كوكشەنىڭ كوركى كوز تارتادى

بۇگىنگى تۋريست كوكشەنىڭ كوركەم تابيعاتىنا عانا ەمەس, ءار بەلەسى مەن توبەسىنىڭ استىندا بۇعىپ جاتقان كونە تاريحقا دا قۇشتار. اڭىز شىندىققا ءبىرتابان جاقىن. كوڭىلدى باۋراعان سوڭ كوركەم اڭگىمەگە بەرگىسىز, ەل ەسىندە ساقتالعان عيبراتتى شىندىق.

ەستە جوق ەسكى كەزەڭدە بۋراباي باۋرايىن مەكەندەيتىن ەلدە ەر بالا دۇنيەگە كەلىپ, ون جاسقا تولعاندا جالپاق جۇرتقا تانىلىپتى. ەل ونى وقجەتپەس دەپ اتاپ, اڭىز ەتەدى. ات كوتەرە الماعان سوڭ, پىلگە ءمىنىپ ءجۇرىپتى. قازاقتىڭ باسىنان قاشان قاسىرەت ارىلعان؟ جاۋلارى دا كوپ بولسا كەرەك. وقجەتپەس كۇندە ەل قورعاعان قىرعىن ۇرىسقا قاتىسىپ, تۋعان جەرىنىڭ ءتوسىن قورعايدى. كۇمىس كولدىڭ سۋىنا شومىلىپ, كوكشەنىڭ ەتەگىندەگى نۋ قاراعايدىڭ ورتاسىندا دامىلداپ جاتادى. ماناعى قاۋىپ-قاتەر ەستەن شىققان. ءدال وسى ۋاقىتتا ز ۇلىم جاۋ ايلاسىن اسىرعان. ابدەن ۇي­قىعا كەتتى-اۋ دەگەن كەزدە باس سالادى. بايلاپ الىپ قورلاماقشى. قاپىدا قالعان باتىر قوس قاپتالىنداعى قاراعاي مەن قايىڭدى تۇبىرىمەن قوپارا ج ۇلىپ, قايرات كورسەتەدى. ءسويتىپ, ورمان ىشىندە كادىمگى ءبىر اۋىلدىڭ قوتانىنداي جەر وتالادى. اۋماعى اتشاپتىرىم الاڭعا اينالادى. كەيىن حان وسى الاڭدى جاقسى كورىپ, مەكەندەگەن سوڭ ابىلاي الاڭى اتانىپتى.

كوز ۇشىندا – تاسسىرعاناق. الاڭنان تابان اۋدارماستان بيىككە كوز سالساڭىز عالامات ۇلكەن تاسسىرعاناق جانارىڭىزعا ىلىگەدى. تابيعاتتىڭ ادامزات قولىنان كەلمەس كەرەمەتى ىسپەتتى. كوكتاستىڭ ەنى شامامەن 15–20 قادامداي, تابانى 150 قادام توڭىرەگىندە. ەكى جاعى ءتىپ-تىك, تەپ-تەگىس. جالپاق تابانىندا بارماقتاي كەدىر-بۇدىر جوق. اۋزى دۋالى اۋليە بابالارىمىز تابيعاتتىڭ بۇل عاجايىبىن تاسسىرعاناق دەپ اتاعان. شىڭعا شوككەن ءپىلدى كورگىڭىز كەلسە, بۋرابايدىڭ باۋرايىنا كەلىڭىز. ابىلاي الاڭىنان ءجۇزىڭىزدى وقجەتپەسكە قاراي بۇرساڭىز, الەمنىڭ ەش جەرىندە جوق عاجايىپ مەنمۇندالايدى.

