شىمكەنتتە ەكىنشى دۇنيە جۇزىلىك سوعىستا برەست قامالىن قورعاعان, قالا تۋماسى قاسىم جارمەنوۆتىڭ ەرلىك جولىنا ارنالعان «تسيتادەل» دەرەكتى ءفيلمى كورسەتىلدى. ءىس-شارا بارىسىندا برەست قامالىنىڭ ارحيۆتىك فوتوسۋرەتتەرى, جارمەنوۆتەر اۋلەتىنىڭ وتباسىلىق مۇراعاتىنان الىنعان سيرەك دەرەكتەر جانە سوعىسقا دەيىنگى شىمكەنتتىڭ فوتوكورمەسى ۇيىمداستىرىلدى. قالالىق ىشكى ساياسات باسقارماسى باسشىسىنىڭ مىندەتىن اتقارۋشى زاڭعاربەك ۇسىپاحمەتوۆ سالتاناتتى كورسەتىلىمدە قۇتتىقتاۋ ءسوز سويلەپ, جوبانىڭ تاريحي ءھام رۋحاني مانىنە ەرەكشە توقتالدى, دەپ جازادى Egemen.kz.
«تسيتادەل» – ءبىر عانا ادامنىڭ نەمەسە ءبىر اۋلەتتىڭ تاريحى ەمەس, بۇل – مىڭداعان قازاقستاندىق جاۋىنگەردىڭ تاعدىرى مەن ەرلىگىنىڭ كورىنىسى. مۇنداي تۋىندىلار وتكەن مەن بۇگىننىڭ اراسىن جالعاپ, جاس ۇرپاققا تاعىلىم بەرەدى», دەدى ول.
«تسيتادەل» دەرەكتى ءفيلمىن بۇعان دەيىن الماتى مەن ماسكەۋ قالاسىنىڭ كورەرمەندەرى تاماشالاعان. ماسكەۋدەگى كورسەتىلىمگە ەلىمىزدىڭ رەسەيدەگى توتەنشە جانە وكىلەتتى ەلشىسى داۋرەن اباەۆ قاتىسقان.
جالپى فيلمدە قاسىم جارمەنوۆتىڭ برەست قامالىنداعى جانقيارلىق ەرلىگىمەن قاتار, سوعىستان كەيىنگى بەيبىت ءومىرى, تۋعان جەرى شىمكەنتكە ورالىپ, دەنە شىنىقتىرۋ ءپانىنىڭ مۇعالىمى رەتىندە جاس ۇرپاقتى تاربيەلەۋگە قوسقان ۇلەسى كەڭىنەن باياندالادى. سونداي-اق كورەرمەن باتىردىڭ ۇرپاقتارى – دەنيس پەن تيمۋر جارمەنوۆتەردىڭ وتباسى تاريحىنا قىزىقتى ساپار شەگەدى.
شىمكەنت