اقمولا وبلىسىنىڭ كوكشەتاۋ قالاسىندا زاماناۋي «Kokshe Arena» كوپفۋنكتسيونالدى سپورت كەشەنى اشىلدى. ەلدە بالاماسى جوق بۇل نىسان ارنايى مەملەكەتتىك قور قاراجاتى ەسەبىنەن سالىنعان. سالتاناتتى اشىلۋ راسىمىنە ەلىمىزدىڭ باس پروكۋرورى بەرىك اسىلوۆ, تۋريزم جانە سپورت ءمينيسترى ەربول مىرزابوسىنوۆ, قارجى ءمينيسترى ءمادي تاكيەۆ, اقمولا وبلىسىنىڭ اكىمى مارات احمەتجانوۆ قاتىستى. ءىس-شارانىڭ قۇرمەتتى قوناقتارى World Boxing حالىقارالىق فەدەراتسياسىنىڭ پرەزيدەنتى گەننادي گولوۆكين, UFC اياسىندا ونەر كورسەتەتىن ارالاس جەكپە-جەك شەبەرى شاۆكات راحمونوۆ بولدى, دەپ جازادى Egemen.kz.
قۇتتىقتاۋ سوزىندە بەرىك اسىلوۆ كەشەننىڭ پايدالانۋعا بەرىلۋى مەملەكەت باسشىسىنىڭ اكتيۆتەردى قايتارۋ جونىندەگى تاپسىرماسىن ورىنداۋ ناتيجەسى ءارى ادىلەتتى قازاقستان قۇرۋعا باعىتتالعان جۇيەلى ساياساتتىڭ ءبىر بولىگى ەكەنىن اتاپ ءوتتى.
ء«بىز قايتارىلعان اكتيۆتەردىڭ ماقساتتى پايدالانىلۋىن قاتاڭ باقىلاۋدا ۇستايمىز, ءاربىر تەڭگە قازاقستاننىڭ دامۋىنا قىزمەت ەتۋى ءتيىس. بۇل شارالاردىڭ بارلىعى «زاڭ مەن ءتارتىپ» يدەولوگياسىنا ساي كەلەدى جانە قوعام يگىلىگى ءۇشىن جۇمىس ىستەپ, سپورتتى دامىتۋعا, جاستاردى «ادال ازامات» تۇجىرىمداماسى رۋحىندا تاربيەلەۋگە جاعداي جاسايدى», دەپ اتاپ ءوتتى بەرىك اسىلوۆ.
اقمولا وبلىسىنىڭ اكىمى بۇل سپورت نىسانى جاي عانا سپورت كەشەنى ەمەس, ۇلتتىڭ بولاشاعىنا, بالالار مەن جاستاردىڭ دەنساۋلىعى مەن دامۋىنا سالىنعان ينۆەستيتسيا ەكەنىن ايتتى.
«پرەزيدەنت قاسىم-جومارت توقاەۆ ءوز سوزىندە بۇقارالىق سپورتسىز دەنى ساۋ ۇرپاق تاربيەلەۋ مۇمكىن ەمەستىگىن اتاپ وتكەن بولاتىن. سوندىقتان سپورتتى دامىتۋ, جاستاردى قولداۋ جانە سالاۋاتتى ءومىر سالتى مادەنيەتىن قالىپتاستىرۋ – باستى باسىمدىقتاردىڭ ءبىرى. «Kokshe Arena» – كاسىبي سپورت پەن بۇقارالىق دەنە شىنىقتىرۋدى بىرىكتىرەتىن جاڭا مۇمكىندىكتەر كەڭىستىگى. كەشەن بارلىق زاماناۋي تالاپتاردى ەسكەرە وتىرىپ سالىنعان جانە حالىقارالىق ستاندارتتارعا تولىق ساي», دەدى مارات احمەتجانوۆ.
كەشەن قۇرامىندا زاماناۋي مۋلتيمەديالىق جۇيەلەرمەن جابدىقتالعان 650 ورىندىق زال, سكالودرومى مەن ءورت-قۇتقارۋ قولدانبالى سپورت تۇرلەرىنە ارنالعان مۇناراسى بار امبەباپ سپورت زالى, سونداي-اق بوكس, كۇرەس, اۋىر اتلەتيكا جانە كروسسفيت زالدارى بار. بارلىق جابدىقتار وليمپيادالىق ستاندارتتارعا ساي سەرتيفيكاتتالعان. سونىمەن قاتار, مۇمكىندىگى شەكتەۋلى ازاماتتارعا ارنالعان ارنايى جابدىقتار دا قاراستىرىلعان. عيماراتتىڭ ەڭ جوعارعى سىيىمدىلىعى – شامامەن 1000 ادام.
كەشەنگە ىرگەلەس اۋماقتا جەڭىل اتلەتيكا ايماعى, ويىن سپورت تۇرلەرىنە جانە لاقتىرۋ جاتتىعۋلارىنا ارنالعان الاڭدار, سونداي-اق دەمالىس ايماقتارى مەن اباتتاندىرىلعان جاياۋ جۇرگىنشىلەر كەڭىستىگى ورنالاسقان.
اشىلۋ اياسىندا سپورت كەشەنىندە استانا مەن شىمكەنت قالالارىنان, سولتۇستىك قازاقستان, پاۆلودار, قوستاناي, قاراعاندى وبلىستارىنان كەلگەن بەلسەندى ۇزاق ءومىر ءسۇرۋ ورتالىقتارىنىڭ وكىلدەرى, سونداي-اق بيىل حالىقارالىق جارىستاردا جۇلدەلى ورىن العان اقمولالىق سپورتشىلار ماراپاتتالدى.
«Kokshe Arena» سپورت كەشەنى ءوڭىردىڭ سپورت ينفراقۇرىلىمىنداعى ماڭىزدى نىسانعا اينالىپ, جاتتىعۋلار, بۇقارالىق ءىس-شارالار مەن حالىقارالىق دەڭگەيدەگى جارىستار وتكىزۋگە بارلىق جاعداي جاسايدى.
ايتا كەتەيىك, بۇل سپورت كەشەنى – وڭىردە قايتارىلعان اكتيۆتەر ەسەبىنەن سالىنعان ەكىنشى سپورت ينفراقۇرىلىم نىسانى. بۇعان دەيىن وبلىستا زەرەندى اۋىلىندا بالالار مەن جاسوسپىرىمدەرگە ارنالعان سپورت مەكتەبى اشىلعان بولاتىن. جالپى ارنايى مەملەكەتتىك قور قاراجاتى ەسەبىنەن اقمولا وبلىسىندا 42 الەۋمەتتىك نىسان سالۋ جوسپارلانعان, ونىڭ ىشىندە 14 دەنساۋلىق ساقتاۋ مەكەمەسى, 26 سۋ جابدىقتاۋ نىسانى جانە 2 سپورت مەكەمەسى بار.