قازاقستان فۋتبولىنىڭ بەلدى باپكەرى يۆان يلنيتسكيدىڭ تاربيەسىنەن وتكەن ويىنشىلار 2025 جىلعى ماۋسىمدا جوعارى دەڭگەيدە ونەر كورسەتىپ, ەسىمدەرىن ءجيى ەستىرتتى. «دياديا ۆانيا» لاقاپ اتىمەن تانىمال ماماننىڭ اۋلادان جانە مەكتەپتەن تاپقان تالانتتارى قازىرگى تاڭدا ۇلتتىق قۇراما مەن شەتەلدىك كلۋبتاردىڭ نەگىزگى ويىنشىلارىنا اينالدى, دەپ جازادى Egemen.kz.
ۋكراينادا تۋىپ, جامبىل وبلىسىنىڭ بىرلەسۋ-ەڭبەك اۋىلىندا تامىر جايعان يۆان يلنيتسكي – وتاندىق فۋتبولداعى بىرەگەي تۇلعا. ول كوپتەگەن ءجاسوسپىرىمنىڭ بويىنداعى جاسىرىن قابىلەتتى ءدوپ باسىپ تاني بىلۋىمەن ەرەكشەلەنەدى.
باپكەردىڭ تاربيەسىن كورگەن باۋىرجان يسلامحان, باقتيار زاينۋتدينوۆ, ارتۋر شۋشەناچەۆ, مۇحامەدجان سەيسەن, عالىمجان كەنجەبەك, داۋرەن جۇمات, ارسەن اشىربەك جانە دىنمۇحامەد قارامان بۇگىندە كاسىبي دەڭگەيدە بيىك بەلەستەردى باعىندىرىپ كەلەدى.
ماماننىڭ سوزىنشە, ەڭ مىقتى ويىنشىلاردىڭ كوبى كەزدەيسوق تابىلعان.
«باۋىرجان يسلامحان مەن عالىمجان كەنجەبەكتى اۋلادان, ال مۇحامەدجان سەيسەن مەن داۋرەن جۇماتتى مەكتەپتەن تاپقانمىن», دەيدى باپكەر.