2025 جىل ونەر سالاسى ءۇشىن الەمدىك دەڭگەيدەگى ايتۋلى وقيعامەن باستالدى. ديماش قۇدايبەرگەن نيۋ-يوركتەگى Madison Square Garden ساحناسىندا جەكە كونتسەرت بەردى. مىڭداعان كورەرمەن جيناعان بۇل كونتسەرت قازاق ونەرىنىڭ الەمگە تانىلۋىنا سەپتەستى, دەپ جازادى Egemen.kz.
بۇل جىل جاس ونەرپازدار ءۇشىن دە جەمىستى بولدى. ولار الەمدەگى ەڭ ءىرى مۋزىكالىق بايقاۋلاردا ونەر كورسەتىپ, جەڭىسكە جەتتى. اتاپ ايتساق, ەرجان ماكسيم دۋبايدا وتكەن Sanremo Best Song – 2025 بايقاۋىنىڭ گران-پري يەگەرى, الەكساندر ليم قازاندا وتكەن XXI «جاڭا تولقىن – 2025» كونكۋرسىنىڭ گران-پري يەگەرى, الماگۇل باتتاليەۆا XXXIV «سلاۆيان بازارى» حالىقارالىق ونەر فەستيۆالىنىڭ گران-پري يەگەرى, El Voice توبى ستاۆروپولدە وتكەن «Soldier’s Envelope – 2025» حالىقارالىق فەستيۆالىنىڭ گران-پري يەگەرى, الماتى وبلىسى جامبىل اۋدانى قاينازار اۋىلى №1 ورتا مەكتەبىنىڭ 7-ءشى سىنىپ وقۋشىسى ميراس ناعاشىباي XXIII «ۆيتەبسك» حالىقارالىق بالالار مۋزىكالىق بايقاۋىنىڭ جەڭىمپازى, جاسمين تۇزەلوۆا رەسەيدەگى «گولوس. دەتي» مۋزىكالىق شوۋىنىڭ ءفيناليسى, ەرنار سادىرباەۆ (Amre) ماسكەۋدە وتكەن «ينتەرۆيدەنيە – 2025» حالىقارالىق بايقاۋىنىڭ ءفيناليسى اتاندى.
«ماعان وسى كۇنگە دەيىن سەنىمىن جوعالتپاي, قولداۋ كورسەتىپ كەلە جاتقان ەلىمە العىسىمدى بىلدىرگىم كەلەدى. كەز كەلگەن جاس ونەرپاز ءۇشىن قولداۋ وتە ماڭىزدى. مادەنيەت سالاسىنداعى ارىپتەستەرىم دە مەملەكەت باسشىسىنىڭ جان-جاقتى قولداۋىن كورىپ كەلەدى. بۇل شىعارماشىلىققا ايتارلىقتاي اسەر ەتەدى. سەنىم مەن باتىلدىق ارتىپ, كوپ ىسكە قۇلشىنىس پايدا بولادى. مەن ءوز تاراپىمنان ەلىمىزدى ودان ءارى تانىتا بەرۋگە بار كۇش-جىگەرىمدى سالامىن», دەدى ەرنار سادىرباەۆ.
بيىل شىعارماشىلىق وقۋ ورىندارى ستۋدەنتتەرىنىڭ اراسىنان شىققان بايقاۋ جەڭىمپازدارىنىڭ سانى 14,9%-عا ارتتى.
پرەزيدەنت, سپورتشىلار, مادەنيەت مايتالماندارى: ەل ريزاشىلىعىنا بولەنگەن 2025 جىلدىڭ ۇزدىكتەرى كىمدەر؟
تەك 2025 جىلدىڭ وزىندە مادەنيەت سالاسىنداعى جوعارى وقۋ ورىندارى مەن كوللەدجدەردىڭ 1511 ستۋدەنتى رەسپۋبليكالىق جانە حالىقارالىق فەستيۆالدەردىڭ لاۋرەاتتارى مەن ديپلومانتتارى بولدى.
بيىل ەل سپورتىندا تىركەلگەن تاريحي جەتىستىكتەر توپتاماسىن دا نازارلارىڭىزعا ۇسىنامىز.