قوستانايداعى گەولوگيالىق مۋزەيدە جەر استىندا جاتقان 15 مىڭنان استام مينەرالدىڭ ۇلگىسى بار. ءمولدىر شىنىمەن قاپتالعان مۋزەي سورەلەرىنىڭ بىرىندە جارقىراپ جاتقان تاستىڭ ءبىرى – گرانات. وت شاشىپ تۇرعان قاس سۇلۋدىڭ قاراشىعىنداي قاپ-قارا تاس سارىباي كەنىشىندەگى قازبا جۇمىستارى بارىسىندا تابىلعان. مۋزەيگە كەزىندە ۆ.گاي ەسىمدى گەولوگ اكەپ تاپسىرىپتى.
مۋزەي مەڭگەرۋشىسى ۆەرا ەدىگەنوۆانىڭ ايتۋىنشا, اتالعان مينەرال رۋدنىي ماڭايىنداعى ماگنەتيتتى كەننىڭ بويىندا كوپ كەزدەسەدى.
«جالپى, «گرانات» – لاتىننىڭ ءسوزى, ءداندى تاس دەگەن ماعىنا بەرەدى. نەگىزى, مۇنى بۇرشىك تاس دەپ اۋدارسا دا بولادى. كوبىنە زەرگەرلىك بۇيىمداردى جاساۋعا پايدالانىلادى. تابيعاتتا بۇل مينەرالدىڭ 5-6 ءتۇرى كەزدەسەدى. تۇسىنە قاراي ارقايسىنىڭ ءوز اتاۋى بار.
مىسالى, القىزىل گرانات – المادين, قويۋ قىزىلى – پيروپ, جاپ-جاسىلى – ۋۆاروۆيت, ال ءبىز كورىپ تۇرعان قاپ-قارا گرانات اندراديت دەپ اتالادى. بۇل تاستار, كوبىنە, سىرعا, ساقينا, القا, بىلەزىك ءتارىزدى زەرگەرلىك بۇيىمداردى اشەكەيلەۋگە پايدالانىلادى. ادامعا كۇش-قۋات بەرەتىن قاسيەتى دە بار. ال زەرگەرلىك بۇيىمدارعا جارامسىزدارىن قاتتى اعاشتاردىڭ بەتىن تەگىستەۋگە جاراتادى», دەيدى مۋزەي مەڭگەرۋشىسى ۆەرا ەدىگەنوۆا.
قوستاناي وبلىسى