قاراعاندى وبلىسىنداعى Qarmet مەتاللۋرگيالىق كومبيناتىندا وندىرىستىك قاۋىپسىزدىك پەن جەدەل باسقارۋعا ارنالعان جاڭعىرتىلعان احۋال ورتالىعى پايدالانۋعا بەرىلدى. جاڭا بۋىنداعى بۇل تسيفرلىق پلاتفورما تاۋلىك بويى, 24/7 رەجيمىندە مونيتورينگ, تالداۋ جانە قاۋىپسىزدىكتى باسقارۋ ۇدەرىستەرىن ءبىر جۇيەگە بىرىكتىرەدى, دەپ حابارلايدى Egemen.kz.
احۋال ورتالىعى ارقىلى كۇزەت بولىمشەلەرىنىڭ قىزمەتى, مەردىگەر ۇيىمدارعا تيەسىلى تەحنيكانىڭ قوزعالىسى GPS پەن ۆيدەوتەلەماتيكا كومەگىمەن, سونداي-اق 45 باقىلاۋ-وتكىزۋ پۋنكتىنىڭ جۇمىسى ۇزدىكسىز قاداعالانادى. بىرىڭعاي جۇيەگە مەتاللۋرگيالىق كومبينات اۋماعىنداعى 15 باقىلاۋ ايماعىنا ورنالاستىرىلعان 400-دەن استام بەينەباقىلاۋ كامەراسى بىرىكتىرىلگەن.
– بۇل ورتالىق كومبينات اۋماعىنداعى بارلىق لوگيستيكالىق ۇدەرىستەر مەن جالپى احۋالدى ناقتى ۋاقىت رەجيمىندە باقىلاۋعا مۇمكىندىك بەرەدى. ورتالىقتىڭ ۇزدىكسىز جۇمىسىن ءار اۋىسىمدا 15 بەينەباقىلاۋ وپەراتورى جانە ءبىر ۇيلەستىرۋشى مامان قامتاماسىز ەتەدى, – دەدى Qarmet كومپانياسىنىڭ رەجيم جانە قاۋىپسىزدىك جونىندەگى ديرەكتورى ولجاس سەيتاحمەتوۆ.
احۋال ورتالىعى جۇمىسىنىڭ باستى ەرەكشەلىگى – جاساندى ينتەللەكت تەحنولوگيالارىن ەنگىزۋ. ينتەللەكتۋالدى جۇيەلەر ىقتيمال قۇقىقبۇزۋشىلىقتاردى اۆتوماتتى تۇردە انىقتاپ, وقيعالاردى ساراپتايدى ءارى جەدەل ءارى ناقتى باسقارۋشىلىق شەشىمدەر قابىلداۋعا جول اشادى. بارلىق توتەنشە جايتتار مىندەتتى تۇردە تىركەلىپ, تسيفرلىق ساراپتاما قالىپتاستىرۋ ارقىلى قۇجاتتالادى. بۇل قاۋىپسىزدىك جۇيەسىن كەشەندى تۇردە تالداپ, پروتسەستەردى ۇزدىكسىز جەتىلدىرۋگە مۇمكىندىك بەرەدى. سونىمەن قاتار كۇزەت قۇرىلىمدارى پايدالاناتىن ۇشقىشسىز ۇشۋ اپپاراتتارىنىڭ اۋەدەن باقىلاۋ ۇشۋلارى دا وسى ورتالىق ارقىلى باقىلانادى.
كومپانيا الداعى كەزەڭدە بەينەباقىلاۋ ايماقتارىن كەڭەيتىپ, قوسىمشا 4 مىڭنان استام كامەرا ورناتۋدى جوسپارلاپ وتىر. احۋال ورتالىعىنىڭ ىسكە قوسىلۋى Qarmet ءۇشىن تسيفرلاندىرۋدى تەرەڭدەتۋ مەن وندىرىستىك قاۋىپسىزدىك دەڭگەيىن ساپالىق جاڭا كەزەڭگە كوتەرۋدەگى ماڭىزدى قادام سانالادى.