تۋ سوناۋ كوك اسپاننان كوكشىلتەر – كوك بۇلت قۇيىلا قۇلاپ, جۇپ-جۇقا شىمىل­دىعىمەن ەتەك-جەڭىن قىمتاعان وقجەتپەس سۋعا قاراپ سىلاڭدايدى. اڭىز تۋماي قايتسىن, سىرى مەن سىمباتىنىڭ ءوزى ەرتەگى ىسپەتتى ەمەس پە؟ وقجەتپەس قوجىر-قوجىر جاي تاستار ەمەس, تولايىم تازا گرانيت تەكشەلەردەن تۇرادى. ەندى ءبىر زەر سالعانىڭدا, الدەبىر الىپ باتىر تومەندە تۇرىپ ءتۇپ جاعى ەرەسەن جۋان, باس جاعى وتكىر, ۇشكىر, كوكپەڭبەك سۇڭگىنى جەتى قات اسپاننىڭ ار جاعىنان ءتونىپ كەلگەن كەساپاتقا قارسى سىلتەپ تۇرعان ءتارىزدى. وسى ءبىر ورلىكتى, ءتىلسىز تاستىڭ تامىرىنا سىڭگەن ەرلىكتى كور­گەن جاننىڭ تۇلا بويىنا عاجاپ ءبىر سەزىم ۇيالايدى.

تابيعاتى مەن تاماشا تاعىلىمى ۇيلەس­كەن بۋراباي وڭىرىنە ات ءىزىن سالاتىندار قاتارى جىل سايىن كوبەيىپ كەلەدى. 2024 جىلى ساف اۋاسىمەن تىنىستاپ, قۇر اتقا مىنگەندەي قۋناپ كەلىپ-كەتكەندەر سانى ءبىر ملن ادامنان استى. ونىڭ 404,7 مىڭى ورنالاستىرۋ ورىندارىنىڭ قىزمەتىن پايدالاندى. 2025 جىلدىڭ قاڭتار-قىركۇيەك ايلارى ارالىعىندا بۇل كورسەتكىش 530 مىڭ ادامعا جەتىپ, 31%-عا ءوستى.

ەندى تۋريستەردىڭ كوڭىلىن نە اۋلاپ تۇر دەگەن ساۋالعا جاۋاپ ىزدەيتىن بولساق, ەڭ الدىمەن بۋراباي باۋرايىندا «Magic Burabay 2026» تۇجىرىمداماسى جۇزەگە اسىرىلىپ جاتقاندىعىن ايتا كەتكەن ءجون. وسى تۇجىرىمداماعا سايكەس, جەرگىلىكتى تۇرعىندار مەن تۋريستەردىڭ ەركىن كىرۋىنە بولاتىن لوكاتسيالار قاراستىرىلعان. ولاردى ءسال عانا تاراتىپ ايتاتىن بولساق, بۋراباي كەنتىندەگى كوركى كوز اربايتىن ەرتەگىلەر ستانساسى, ايۋتاس جارتاسى بار. بۇل اۋماقتاردا قىسقى دەمالىستىڭ سان الۋان تۇرلەرى ۇسىنىلادى. كونكي, شاڭ­عى تەبۋ, سنوۋتيۋبينگ, قىر باسىنان قۇلديلايتىن قىسقى سىرعاناقتار, جاياۋ جۇرگىنشىلەر مارشرۋتى, ترەككينگ, حاس­كي يتتەرىمەن سەرۋەندەۋ, قالاساڭىز, اتقا ءمىنىپ تە جەلە شوقىتىپ, تاريحي تاعىلىمعا تۇنىپ تۇرعان ءوڭىردى ارالاپ كورۋگە بولادى.

قىراۋلى قىستا قولدىڭ سالاسىنداي اق قايىڭدار مەن ماڭگى جاسىل قاراعاي­لار كومكەرگەن بۋراباي باۋرايى قۇرقىلتايدىڭ ۇياسىنداي جىپ-جىلى. تاۋ ىشىندە وڭمەنىڭنەن وتەتىن سۋىق جەل سوعا قويمايدى, ەسەسىنە وتباسىلىق دەمالىسقا ارنالعان كەڭ اۋقىمدى قىزمەت ءتۇرى كوپ. «Discovery Borovoe», «Atyrau Avenue», «Sultan Plaza», «Grand Hotel Burabay», «Terrassa Park», «Forest Camp», «Wyndham Garden Burabay», «Rixos Borovoe» ءتارىزدى قوناقۇيلەردە شاڭعى, كونكي, قاردا جۇرەتىن قىرۋار تەحنيكا جالعا بەرىلەدى. قۇزار جارتاستىڭ ەتەگىنەن قۇلديلاپ قۇستاي ۇشاتىن سىرعاناقتاردا قىزىقتى ويىن-ساۋىق ۇيىمداستىرىلادى.

