ەلىمىزدە جاڭا بۋىن باعدارلامالاۋ مەكتەبى اشىلدى. بۇل مەكتەپ ءداستۇرلى وقىتۋشىسىز, ستۋدەنتتەردىڭ ءوزارا ءبىرىن-ءبىرى وقىتۋىنا (peer-to-peer learning) نەگىزدەلگەن يننوۆاتسيالىق پەداگوگيكالىق تاسىلمەن جۇمىس ىستەيدى. ەكى جىلعا ارنالعان قارقىندى وقۋ باعدارلاماسى اياسىندا ستۋدەنتتەر 17 باعدارلامالاۋ ءتىلىن مەڭگەرىپ, 800-دەن استام پراكتيكالىق جوبانى جۇزەگە اسىرادى جانە جاساندى ينتەللەكت, كيبەرقاۋىپسىزدىك, بلوكچەين, ويىن جاساۋ سەكىلدى التى نەگىزگى باعىتتىڭ بىرىندە تەرەڭ ماماندانادى.
اتالعان مەكتەپ AI-SANA جوباسى شەڭبەرىندە Yessenov University بازاسىندا فرانتسيادا 01Edu پلاتفورماسىنا سۇيەنگەن, École 42 مودەلىندە اشىلىپ وتىر. كوپساتىلى ءارى جوعارى باسەكەلى ىرىكتەۋ ناتيجەسىندە 280 ۇمىتكەردىڭ ىشىنەن 90 ستۋدەنت تاڭدالىپ الىندى. ولار قىركۇيەك ايىنان باستاپ وسى مەكتەپتە ءبىلىم الۋعا كىرىستى.
باعدارلاما قاتىسۋشىلارىنىڭ ءبىرى, كومپيۋتەرلىك عىلىمدار جانە جاساندى ينتەللەكت فاكۋلتەتىنىڭ 3-كۋرس ستۋدەنتى ءادىلحان نۇربەك مەكتەپتە ۇيرەنىپ جاتقان داعدىلارى تۋرالى: «مەن Piscine ىرىكتەۋ كەزەڭىنەن ءساتتى ءوتىپ, ۇزدىك 90 ستۋدەنتتىڭ قاتارىنا ەندىم. باعدارلامانىڭ سوڭعى كەزەڭىندە جاساندى ينتەللەكت باعىتىن تاڭداۋدى جوسپارلاپ وتىرمىن. بولاشاقتا Alem AI جانە Higgsfield AI سىندى جوبالاردان شابىت الىپ, الەمگە تانىمال جەكە AI جوبامدى ىسكە قوسۋدى ماقسات ەتەمىن», دەپ پىكىر ءبىلدىردى.
باعدارلامانى تولىق اياقتاعان ءاربىر ستۋدەنت جەتەكشى الەمدىك IT كومپانيالارىنىڭ حالىقارالىق دەرەكقورىنا اۆتوماتتى تۇردە ەنگىزىلەدى. بۇل تۇلەكتەرگە جاھاندىق تەحنولوگيالار نارىعىندا تابىستى ەڭبەك ەتۋگە كەڭ مۇمكىندىك بەرەدى.