قازاقستاننىڭ اقش-تاعى ەلشىسى ماعجان ءىلياسوۆ پرەزيدەنت دونالد ترامپقا سەنىم گراموتاسىن تاپسىرۋ راسىمىنەن كەيىن ەكەۋى از-كەم اڭگىمەلەستى. امەريكا باسشىسى بيىل قاراشا ايىندا قاسىم-جومارت توقاەۆپەن اق ۇيدەگى كەزدەسۋدەن العان اسەرىمەن ءبولىستى. بۇل تۋرالى پرەزيدەنتتىڭ كومەكشىسى – ءباسپاسوز حاتشىسى رۋسلان جەلدىباي تەلەگرام ارناسىندا مالىمدەدى, دەپ جازادى Egemen.kz.
قۇراما شتاتتار كوشباسشىسى قازاقستان پرەزيدەنتىنە جىلى لەبىزىن جولداپ, ونى قۇرمەتتەيتىنىن اتاپ ءوتتى. سونداي-اق قاسىم-جومارت توقاەۆتى «حالىقارالىق ۇدەرىستەردى تەرەڭ بىلەتىن ءارى جان-جاقتى تۇسىنەتىن تاجىريبەلى مەملەكەت قايراتكەرى, كەرەمەت ادام» دەپ سيپاتتادى.
اقش پرەزيدەنتى مەملەكەت باسشىسىنا سىي-سىياپات جولدادى. ولاردىڭ اراسىندا اق ءۇيدىڭ سيمۆوليكالىق كىلتى مەن ءوزىنىڭ قولتاڭباسى قويىلعان بەيسبولكا دا بار.
ەسكە سالايىق, قاسىم-جومارت توقاەۆ قاراشا ايىندا ۆاشينگتونعا ساپارمەن بارىپ, اقش پرەزيدەنتى دونالد ترامپپەن كەلىسسوز جۇرگىزدى.
رەسمي كەزدەسۋدەن كەيىن قاسىم-جومارت توقاەۆ پەن دونالد ترامپ ەركىن فورماتتا اڭگىمەلەسكەن ەدى.
پرەزيدەنت ساپار بارىسىندا اقش مەملەكەتتىك حاتشىسى مارك رۋبيومەن جانە دونالد ترامپ اكىمشىلىگىنىڭ باسقا دا وكىلدەرىمەن كەزدەستى.