حرومتاۋ اۋداندىق سوتىندا قالانىڭ بۇرىنعى اكىمى ساعىندىق شابىقباەۆ پەن اقتوبە قالاسىنىڭ تۇرعىنى نۇربەك قازبەكتىڭ ءىسى قارالدى. ايىپتالۋشىلار سوتتا كىناسىن مويىنداپ, ايىپپۇل رەتىندە جازا تاعايىنداۋدى سۇرادى, دەپ جازادى Egemen.kz.
ايىپتالۋشى ن.قازبەك قازان ايىندا اباتتاندىرۋ جانە جوندەۋ جۇمىستارىنا جاۋاپتى مەردىگەردەن حرومتاۋ قالاسىنىڭ اكىمى س.شابىقباەۆقا 400 مىڭ تەڭگە جانە وزىنە پارا رەتىندە 1 100 000 تەڭگە اۋدارۋدى تالاپ ەتكەن. سونداي-اق بەلگىلەنگەن مەرزىمدە قارجىنى اۋدارماسا كۇش قولداناتىنىن ايتىپ, قورقىتقان. ول وسى سيپاتتاعى ارەكەتىمەن جابىرلەنۋشىگە 700 مىڭ تەڭگە كولەمىندە شىعىن كەلتىرگەن.
سوت بارىسىندا جابىرلەنۋشى ن.قازبەكتىڭ ارەكەتىن كەشىرگەنىن مالىمدەگەن. سوندىقتان وعان قاتىستى «بوپسالاۋ» ءىسى قىسقارتىلىپ, ايىپتاۋ «پارا الۋ» دەرەگى بويىنشا جالعاسقان.
قىلمىستىق ءىستى قاراۋ بارىسىندا ەكى ايىپتالۋشى دا كىناسىن مويىنداعان. سوت ولاردى كىنالى دەپ تاپتى. ۇكىمگە ساي س.شابىقباەۆقا ءومىر بويىنا مەملەكەتتىك قىزمەتتە, سوت جۇيەسىندە جانە جەرگىلىكتى ءوزىن-ءوزى باسقارۋ ورگاندارىندا لاۋازىمدى قىزمەت اتقارۋعا تىيىم سالىندى. سونداي-اق 12 ميلليون تەڭگە كولەمىندە ايىپپۇل تولەۋگە مىندەتتەلدى. قاماۋدا بولعان ۋاقىتى ەسەپكە الىنىپ, تۇپكىلىكتى ايىپپۇل سوماسى 11 355 151 تەڭگە بولدى.
ن. قازبەك تە وسى كولەمدە ايىپپۇل ارقالادى. ونىڭ دا كۇزەتپەن ۇستاۋ ۋاقىتى ەسەپكە الىنىپ, 11 339 424 تەڭگە ايىپپۇل تولەۋگە مىندەتتەلدى.
ايتا كەتەيىك, س.شابىقباەۆ حرومتاۋ قالاسىنىڭ اكىمى قىزمەتىنە 2023 جىلدىڭ قىركۇيەگىندە تاعايىندالعان بولاتىن.