استانا. 23 ناۋرىز. «نوۆوروسسيا» قوزعالىسىنىڭ ليدەرى ولەگ تسارەۆ پەن ۋكراينا ىشكى ىستەر ءمينيسترىنىڭ كەڭەسشىسى انتون گەراششەنكو «دوجد» تەلەارناسىنا بەرگەن تۇسىندىرمەلەرىندە ۋكراينانىڭ ەكس-پرەزيدەنتى ۆيكتور يانۋكوۆيچتىڭ كىشى ۇلى ۆيكتوردىڭ قازا تاپقانىن راسقا شىعاردى. بۇل تۋرالى «پوليت.رۋ» حابارلادى.
«مەن يانۋكوۆيچپەن بايلانىستا جۇرگەن دوستارىممەن تەلەفون ارقىلى سويلەسىپ شىقتىم, ولاردىڭ ءبارى وسى قايعىلى وقيعانىڭ بولعانىن راستاپ بەردى», - دەپ مالىمدەدى ولەگ تسارەۆ. ول سونىمەن بىرگە, ءوزىنىڭ بۇرىنعى پرەزيدەنت قىزمەتىنەن كەتكەلى بەرى ونىمەن بايلانىسى ءۇزىلىپ قالعانىن ايتتى.
وسى قايعىلى وقيعانىڭ ورىن العانىن انتون گەراششەنكو دا شىندىق رەتىندە اتاپ كورسەتتى. ول كىشى ۆيكتور يانۋكوۆيچتىڭ بايكال كولىنىڭ مۇزى استىنا كولىكپەن بىرگە باتىپ كەتكەنىن راستادى. ۋكراينا ىشكى ىستەر ءمينيسترى كەڭەسشىسىنىڭ سوزىنە قاراعاندا, يانۋكوۆيچتىڭ ۇلى كولدىڭ ۇستىندە دوستارىمەن بىرگە قىدىرىپ جۇرگەن. بىراق بۇل ونىڭ ايدىنىندا كولىكپەن جۇرەتىن ۋاقىت ەمەس.
تراگەديا ەسكى مۇز بەر جاڭا مۇزدىڭ شەكتەسكەن جەرىندە ورىن العان. گەراششەنكو وسىعان وراي Volkswagen Multivan كولىگىنىڭ ءبىر بۇيىرىنە قاراي قۇلاپ, بىرتىندەپ سۋعا باتا باستاعانىن انىقتاپ ايتتى. «ءتورت ادام بىردەن ماشينا كابيناسىنان سەكىرىپ شىعىپ كەتكەن. ولار بىرەۋىن سۋدان قولداپ شىعارىپ العان. ال بەلدىككە بايلانعان, كولىكتى جۇرگىزۋشى يانۋكوۆيچ ونىمەن بىرگە كولدىڭ تۇبىنە كەتىپ قالعان», - دەدى ول.
بۇدان بۇرىن كىشى ۆيكتور يانۋكوۆيچتىڭ قازاسىن ۋكراينا جوعارى راداسىنىڭ دەپۋتاتى نەستور شۋفريچ دە راستاعان بولاتىن.
مۇرات ايتقوجا.
مانبە, سۋرەت: پوليت.رۋ.