شيپاجايلار جىل بويى ەمدەۋ-ساۋىق­تىرۋ قىزمەتتەرىن كورسەتەدى. قىس مەزگى­لىندە حالىقتىڭ ىقىلاسى اۋىپ تۇراتىن «وقجەتپەس», «جۇمباقتاس», «ششۋچينسك» شيپاجايلارىندا كىرپياز كوڭىلدىڭ ۇدەسىنەن شىعاتىن قىزمەت كورسەتىلەدى. «قازاقستاندىق لاپلانديا» كەشەنى – بۋراباي كۋرورتىن­داعى قىسقى دەمالىسقا ارنالعان ەڭ تانىمال نىسانداردىڭ ءبىرى. كەشەن حاسكي يتتەرى جەگىلگەن شانامەن سەرۋەندەۋدەن باستاپ, كوڭىلگە قورقىنىش ۇيالاتاتىن, عاجايىپ سىرعا تولى, سەزىمىڭدى سەلت ەتكىزەتىن بولمەلەرىمەن تانىمال. مۇندا ينتەراكتيۆتى ايماقتار, جاڭا جىلدىق فوتولوكازيالار, وتباسىلىق دەمالىسقا ارنالعان قىزىقتى دا مازمۇندى باعدارلامالار ۇيىمداستىرىلادى. ۇيلە­سىمدى قىزمەت جاسقا دا, جاسامىسقا دا تارتىمدى. تۋريستەر كۋرورتتى وڭىردەگى ات سپورتى كلۋبتارىنىڭ قىزمەتىن دە كورە الادى. بۇل ارادا «ات اۋلاسى», «جەتى قازىنا» كلۋبتارىنىڭ جۇمىسىن ايتا كەتۋگە بولادى. جىلقى, پوني, تۇيە, بۇعىلارمەن سەرۋەندەۋ تاماشا اسەرگە بولەيدى.

«Aqmaral» شارۋاشىلىعى دا قىسقى مەزگىلدە كورۋگە بولاتىن جەر. بۋراباي مەيماندارى بۇل جەردە تەك پانتا ەمىن الۋعا عانا ەمەس, قىسقى سپورت تۇرلەرىمەن شۇعىلدانۋعا دا كەلەدى. تاۋ شاڭعىسى مەن سنوۋبورد اۋەسقويلارىنا ارنالعان ءارتۇرلى كۇردەلىلىكتەگى جولدار بار. بۇل جولداردىڭ بويىندا تاۋ شاڭعىسى بازالارى قوناقتارعا قىزمەت ەتەدى. ەڭ تانىمالى – «Elikti Park» تاۋ شاڭعىسى كەشەنى. كەشەننىڭ ءوز قوناقۇيى مەن مەيرامحاناسى بار. كەلۋشىلەرگە ءتۇرلى جابدىقتاردى جالعا بەرەدى. سونداي-اق «Orman Ski» الۋان ءتۇرلى قىزمەت كورسەتۋگە دايىن.

