كەشە سەنات دەپۋتاتتارى پلەنارلىق وتىرىستا ەلىمىزدىڭ قۇرىلىس كودەكسىن جانە «قازاقستان رەسپۋبليكاسىنداعى بانكتەر جانە بانك قىزمەتى تۋرالى» زاڭدارعا تۇزەتۋلەر ەنگىزىپ, ماجىلىسكە كەرى قايتاردى, دەپ حابارلايدى Egemen.kz.
قۇرىلىس كودەكسىنىڭ نەگىزگى ماقساتى – ارحيتەكتۋرا, قالا قۇرىلىسى جانە قۇرىلىس سالاسىنداعى زاڭنامانى جاڭارتۋ, سونداي-اق حالىقتىڭ قاۋىپسىز ءومىر ءسۇرۋ ورتاسىن قالىپتاستىرۋ. ماڭىزدى جاڭالىقتاردىڭ ءبىرى − نىسانداردى جوبالاۋ بارىسىندا سەيسميكالىق ميكرواۋدانداۋ كارتالارىن مىندەتتى تۇردە پايدالانۋ.
ونەركاسىپ جانە قۇرىلىس ۆيتسە-ءمينيسترى قۋانىشبەك قاجكەنوۆتىڭ ايتۋىنشا, قازاقستان اۋماعىنىڭ 45%-ى سەيسموقاۋىپتى ايماقتاردا ورنالاسقان.
«وسىنى ەسكەرە وتىرىپ, قۇرىلىس كودەكسىندە سەيسميكالىق قاۋىپسىز قۇرىلىسقا ارنالعان بولەك باعىت قاراستىرىلدى. بۇل باعىت اياسىندا سەيسموتۇراقتى جۇيەلەردى جاڭعىرتۋ, سىناقتار جۇرگىزۋ جانە سەيسميكالىق ميكرواۋدانداۋ كارتالارىن ازىرلەۋ كوزدەلگەن. ولار جوبالاردى, باس جوسپارلاردى جانە دەتالدى جوسپارلاۋ كەزەڭىندە قولدانىلادى. سەيسموقاۋىپتى اۋماقتاردا تۇرعىن جانە قوعامدىق نىساندارعا ارنالعان ارنايى سەيسموقورعاۋ ايماقتارى قۇرىلاتىن بولادى», دەدى ول.
قازىرگى تاڭدا مۇنداي كارتالار تەك الماتى قالاسىندا بار, ال باسقا وڭىرلەر ءۇشىن ەندى ازىرلەنىپ جاتىر.
سونىمەن قاتار سەناتورلار «بانكتەر جانە بانك قىزمەتى تۋرالى» زاڭدى جانە وعان قاتىستى قارجى نارىعىن رەتتەۋ مەن دامىتۋ, بايلانىس جانە بانكروتتىق ماسەلەلەرىن رەتتەيتىن زاڭدى قارادى.
جالپى, سەناتورلار كەلەسى ماقساتتارعا باعىتتالعان زاڭداردى قولدادى:
بانكتىك جۇيەنىڭ تۇراقتىلىعى مەن اشىقتىعىن ارتتىرۋ;
سالىمشىلار مەن قارىز الۋشىلاردىڭ قۇقىقتارىن قورعاۋ;
تسيفرلىق قارجى قۇرالدارىن دامىتۋ;
الاياقتىققا قارسى كۇرەستى كۇشەيتۋ;
قارجى نارىعىنا دەگەن سەنىمدى ارتتىرۋ.
الايدا مۇقيات قاراستىرۋ بارىسىندا سەناتورلار كەيبىر باپتارعا جاڭا تالاپتاردى ەنگىزۋدى ۇسىندى.
ليتسەنزيالاۋ جانە بانكتەرگە قويىلاتىن تالاپتار بويىنشا ولار بازالىق جانە امبەباپ بانكتىك ليتسەنزيا مودەلدەرىن ەنگىزۋدى ۇسىندى. بەلگىلەنگەن اكتيۆ شەگىنەن اسىپ كەتسە, بانك پرۋدەنتسيالىق نورماتيۆتەردى ساقتاي وتىرىپ, بازالىق ليتسەنزيانى امبەباپ ليتسەنزياعا اۋىستىرۋعا نەمەسە اكتيۆتەردى قىسقارتۋعا مىندەتتى بولادى. سونداي-اق يسلامدىق بانكتەر مەن رەزيدەنت ەمەس يسلامدىق بانكتەردىڭ فيليالدارىنىڭ قىزمەتىنە بىرتەكتى تاسىلدەر بەكىتىلىپ, ينۆەستيتسيالىق قىزمەتكە قاتىستى ەرەجەلەر دە ناقتىلاندى.
تۇتىنۋشىلاردىڭ قۇقىقتارىن قورعاۋ جانە اشىقتىقتى قامتاماسىز ەتۋ ءۇشىن سەناتورلار بانكتىك قارىزدارعا الىناتىن كوميسسيالاردى زاڭدا قاراستىرىلعان مولشەردەن ارتىق الا المايتىنىن ناقتىلادى. جەكە تۇلعالارعا بەرىلەتىن بانكتىك قارىز بويىنشا فيكسيرلەنگەن سىياقى مولشەرىن بىرجاقتى وزگەرتۋگە تىيىم سالىندى. سونىمەن قاتار ازاماتتاردىڭ قارىزدارىن سوتقا دەيىن شەشۋ كەزىندە بانكتىك, ساقتاندىرۋ جانە ميكروقارجى قىزمەتتەرى بويىنشا بىرىڭعاي قارجى ومبۋدسمەنى ءوفيسى قۇرىلدى.
انتيفرود جانە تسيفرلىق قاۋىپسىزدىك اياسىندا بانكتەر كليەنت الدىنداعى جاۋاپكەرشىلىكتى قابىلدايدى جانە اۋدارما الاياقتىق بەلگىلەرى بار انتيفرود ورتالىق بازاسىندا تۇرعان تۇلعاعا جاسالسا, قاراجاتتى قايتارۋعا مىندەتتى. جەكە تۇلعالارمەن بانكتىك قارىز كەلىسىمدەرىن قاشىقتان بيومەتريالىق اۋتەنتيفيكاتسياسىز جاساۋعا تىيىم سالىندى. سونىمەن قاتار باقىلاۋ, ەرتە تاۋەكەلدى انىقتاۋ جانە اقپارات قاۋىپسىز الماسۋ ءۇشىن «مالىمەت ۆيتريناسىن» قالىپتاستىرۋ تالاپتارى ەنگىزىلدى.
الەۋمەتتىك جانە تولەم قۇرالدارىن قورعاۋ ماقساتىندا توتەنشە جاعدايدان زارداپ شەككەندەرگە ارنالعان تولەمدەرگە جانە بانكارالىق جانە كارتوچكالىق تولەمدەردى قولداۋعا ارنالعان قاراجاتتى تاركىلەۋگە تىيىم سالىندى.