«استانا وپەرا» تەاترىنىڭ ءسوليسى نۇرسۇلتان انۋاربەك رەسەيدىڭ ۇلكەن تەاترىنىڭ تاريحي ساحناسىندا ريحارد شتراۋستىڭ «سالومەيا» وپەراسىندا ديريجەر ۆالەري گەرگيەۆتىڭ باسقارۋىمەن ونەر كورسەتتى. الەمدەگى جەتەكشى وپەرا ساحنالارىنىڭ بىرىندەگى بۇل دەبيۋت ءانشى ءۇشىن كاسىبي تۇرعىدان ماڭىزدى بەلەس ءارى ەلەۋلى شىعارماشىلىق سىناق بولدى, دەپ حابارلايدى Egemen.kz مادەنيەت جانە اقپارات مينيسترلىگىنىڭ ءباسپاسوز قىزمەتىنە سىلتەمە جاساپ.
ءارتىس ورىنداعان پارتيا ورىنداۋشىدان اسقان دالدىكتى, ءمىنسىز ىرعاق سەزىمىن, انسامبلدىك ۇيلەسىمدىلىك پەن ايقىن درامالىق اسەرلىلىكتى تالاپ ەتەتىن ەڭ كۇردەلى پارتيالاردىڭ ءبىرى سانالادى.
اتالعان قويىلىم بۇعان دەيىن ايگىلى «مەتروپوليتەن-وپەرا» تەاترىنىڭ قاتىسۋىمەن ساحنالانعان. سپەكتاكلدى دايىنداۋعا بەلگىلى شەبەرلەر – رەجيسسەر كلاۋس گۋت, ستسەنوگراف ەتەن پليۋسس جانە كوستيۋمدەر بويىنشا سۋرەتشى ۋرسۋلا كۋدرنا اتسالىسقان.
ۇلكەن تەاتر ساحناسىنداعى بۇل ونەر كورسەتۋ نۇرسۇلتان انۋاربەكتىڭ شىعارماشىلىق جولىنداعى ماڭىزدى كەزەڭنىڭ زاڭدى جالعاسىنا اينالدى. بۇعان دەيىن ول بايقاۋدىڭ ءۇش ىرىكتەۋ كەزەڭىنەن ءساتتى ءوتىپ, رەسەيدىڭ ۇلكەن تەاترى جانىنداعى جاستار وپەرا باعدارلاماسىنا قابىلدانعان بولاتىن. باعدارلاما شەڭبەرىندە وقۋ بيىل قاراشا ايىنىڭ سوڭىندا باستالدى.