1 قىركۇيەكتەن باستاپ ءبىلىم بەرۋ ۇيىمدارىندا دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىستارىنا ساي ازىرلەنگەن قوعامدىق تاماقتانۋدىڭ بىرىڭعاي ستاندارتى جۇمىس ىستەيدى. ستاندارت سەمىزدىك, قانت ديابەتى جانە جۇرەك-قان تامىرلارى اۋرۋلارىنىڭ قاۋپىن ازايتىپ, جەمىستەر مەن كوكونىستەردىڭ ۇلەسىن ارتتىرۋعا جانە تۇز بەن قانت مولشەرى كوپ تاعامداردىڭ مازىردە بولماۋىن قاداعالايدى, دەپ جازادى Egemen.kz.
مەكتەپ وقۋشىلارىنىڭ دۇرىس تاماقتانۋىن قامتۋ ماقساتىندا كەلەر وقۋ جىلىنان باستاپ مازىرگە جىلقى ەتى ەنگىزىلەدى. بۇل ءتۋرالى ماجىلىس دەپۋتاتتارىنىڭ ساۋالىنا پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعاريننىڭ جولداعان جاۋابىندا ايتىلعان.
«ستاندارت ەكى پورتسيا كولەمىندە اپتاسىنا ەكى رەت جىلقى ەتىن قوسۋدى ۇسىنادى. ۇيىمدارداعى تۇتىنۋ ءتارتىبى, سونداي-اق تاماق ونىمدەرىن ساقتاۋعا, دايىنداۋعا, تاسىمالداۋعا جانە وتكىزۋگە قويىلاتىن تالاپتار ساقتالعان جاعدايدا, ەت تاعامدارىنىڭ بارلىق تۇرىندە جىلقى ەتىن پايدالانۋ ءتارتىبى دەنساۋلىق ساقتاۋ سالاسىنداعى ۋاكىلەتتى ورگاننىڭ سانيتاريالىق قاعيدالارىمەن رەتتەلەدى. وسىلايشا, ۇيىمداردا تاماقتانۋدى جۇزەگە اسىراتىن قۇرىلىمدار تولىققاندى جانە الۋان ءتۇرلى ديەتانى, ايماقتىق ازىق-ت ۇلىك ارتىقشىلىقتارىن, ازىق-ت ۇلىك تاۋارلارىنىڭ قولجەتىمدىلىگىن, ۇلتتىق داستۇرلەردى جانە سالاۋاتتى تاماقتانۋ سالاسىنداعى حالىقارالىق ۇسىنىستاردى ەسكەرە وتىرىپ, ءمازىردى دەربەس قالىپتاستىرۋ قۇقىعىنا يە», دەلىنگەن سەرىك جۇمانعاريننىڭ جاۋابىندا.