پرەزيدەنت قاسىم-جومارت توقاەۆ جامبىل وبلىسىنا جۇمىس ساپارىمەن كەلدى. پرەزيدەنت بىرقاتار ونەركاسىپتىك جانە الەۋمەتتىك نىسانداردى ارالاپ, ەكونوميكانىڭ ءتۇرلى سەكتورىنداعى ينۆەستيتسيالىق جوبالاردىڭ جۇزەگە اسىرىلۋ بارىسىمەن تانىستى, سونداي-اق وبلىس جۇرتشىلىعىمەن كەزدەستى.
وتاندىق فارماتسەۆتيكانى ىلگەرىلەتكەن
قاسىم-جومارت توقاەۆتىڭ بۇل ساپارى ء«امىر جانە د» جاۋاپكەرشىلىگى شەكتەۋلى سەرىكتەستىگىنىڭ قىزمەتىمەن تانىسۋدان باستالدى. كاسىپورىن مەديتسينالىق بۇيىمدار مەن دارىلىك زاتتار وندىرەدى. پرەزيدەنتكە مەديتسينالىق پرەپاراتتار مەن دايىن ءونىم تۇرلەرىن شىعاراتىن نەگىزگى تسەحتىڭ جۇمىسى كورسەتىلدى.
ء«امىر جانە د» جشس الەۋمەتتىك ماڭىزى بار اۋرۋلاردى دياگنوستيكالاۋعا ارنالعان جەدەل تەستىلەردىڭ كوپتەگەن ءتۇرىن شىعارادى. بۇل ونىمدەر ۆ جانە س گەپاتيتىن, ۆيچ-ينفەكتسياسىن, ميوكارد تالماسىن, سونداي-اق ەسىرتكى جانە پسيحوتروپتى زاتتاردى انىقتاي الادى. كاسىپورىنعا تيەسىلى مەديتسينالىق بۇيىمداردىڭ 200-دەن اسا اتاۋلى ءتۇرى بار. بۇگىندە سەرىكتەستىكتە 94 قىزمەتكەر ەڭبەك ەتەدى.
مەملەكەت باسشىسىنا «Super-pharm» فارماتسەۆتيكالىق كومپانياسىنىڭ جۇمىسى تۋرالى اقپارات بەرىلدى. بۇل – ەلىمىزدە مەديتسينالىق بۇيىمدار وندىرەتىن جەتەكشى كاسىپورىنداردىڭ ءبىرى. زاۋىتتا 600-دەن اسا ەڭبەككەر جۇمىس ىستەيدى. كومپانيا وتاندىق نارىقتاعى ءبىر رەتتىك قولدانۋعا ارنالعان مەديتسينالىق بۇيىمدارعا سۇرانىستىڭ 30 پايىزىن قامتاماسىز ەتەدى. اتاپ ايتقاندا, كاسىپورىن ءتۇرلى وپەراتسيالار ءۇشىن حيرۋرگيالىق جانە پروتسەدۋرالىق جيىنتىقتاردى, مەديتسينالىق بەتپەردەنىڭ بارلىق ءتۇرىن, بىررەتتىك قورعانىش كيىمىن, سانيتارلىق-گيگيەنالىق ماقساتتاعى بۇيىمداردى وندىرەدى. سونىمەن قاتار مەديتسينالىق شپريتستەر, ينفۋزيوندى جانە قاندى قايتا قۇيۋعا ارنالعان سيستەما قۇرالدارى, باسقا دا ونىمدەر دايىندالادى.
پرەزيدەنت وتاندىق فارماتسەۆتيكا يندۋسترياسىنىڭ دامۋى يمپورتقا تاۋەلدىلىكتى تومەندەتىپ, ۇلتتىق دەنساۋلىق ساقتاۋ جۇيەسىن نىعايتۋدا ماڭىزدى ەكەنىن اتاپ ءوتتى.
يندۋستريالىق ايماقتىڭ ىلكىمدى ىستەرى
بۇدان سوڭ مەملەكەت باسشىسى «تاراز» شاعىن يندۋستريالىق ايماعىن ارالاپ كوردى. الدىمەن پرەزيدەنتكە جامبىل وبلىسىنا ينۆەستيتسيا تارتۋ جانە اگروونەركاسىپ كەشەنىن دامىتۋ جوبالارى تانىستىرىلدى.
قاسىم-جومارت توقاەۆقا ەكونوميكانى يندۋستريالاندىرۋ, مال شارۋاشىلىعى مەن اۋىل شارۋاشىلىعى ونىمدەرىن وڭدەۋ, ەگىس القاپتارىن ءارتاراپتاندىرۋ, سۋ ۇنەمدەۋ تەحنولوگياسىن ەنگىزۋ باعىتىندا اتقارىلىپ جاتقان جۇمىستار تۋرالى باياندالىپ, ينۆەستيتسيالىق پۋل تۋرالى مالىمەت بەرىلدى.
جىل باسىنان بەرى وڭىرگە 599,2 ملرد تەڭگە ينۆەستيتسيا تارتىلعان, ءوسىم 33 پايىزدى قۇراعان. كەيىنگى ەكى جىلدا وبلىستا جالپى قۇنى 242 ملرد تەڭگە بولاتىن 56 ينۆەستيتسيالىق جوبا ىسكە اسىرىلعان.
مەملەكەت باسشىسىنا وبلىستاعى جەتەكشى كاسىپورىنداردىڭ جوبالارى كورسەتىلدى. ولاردىڭ قاتارىندا «قازفوسفات» سەرىكتەستىگىنىڭ مينەرالدى تىڭايتقىشتار ءوندىرۋ جانە YONGGANG CENTRAL IRON and STEEL كومپانياسى سالىپ جاتقان مەتاللۋرگيا زاۋىتى جوبالارى بار.
