باتىس قازاقستان وبلىسى, ورال قالاسىندا كەڭەس وداعىنىڭ باتىرى, حالىق قاھارمانى باۋىرجان مومىش ۇلىنىڭ تۋعانىنا 115 جىل تولۋىنا وراي «باتىر باۋىرجان:بولمىس پەن بيىكتىك» اتتى پاتريوتتىق فورۋم ءوتتى, دەپ حابارلايدى Egemen.kz.
فورۋمعا وبلىستىڭ ءار تۇكپىرىنەن باتىر ەسىمىن يەلەنىپ جۇرگەن 115 باۋىرجان ارنايى شاقىرىلعان ەكەن. AMANAT پارتياسىنىڭ وبلىستىق فيليالى ۇيىمداستىرعان ءىس-شاراعا سونداي-اق باتىس قازاقستان وبلىسىنىڭ اكىمى ناريمان تورەعاليەۆ, اسكەري ءبولىم ساربازدارى, سپورتشىلار قاتىستى. فورۋم بارىسىندا باتىر باۋىرجاننىڭ ءومىر جولى باياندالعان تەاترلاندىرىلعان قويىلىمدار كورسەتىلدى.
«فورۋمنىڭ نەگىزگى ماقساتى – باۋىرجان مومىش ۇلىنىڭ ەرلىككە تولى ءومىرى مەن ونەگەلى مۇراسىن ناسيحاتتاۋ, جاستار اراسىندا وتانسۇيگىشتىك رۋحتى, ەلگە قىزمەت ەتۋ قۇندىلىقتارىن قالىپتاستىرۋ, وتباسىداعى اكەنىڭ ءرولى مەن تاربيەسىنىڭ ماڭىزدىلىعىن دارىپتەۋ, ۇلتتىق رۋح پەن تاريحي سانانى نىعايتۋ. باۋىرجان مومىش ۇلى – تەك مايدان دالاسىنىڭ قاھارمانى عانا ەمەس, ۇلت رۋحىن وياتقان ۇلى تۇلعا, ەرلىك پەن ەلدىكتىڭ, نامىس پەن پاراساتتىڭ ماڭگىلىك ۇلگىسى. ونىڭ باتىرلىعى – تاريح قويناۋىندا قاتتاۋلى, ال وسيەتى – حالىق جادىندا ماڭگى ساقتاۋلى» دەيدى پارتيانىڭ وبلىستىق فيليالى توراعاسى مۇرات مۇقاەۆ.
فورۋم كەزىندە ءار سالادا ۇزدىك شىققان باۋىرجان ەسىمدى بىرقاتار ازاماتقا بەلسەندى قىزمەتى ءۇشىن باتىس قازاقستان وبلىسى اكىمىنىڭ اتىنان العىس حات تابىستالدى.
باتىس قازاقستان وبلىسى