جاقىندا «Egemen Qazaqstan» گازەتىنىڭ ەڭ جاس ءتىلشىسى بەكزات قۇلشار دايىنداعان «و, عالامات!» اتتى جيناق جارىق كوردى.
بەكزات – ىزدەنىمپاز ءتىلشى. ول ءبىرازدان بەرى باس باسىلىمنىڭ سوڭعى بەتىندەگى «عالام عاجاپتارى» ايدارى اياسىندا الەمدەگى تاڭداي قاقتىرار تاڭعاجايىپتار تۋرالى ويماقتاي دۇنيەلەرىن ۇسىنىپ كەلەدى. جيناققا وسىندا جارىق كورگەن جازبالارىن قۇراستىرعان. تۋىندى 7 تاراۋدان تۇرادى. ءار تاراۋ تاقىرىپقا ساي جيناقتالعان. كىتاپقا باق سالاسىنداعى پرەزيدەنت سىيلىعىنىڭ لاۋرەاتى تالعات باتىرحان العى ءسوز جازعان.
«الدارىڭىزداعى الاقانداي جازبالار ارقىلى كوزىقاراقتى كوپشىلىك بەلگىلى جايلاردىڭ بەلگىسىز سىرلارىنا قانىعارى انىق. تانىم كوكجيەگىن كەڭەيتەر تالاي دەرەكتەرمەن تانىسىپ, كەرەمەت رۋحاني بايلىققا كەنەلەرى تاعى تالاس تۋدىرمايدى», دەيدى بەلگىلى جۋرناليست.
شىنىندا, مۇنداعى ءاربىر دەرەك قىزىق. ادام ايتسا سەنگىسىز قيلى-قيلى وقيعالار تاڭعالدىرادى. قۇمارتىپ وقيسىز. ماسەلەن, ءسىز 5 جاسىندا پەسا جازعان بالانى بىلەسىز بە؟ بىلمەسەڭىز, ايتايىق. اتاقتى ۆولفانگ موتسارتتىڭ اكەسى لەوپالد – اۋسترياداعى بەلگىلى كومپوزيتور بولعان. بىردە اكەسى 4 جاستاعى ءۆولفيدىڭ جازعان «شاتپاعىن» بايقايدى. قاراسا, ءتاپ-ءتاۋىر مۋزىكالىق كومپوزيتسيا. وسىدان باستاپ لەوپولد ۇلىن مۋزىكاعا مىقتاپ باۋليدى. 5 جاسىندا ۆولفي ءتىپتى كلاۆير اسپابىنا ارنالعان ەكى بىردەي مۋزىكالىق پەسا جازىپ شىعارعان. كىتاپتا وسىنداي قىزىقتى دەرەكتەر كوپ كەزدەسەدى. اسىرەسە بالالارعا بەرەرى مول. قىسقاسى, العاشقى جيناعى وقىرمانعا جول تارتقان جاس ارىپتەسىمىزگە ساتتىلىك تىلەيمىز!