سونداي-اق جاڭاتاس قالاسىنداعى «ەۆروحيم-قاراتاۋ» اۋقىمدى ينۆەستيتسيالىق جوباسىنىڭ ارالىق قورىتىندىسى ۇسىنىلدى. قازىر كۇكىرت قىشقىلىن وندىرەتىن جاڭا زاۋىتتى ىسكە قوسۋ الدىنداعى تەكسەرۋ جۇمىستارى جۇرگىزىلىپ جاتىر. العاشقى ءونىم ىشكى نارىققا جونەلتىلدى.
الداعى ۋاقىتتا پايدالانۋعا بەرىلەتىن Shengtai Biotech Co.Ltd جۇگەرى وڭدەۋ زاۋىتى جونىندە دە باياندالدى. شۋ اۋدانىنداعى بۇل جوباعا 1,5 ملرد دوللار ينۆەستيتسيا سالىنعان. سونىمەن قاتار بايزاق اۋدانىنداعى Zhongkai Kazakhstan International Company قانت زاۋىتى قۇرىلىسى جايىندا مالىمەت بەرىلدى.
بۇعان قوسا KAZ FMWORLD AGRICULTURAL MACHINERY كومپانياسىنىڭ يندۋستريالىق ايماقتا شىعارىلاتىن اۋىلشارۋاشىلىق تەحنيكالارى كورسەتىلدى.
سونىمەن قاتار پرەزيدەنت Dala Glass اينەك وندىرەتىن كاسىپورىن قىزمەتىمەن تانىستى. زاۋىت بيىل جازدا ىسكە قوسىلعان. جوباعا سالىنعان ينۆەستيتسيا 1 ملرد تەڭگەنى قۇرايدى. جىلىنا 500 مىڭ شارشى مەتر اينەك شىعارۋ جوسپارلانىپ وتىر. بۇگىندە اتالعان نىساندا 50 ادام جۇمىس ىستەيدى. قاسىم-جومارت توقاەۆ كاسىپورىن قىزمەتكەرلەرىمەن اڭگىمەلەسىپ, ولاردىڭ ەڭبەگىنە تابىس تىلەدى.
پرەزيدەنت تاريحي پورترەت پەن اۆتوبۋس سىيلادى
وسى كۇنى مەملەكەت باسشىسى تارازداعى مامانداندىرىلعان اسكەري مەكتەپ-ينتەرناتقا باردى. قاسىم-جومارت توقاەۆ وقۋ كابينەتتەرى مەن سپورت زالىن ارالاپ كوردى. پرەزيدەنتكە مەكەمەدە 180 بالا ءبىلىم الىپ, ينتەرناتتا تۇراتىنى جونىندە باياندالدى.
مەكتەپ جاس وسكىندەرگە ءبىلىم بەرىپ, تەگىن تاماقتاندىرادى ءارى تۇرعىنجايمەن قامتاماسىز ەتەدى. وقۋ باعدارلاماسى 7–11 سىنىپتارعا ارنالعان. ءبىلىم وشاعىنىڭ نەگىزگى ماقساتى – كەلەشەكتەگى وتان قورعاۋشىلاردى دايارلاۋ, ولارعا اسكەري-پاتريوتتىق تاربيە بەرۋ. اسكەري ينتەرناتتا كۋرسانتتار ساباقتان تىس ۋاقىتتا روبوتتەحنيكا, دروندى باسقارۋ, جاساندى ينتەللەكت ۇيىرمەلەرىنە قاتىسادى. بولاشاق اسكەري قىزمەتشىلەرگە اعىلشىن ءتىلى تەرەڭدەتىپ وقىتىلادى.
قاسىم-جومارت توقاەۆ وقۋشىلارمەن اڭگىمەلەسىپ, مەملەكەت تاراپىنان اسكەري ءبىلىم بەرۋ جۇيەسىن دامىتۋعا ەرەكشە نازار اۋدارىلىپ وتىرعانىن اتاپ ءوتتى.
ءىس-شارا سوڭىندا مەملەكەت باسشىسى ءبىلىم وشاعىنا باۋىرجان مومىش ۇلىنىڭ پورترەتىن جانە ەلىمىزدە قۇراستىرىلعان مەكتەپ اۆتوبۋسىن سىيعا تارتتى.
سونىمەن قاتار قاسىم-جومارت توقاەۆ تارازداعى اريتمولوگيا كلينيكاسىنىڭ جۇمىسىمەن تانىستى. بۇل – جۇرەك سوعىسىنىڭ بۇزىلۋىن جەدەل ەمدەۋگە ماماندانعان مەديتسينالىق مەكەمە.
پرەزيدەنتكە كلينيكانىڭ كارديولوگيالىق جانە كارديوحيرۋرگيالىق كومەك, سونىڭ ىشىندە جوعارى تەحنولوگيالىق ارالاسۋ ارقىلى دارىگەرلىك جاردەمنىڭ تولىق سپەكترىن كورسەتە الاتىنى جونىندە باياندالدى.
وڭىردەگى بىرەگەي ورتالىق جۇرەكتى راديوجيىلىك پەن كريوابلاتسيا تاسىلدەرىمەن ەمدەيدى. مەكەمە ءبىر اۋىسىمدا 150 ادامعا دەيىن قابىلداي الادى. سونداي-اق 47 ورىندىق ستاتسيونار بار. ورتالىققا قۇيىلعان جالپى ينۆەستيتسيا كولەمى 2,5 ملرد تەڭگەنى قۇرادى.