمەتتەر كورسەتۋ بالالار ورتالىعى» بازاسىندا ىسكە قوسىلعان ء«ۇي جاعدايىندا مۇگەدەكتىگى بار بالالاردى وڭالتۋ» جوباسى اياسىندا «قازاقستان حالقىنا» قوعامدىق قورى تاراپىنان 283 ملن تەڭگەگە مۇگەدەكتىگى بار بالالاردى وڭالتۋدىڭ 95 قۇرالى جەتكىزىلىپتى. بۇگىندە رەابيليتولوگ-ماماندار 142 بالاعا وسى جابدىقتاردى پايدالانۋدى ۇيرەتىپ جاتىر.
مەملەكەت ەشكىمدى قولداۋسىز قالدىرمايدى. بىراق الەۋمەتتىك كومەك شىن مۇقتاجعا جەتۋى كەرەك. ولاي دەيتىنىمىز, وسى كۇنى اي سايىن ۇيىنە كىرىپ وتىرعان تابىسىن جاسىرىپ, مەملەكەت كومەگىنە دە ورتاقتاساتىندار جوق ەمەس. بۇلايشا «ەكى جەپ, بيگە شىعاتىنداردىڭ» ارەكەتى وسكەلەڭ ۇرپاق تاربيەسىنە دە تەرىس اسەرىن تيگىزەدى. قوعامدى «دايىن اسقا تىك قاسىق» دەگەن وسىنداي ۇستانىمنان ارىلتۋ ماقساتىندا قازىر مونيتورينگتىك توپتار دا جۇمىس ىستەپ جاتىر.
«وسى توپ جۇمىسىنىڭ ناتيجەسىندە كەيىنگى ءۇش جىلدا الەۋمەتتىك كومەك الاتىندار 3,2% تومەندەپ, 5,4 ملرد تەڭگە ۇنەمدەلدى. بيىل دا نەگىزسىز كومەك الۋشىلاردى 33 759 ادامنان 27 007-گە تومەندەتۋ جوسپارلانعان. وبلىستا ۋچاسكەلىك كوميسسيالار قۇرامى جاڭارىپ, بارلىق اۋداندا ۇيلەردى ارالاپ, اتاۋلى الەۋمەتتىك زاڭسىز الىپ وتىرعانداردى انىقتاۋ ارقاسىندا وتكەن جىلدىڭ وسى كەزەڭىمەن سالىستىرعاندا كومەك الاتىندار قاتارى ازايدى. كوپ وتباسىندا سوندا تۇرىپ جاتقان تابىسى بار ادامدار تىركەلىمنەن شىعىپ, ۇيدە تەك جۇمىس ىستەمەيتىندەر قالعان. جەكە كاسىپكەرلەردە جۇمىس ىستەيتىندەردىڭ جالاقىسىن ازايتىپ كورسەتكەندەرى دە از ەمەس. وسى باعىتتا سالىق ورگاندارىمەن جۇمىس ىستەپ, شىن تابىسىن جاسىرعاندار انىقتالدى. مەملەكەتتى مايشەلپەككە اينالدىرىپ كەلگەندەردىڭ ءبىرازى نەگىزسىز العان قارجىسىن سوتقا دەيىن تولەدى», دەيدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى جانار داۋلەتباەۆا.
وسىدان ەكى جىل بۇرىن قىزىلوردا, بايقوڭىر قالالارى مەن بارلىق اۋداندا اشىلعان وتباسىن قولداۋ ورتالىقتارى قازىر جۇيەلى جۇمىس ىستەپ تۇر. ولاردىڭ قىزمەتىن قامتاماسىز ەتىپ, جۇمىسىن ۇيلەستىرۋگە بيىلعا 449,3 ملن تەڭگە قاراستىرىلعان. ورتالىقتار وتباسىلارعا زاڭگەرلىك, پسيحولوگيالىق كومەك كورسەتۋدەن باستاپ كاسىپكەرلىك نەگىزدەرىنە وقىتۋ, بيزنەس-جوسپار قۇرىپ, گرانت, شاعىن نەسيە الۋعا, جۇمىسقا ورنالاسۋعا كومەك كورسەتەدى.
قازىردە ەڭبەك نارىعىنداعى جاعدايعا بايلانىستى جۇمىسىڭىزدان, ءتۇرلى جاعداي سەبەبىمەن كاسىبىڭىزدەن ايىرىلىپ قالۋ وڭاي. وڭىردە وسىنداي قيىن جاعدايعا ۇشىراعان ادامداردى انىقتاپ, ولارعا قولداۋ كورسەتۋدى ۇيىمداستىراتىن 1 561 موبيلدىك توپ قۇرىلعان. ولار ماۋسىم ايىنان باستاپ قولدانىسقا ەنگىزىلگەن «FSM Social» بىرىڭعاي تسيفرلىق پلاتفورماسى ارقىلى 975 الەۋمەتتىك قولداۋ شاراسى جايلى حابارلامانى تىركەدى. ونىڭ 395-ءسى بويىنشا ناتيجە بار, قالعان 580 ازاماتتى وڭالتۋ شارالارىنا قاتىستى سالالىق ورگاندارمەن بىرلەسكەن جۇمىس ءجۇرىپ جاتىر.
بيىل باسقارماعا قاراستى 5 ارناۋلى الەۋمەتتىك قىزمەتتەر كورسەتۋ ورتالىعى ارقىلى ستاتسيونارلىق, جارتىلاي ستاتسيونارلىق جاعدايدا بارلىعى 2 746 ادامعا ارناۋلى الەۋمەتتىك قىزمەت كورسەتىلدى. وبلىستىق بيۋدجەتتەن بولىنەتىن قارجى كولەمى ارتىپ, ورتالىقتاردىڭ ماتەريالدىق-تەحنيكالىق بازاسى جىل سايىن جاڭارتىلىپ وتىر.
«وڭىردە قولداۋدى قاجەت ەتەتىن جاندارعا بيۋدجەتتەن تىس كومەك جۇيەلى تۇردە كورسەتىلىپ كەلەدى. كومپانيالار مەن جەكە كاسىپكەرلەر ءتۇرلى مەرەكە قارساڭىندا كوپبالالى, الەۋمەتتىك جاعدايى تومەن, مۇگەدەك جاندارعا قايىرىمدىلىق شارالارىن جاساپ وتىرادى. تۇرعىندار جاعدايىنا بايلانىستى كاسىپتەگى ازاماتتارعا ءوتىنىش جاسايتىن كەزىمىز دە بار. مىسالى, جاقىندا عانا كوپ جىلدان بەرى توسەك تارتىپ جاتقان اناسىنا ارناۋلى كەرەۋەت سۇراعان قالا تۇرعىنى كەلدى. مۇگەدەكتەر پورتالى ارقىلى كەرەكتى جابدىقتاردى جەتكىزىپ بەرەتىن كاسىپكەرلەرگە ءوتىنىش ايتىپ, ولار دەر كەزىندە قاجەتتى تاۋاردى الىپ بەردى. ونداي ازاماتتاردىڭ كوپشىلىگى جاساعان كومەكتەرىن جاريالاۋدى ءجون كورمەيدى», دەيدى باسقارما باسشىسىنىڭ ورىنباسارى.
قىزىلوردا