بۇگىن ماڭعىستاۋ وبلىسىنىڭ اكىمى نۇرداۋلەت قيلىباي استانا قالاسىنداعى ورتالىق كوممۋنيكاتسيالار قىزمەتىنىڭ الاڭىندا بريفينگ وتكىزىپ, ءوڭىردىڭ 11 ايداعى دامۋ كورسەتكىشتەرى مەن الداعى ستراتەگيالىق جوسپارلارى تۋرالى بايانداما جاسادى, دەپ حابارلايدى Egemen.kz.
بيىل ماڭعىستاۋدا ەكونوميكالىق ءوسىمنىڭ نەگىزگى كورسەتكىشتەرى وڭ ديناميكا كورسەتىپ وتىر: ونەركاسىپ ءونىمىنىڭ كولەمى 2,9 ترلن تەڭگەدەن اسسا, ينۆەستيتسيالار كولەمى 105,4%-عا ءوسىپ, 949,9 ملرد تەڭگەنى قۇرادى. قۇرىلىس, ترانسپورت, ساۋدا, بايلانىس سالالارى دا تۇراقتى دامۋ ۇستىندە.
سوڭعى ءۇش جىلدا ماڭعىستاۋعا 3 ترلن تەڭگەگە جۋىق ينۆەستيتسيا تارتىلعان. تەك ءبىر جىلدىڭ وزىندە وڭىرگە 3 ملرد اقش دوللارىنان استام تىكەلەي شەتەلدىك ينۆەستيتسيا قۇيىلدى. جالپى 2026-2032 جىلدارى قۇنى 10 ترلن تەڭگە بولاتىن 55 جوبا جۇزەگە اسىرىلىپ, 8,8 مىڭ جۇمىس ورنى اشىلادى. بيىلدىڭ وزىندە 19 جوبا ىسكە قوسىلدى.
ماڭعىستاۋ تۋريزم سالاسىندا دا جوعارى كورسەتكىشكە يە بولىپ وتىر. ءوڭىر شەتەلدىك تۋريستەردى قابىلداۋ بويىنشا ەلىمىزدە توپ-3 قۇرامىنا ەندى. 2025 جىلدىڭ 9 ايىندا وڭىرگە 350 مىڭنان استام تۋريست كەلىپ, 17,2 ملرد تەڭگەنىڭ قىزمەتى كورسەتىلدى. ءتۋريزمدى دامىتۋ ماقساتىندا ماڭعىستاۋ, شەتپە جانە بەينەۋ تەمىرجول ۆوكزالدارى قايتا جاڭعىرتىلىپ جاتىر. كەندىرلى اۋەجايىنىڭ قۇرىلىسى باستالدى. 2025-2029 جىلدارى جالپى قۇنى 198 ملرد تەڭگەگە 17 تۋريستىك جوبانى ىسكە اسىرۋ جوسپارلانعان.
اگروونەركاسىپتىك كەشەندە دە وڭ وزگەرىس بايقالادى. بيىل 38 ملرد تەڭگەنىڭ ءونىمى ءوندىرىلدى. ماڭعىستاۋ تۇيە شارۋاشىلىعى بويىنشا ەلدە كوش باستاپ تۇر: وڭىردە 95 مىڭعا جۋىق تۇيە بار. پرەزيدەنت تاپسىرماسىنا سايكەس, تۇيە ءسۇتىن تەرەڭ وڭدەپ, ەكسپورتقا باعىتتاۋ بويىنشا ءۇش ءىرى جوبا ىسكە اسىپ جاتىر. بۇدان بولەك كاسپي تەڭىزىندە بالىق اۋلاۋ جانە ءوسىرۋ بويىنشا شەتەلدىك ينۆەستورلار تارتىلىپ, 2027 جىلعا دەيىن ءتورت ءىرى اكۆاكۋلتۋرا جوباسى ىسكە قوسىلادى. سونىڭ ىشىندە «Organic Fish» جوباسى جىلىنا 5000 تونناعا دەيىن البىرت وسىرۋگە مۇمكىندىك بەرەدى.
شاعىن جانە ورتا بيزنەس ءوڭىر ەكونوميكاسىنىڭ نەگىزگى تىرەكتەرىنىڭ ءبىرى رەتىندە 40%-دىق ۇلەسكە يە. سوڭعى 11 ايدا بيزنەس سۋبەكتىلەرى 1 ترلن تەڭگەنىڭ ءونىمىن شىعاردى. ينفراقۇرىلىم سالاسىندا جەرگىلىكتى ماڭىزى بار اۆتوجولداردىڭ 97%-ى جاقسى كۇيدە. ءوڭىر ترانزيتتىك تاسىمالدىڭ ماڭىزدى نۇكتەسى رەتىندە جۇك اينالىمىن ارتتىرىپ وتىر.
ءبىلىم بەرۋ سالاسىندا دا وڭ وزگەرىستەر كوپ. بيىل ماڭعىستاۋ وبلىسىندا «كەلەشەك مەكتەپتەرى» ۇلتتىق جوباسى اياسىندا 13, دەمەۋشىلىك ەسەبىنەن 1 مەكتەپ اشىلدى. سونداي-اق مەملەكەت باسشىسىنىڭ تاپسىرماسىنا سايكەس سپورتتا دارىندى بالالارعا ارنالعان 300-گە جۋىق جاس سپورتشىعا ءبىلىم بەرەتىن مەكتەپ-ينتەرنات كوللەدجى پايدالانۋعا بەرىلدى.
بيىل وڭىردە 6 مىڭنان استام مادەني ءىس-شارا ۇيىمداستىرىلدى. 2025 جىلى اقتاۋ قالاسى تۇركى الەمىنىڭ مادەني استاناسى بولدى. بۇل جوبا حالىقارالىق دەڭگەيدە ەلىمىزدىڭ تۋريستىك جانە مادەني الەۋەتىن دامىتۋعا سەپتىگىن تيگىزدى. جوبا اياسىندا بىرقاتار مادەني, تاريحي-عىلىمي جانە سپورتتىق شارالار وتكىزىلدى. قاراشا ايىندا «اقتاۋ-تۇركى الەمىنىڭ مادەني استاناسى» جىلىنىڭ سالتاناتتى جابىلۋ ءراسىمى ءوتتى.