قازاق ادەبيەتى مەن مادەنيەتىندە وشپەس ءىز قالدىرعان كورنەكتى جازۋشى, كۇيشى, كينودراماتۋرگ تالاسبەك اسەمقۇلوۆتىڭ 70 جىلدىعىنا وراي استاناداعى روزا باعلانوۆا اتىنداعى «قازاقكونتسەرتتە» «تالتۇستەگى قوڭىر كۇي» اتتى ادەبي-سازدى ەسكە الۋ كەشى ءوتتى.
ءىس-شارانىڭ ماقساتى – ايتۋلى تۇلعانىڭ شىعارماشىلىق مۇراسىن كەڭىنەن دارىپتەپ, ونىڭ قازاق رۋحانياتىنداعى ەرەكشە ورنىن كوپشىلىككە تەرەڭىرەك تانىتۋ.
كەش بارىسىندا قالامگەردىڭ ايگىلى ء«تالتۇس» رومانىندا سۋرەتتەلگەن قوڭىر كۇيلەر شەرتىلىپ, اتادان بالاعا ميراس بولعان كۇي تاريحى ايتىلدى. كەشتى تىزگىندەگەن اقىن ەربول الشىنباي ء«تالتۇس» پەن «تاتتىمبەت سەرى» روماندارىنداعى كۇي اڭىزدارىن ايتىپ, كۇيشى, تالاسبەك اسەمقۇلوۆتىڭ شاكىرتتەرى اردابي ماۋلەت پەن رۇستەم نۇركەنوۆ قوڭىر اۋەزدى كۇيلەردى باپپەن ورىندادى. وسىلايشا وسى كەش ارقىلى كەتبۇعا, سارنياز, بايجىگىت, تاتتىمبەت, اقاي قاجى, ءجۇنىسباي جانە ت.اسەمقۇلوۆتىڭ اۆتورلىق كۇيلەرى قايتا جاڭعىردى. سونداي-اق «تاتتىمبەت سەرى» رومانىندا سۋرەتتەلەتىن, جاۋگەرشىلىك زامانداعى قىز-بوزبالانىڭ قوشتاسۋ سوزىندەي بولعان «ساۋلەم-اي!» ءانىنىڭ تاريحى تارقاتىلىپ, جاڭا نۇسقاسى العاش رەت كوپكە تانىستىرىلدى. كەش سوڭىندا جازۋشىنىڭ كوپتومدىق شىعارمالار جيناعىنىڭ 8-تومى جانە كۇيشى رۇستەم نۇركەنوۆ دايىنداعان «تالتۇستەگى قوڭىر كۇي» نوتالار جيناعى مەن تالاسبەك اسەمقۇلوۆتىڭ «بەكتورىنىڭ قازىناسى» كىتاپتارىنىڭ تۇساۋى كەسىلدى. اسەمقۇلوۆ الەمىمەن جاقسى تانىس, كۇيگە جۇرەگى قۇلاعان, بەكزات ونەرگە باس يگەن بارشا كورەرمەن ءۇشىن بۇل كەش وتە ءبىر اياۋلى ءساتتىڭ ءبىرى بولدى دەسەك ارتىق ەمەس.
بۇل ءىس-شارانى جازۋشىنىڭ جارى, ميفولوگ زيرا ناۋرىزباەۆا جانە قالامگەردىڭ شاكىرتتەرى ۇيىمداستىرىپ, تالاسبەك اسەمقۇلوۆ شىعارماشىلىعىن تاعى ءبىر قىرىن كوپشىلىككە جەتكىزدى.