كەي كاسىپكەرلەر سوڭعى ۋاقىتتا زاڭدى تۇلعاسىن قىرعىزستاندا اشۋعا كوشتى. بۇعان كورشى ەلدەگى سالىقتىڭ جەڭىلدىگى مەن بيزنەستى جۇرگىزۋدەگى ەركىندىك سەبەپ بولىپ تۇر, دەپ جازادى Egemen.kz.
كاسىپ يەلەرى قىرعىزستانداعى سالىق تالاپتارىن قازاقستانمەن سالىستىرعاندا الدەقايدا جۇمساق دەپ باعالايدى. ول جاقتا جەكە كاسىپكەر اينالىمىنىڭ نەبارى 1 پايىزى عانا سالىققا الىنادى. قوسىلعان قۇن سالىعى دا 12 پايىز دەڭگەيىندە ساقتالعان. تاعى ءبىر ماڭىزدى جايت – بىزدەگى كومپانيالار قىرعىزستانداعى كاسىپكەرلەردەن العان قىزمەتىن شىعىن رەتىندە ەسەپكە قوسا الادى. ال ەل ىشىندە وڭايلاتىلعان سالىق ءتارتىبى بىرتىندەپ تارىلىپ بارادى.
سالىق ماسەلەسىن زەرتتەپ جۇرگەن مامان ماكسيم بارىشەۆ بۇل ءۇردىستى ەسكەرۋسىز قالدىرۋعا بولمايتىنىن ايتادى. ونىڭ پىكىرىنشە, سالىقتاعى قاتاڭدىق كۇشەيگەن سايىن بيزنەس بالاما جول ىزدەيدى. جابىق فورماتتاعى كەزدەسۋلەردىڭ بىرىندە قىرعىزستان مەن وزبەكستان وكىلدەرى قازاقستاندا قابىلدانىپ جاتقان سالىق كودەكسىن وزدەرى ءۇشىن ء«تيىمدى مۇمكىندىك» رەتىندە قابىلداپ وتىرعانىن جاسىرماعان. سونىڭ ناتيجەسىندە بۇل ەلدەرگە سوڭعى ايلاردا شەتەلدىك كاپيتال بۇرىنعىدان كوپ كەلە باستاعان.
ءماجىلىس دەپۋتاتى ايتۋار قوشمامبەتوۆ تە وسىعان ۇقساس جاعدايعا نازار اۋداردى. ونىڭ ايتۋىنشا, الەۋمەتتىك جەلىلەردە شەتەل ازاماتتارىنا قىرعىزستاندا جەكە كاسىپكەر تىركەۋدى ۇسىناتىن جارنامالار جيىلەپ كەتكەن. دەپۋتات مۇنى كورشى ەلگە بيزنەس كوشىنىڭ بەلگىسى دەپ باعالايدى.
مامانداردىڭ پايىمداۋىنشا, ماسەلە ءبىر عانا سالىق مولشەرىندە ەمەس. بۇل – كاسىپكەر ءوزىن قاي ەلدە قاۋىپسىز ءارى ەركىن سەزىنەتىنىنە قاتىستى تاڭداۋ. ال مۇنداي تاڭداۋ ەكونوميكانىڭ جالپى باعىتىنا تىكەلەي اسەر ەتەدى.