الماتى وبلىسىندا حالىق سانى مەن جاستار ۇلەسى ەڭ جوعارى سانالاتىن قاراساي اۋدانىندا تاۋەلسىزدىك كۇنى قارساڭىندا جاستار رەسۋرستىق ورتالىعىنىڭ جاڭا ەكى قاباتتى عيماراتى پايدالانۋعا بەرىلدى.
زاماناۋي تالاپتارعا ساي سالىنعان ەكى قاباتتى جاستار سەرۆيستىك ورتالىعىنىڭ اشىلۋى – مەملەكەت باسشىسىنىڭ جاستارعا ارنالعان قازىرگى زامانعى ينفراقۇرىلىم قالىپتاستىرۋ جونىندەگى تاپسىرمالارىن ىسكە اسىرۋداعى ماڭىزدى قادام. قازىرگى تاڭدا الماتى وبلىسىندا 432 مىڭ جاس ءومىر سۇرەدى, ونىڭ 82 مىڭنان استامى قاراساي اۋدانىندا تۇرادى. جاڭا ورتالىق جاستار ءۇشىن شىعارماشىلىق, ءبىلىم الۋ جانە سپورت الاڭىنا اينالىپ, جۇمىسقا ورنالاسۋ, تۇرعىن ءۇي ماسەلەسى جانە كاسىپكەرلىكتى دامىتۋ باعىتىندا تەگىن كەڭەستەر ۇسىنادى, – دەدى الماتى وبلىسى اكىمىنىڭ ورىنباسارى عاني مايلىباەۆ.
اۋماعى مىڭ شارشى مەتردى قۇرايتىن عيمارات زاماناۋي ستاندارتتارعا تولىق سايكەس كەلەدى جانە بىرنەشە ماڭىزدى سەرۆيستى ءبىر كەڭىستىككە بىرىكتىرەدى. مۇندا مانساپ ورتالىعىنىڭ, وتباسى بانكىنىڭ جانە جاستار دەنساۋلىعى ورتالىعىنىڭ ماماندارى جۇمىس ىستەيدى. بۇل جاستارعا قاجەتتى قىزمەتتەردى ۇزاق كۇتۋسىز ءارى وڭاي الۋعا مۇمكىندىك بەرەدى.
ورتالىقتاعى باسىم باعىتتاردىڭ ءبىرى – الەۋمەتتىك شەبەرحانانىڭ جۇمىسى. مۇندا جاس قىز-كەلىنشەكتەر مەن انالار تىگىن جانە ءپىشۋ داعدىلارىن تەگىن مەڭگەرە الادى. بۇل ءوز كەزەگىندە ءوزىن-ءوزى جۇمىسپەن قامتۋعا, قوسىمشا تابىس تابۋعا جانە الەۋمەتتىك بەيىمدەلۋگە, اسىرەسە وسال ساناتتاعى جاستاردى قولداۋعا جول اشادى.
الداعى جىلى ورتالىقتا دىبىس جازۋ ستۋدياسى مەن پودكاست ايماعىن جابدىقتاۋ جوسپارلانىپ وتىر. بۇل كرەاتيۆتى يندۋستريانىڭ دامۋىنا سەرپىن بەرىپ, جاس تالانتتاردىڭ زاماناۋي مەديا قۇرالدارعا قولجەتىمدىلىگىن ارتتىرماق. سونىمەن قاتار ورتالىق بازاسىندا وقىتۋ باعدارلامالارى, مادەني ءىس-شارالار, پسيحولوگتەر, زاڭگەرلەر جانە مەملەكەتتىك باعدارلامالار جونىندەگى مامانداردىڭ كەڭەستەرى ۇيىمداستىرىلادى.
الماتى وبلىسىنىڭ جاستار ساياساتى باسقارماسىنىڭ باسشىسى ءمادي احمەتوۆتىڭ ايتۋىنشا, جاستار ينفراقۇرىلىمىن جاڭعىرتۋ جۇيەلى تۇردە جۇزەگە اسىرىلىپ كەلەدى.
«كەيىنگى ەكى جىلدا وبلىس اكىمدىگىنىڭ قولداۋىمەن جاستارعا ارنالعان كەڭىستىكتەردى دامىتۋ بويىنشا جوسپارلى جۇمىس جۇرگىزىلىپ جاتىر. بۇگىن جاستار رەسۋرستىق ورتالىعىنىڭ ءتورتىنشى جاڭا عيماراتى اشىلدى. قوناەۆ قالاسى مەن ىلە اۋدانىندا زاماناۋي كوۆوركينگ ورتالىقتارى جۇمىس ىستەپ تۇر. ال كەلەسى جىلى تالعار, جامبىل, ەڭبەكشىقازاق جانە ۇيعىر اۋداندارىندا وسىنداي ورتالىقتار اشىلادى. بۇل جاستار ينفراقۇرىلىمىن تولىق جاڭارتىپ, ولارمەن ءتيىمدى جۇمىس جۇيەسىن قالىپتاستىرۋعا مۇمكىندىك بەرەدى», دەدى ول.
جاستار ورتالىقتارى جەلىسىن كەڭەيتۋ ءوڭىردى دامىتۋ ستراتەگياسىنداعى نەگىزگى باعىتتاردىڭ بىرىنە اينالىپ وتىر. جاڭا كەڭىستىكتەر بەلسەندى ۇرپاقتى قالىپتاستىرۋعا, جاس كوشباسشىلاردى قولداۋعا, الەۋمەتتىك جانە شىعارماشىلىق جوبالاردى جۇزەگە اسىرۋعا ءارى جاستاردى وبلىستىڭ دامۋىنا كەڭىنەن تارتۋعا جول اشادى.
الماتى وبلىسى