بۋراباي باۋرايىنداعى قىسقى قىزىقتىڭ ىستىق لەبى وسىلاي شارپىپ تۇرسا, ىرگەدەگى اسەم زەرەندىنىڭ دە اقشا قارعا ورانعان اجارى كوڭىل اربايتىنداي. كۋرورتتى ايماقتا قىسقى تۋريزم قىزمەتىن كورسەتەتىن بىرنەشە نىسان ورنالاسقان. «زەرەن نۇر» ساناتوري ساۋىقتىرۋ كەشەنى تىرەك-قيمىل اپپاراتى, تىنىس الۋ مۇشەلەرى, جۇرەك-قان تامىرى, اس قورىتۋ, قان اينالىمى, جۇيكە جۇيەسى سىرقاتتارىن وڭالتۋعا باعىتتالعان كەڭ اۋقىمدى قىزمەت ءتۇرىن ۇسىنادى. بەلسەندى دەمالىس تۇرلەرىنەن شاڭعى, كونكي, شانا, تيۋبينگ قاراستىرىلعان. سونداي-اق «اۆرورا گاردەن», «Danel» دەمالىس ايماقتارىندا قىسقى ويىن-ساۋىق تۇرلەرى قولجەتىمدى.

قىسقى تۋريزم باسقا اۋدانداردا دا قارقىندى دامىپ جاتىر. ماسەلەن, قور­عالجىن اۋدانىندا قىسقى بالىق اۋلاۋ سپورتى جاندانىپ كەلەدى. تابيعاتى تامىلجىعان اقكول اۋدانىندا دا قىسقى دەمالىس تۇرلەرى مول. مۇندا قىسقى قىزىقتى دەمالىس تۇرلەرى ۇسىنىلادى. «Wyndham Residences Aqkol» قوناقۇيى, «Sharzhum» دەمالىس بازاسى, «لاگۋنا اقكول» دەمالىس ايماعى سياقتى ونعا جۋىق ورنالاستىرۋ نىسانى جۇمىس ىستەيدى. اتاپ ايتقاندا, «Sharzhum» بەلسەندى دەمالىس پەن سپورتتى ۇناتاتىندار اراسىندا تانىمال. نىسان الداعى ۋاقىتتا مۇز ايدىنىن, سىرعاناقتار مەن شاڭعى تراسساسىن ىسكە قوسۋدى جوسپارلاپ وتىر. قىس مەزگىلىندە مۇندا بالالار مەن ەرەسەكتەرگە ارنالعان شاڭعى جارىستارى تۇراقتى وتكىزىلەدى.

قوسشى قالاسىنداعى «TAU Park», «Jailau Resort» دەمالىس بازالارى دا كوپشىلىككە تانىمال. «TAU Park» بازاسى تاۋ شاڭعىسى ىلديلارى, تيۋبينگ, اتپەن سەرۋەندەۋ, پەينتبول, ساداق اتۋ, قاردا جۇرەتىن تەحنيكالارمەن سەرۋەندەۋ قىزمەتتەرى سياقتى قىسقى ويىن-ساۋىقتىڭ بىرنەشە ءتۇرىن ۇسىنادى. ارشالى اۋدانىندا ورنالاسقان «Ozero», «Beibarys» دەمالىس بازالارى دا قوناقتاردى قابىلداپ, ءارتۇرلى قىسقى دەمالىس قىزمەتتەرىن كورسەتۋگە دايىن. تسەلينوگراد اۋدانىندا «Balqaragai», «زولوتوي فازان» دەمالىس ايماقتارى ورنالاسقان. بۇل نىسانداردا اتپەن سەرۋەندەۋ, كۆادروتسيكل, قاردا جۇرەتىن تەحنيكا, باگگيمەن ءجۇرۋ, شانا, شاڭعى, كونكي, تيۋبينگ, «بانان» اتتراكتسيونى, پەينتبول قىزمەتتەرى قولجەتىمدى.

تابيعي رەسۋرستاردىڭ, زاماناۋي ينفرا­قۇرىلىمنىڭ, قىسقى ويىن-ساۋىق­تىڭ كەڭ سپەكترىنىڭ ۇيلەسۋى ارقاسىندا ءوڭىر جىل بويى جۇمىس ىستەيتىن تۋريستىك باعىت رەتىندەگى مارتەبەسىن نىعايتىپ, وتاندىق, شەتەلدىك تۋريستەر ءۇشىن تارتىمدىلىعىن ارتتىرىپ كەلەدى.

اقمولا وبلىسى