اۆتوونەركاسىپ ءورىسى

تاۋەلسىزدىكتىڭ العاشقى جىل­دارى ەلىمىزدە اۆتوكولىك ونەركاسىبى ءالسىز دامىدى. دايىن ماشينا شىعا­راتىن زاۋىتتار بولمادى. اۆتو­كولىكتەر نەگىزىنەن شەتەلدەن اكەلىندى, ال وتاندىق ءوندىرىس سۇرا­نىستى قامتاماسىز ەتە المادى.

2000-جىلداردىڭ باسىنان باس­تاپ, قازاقستاندا اۆتوموبيل ونەر­كاسىبى جۇيەلى تۇردە دامي باس­تادى. 2003 جىلى ەلىمىزدە العاش­قى وتاندىق اۆتوموبيل قۇراس­تىرىلدى. وسى كەزەڭنەن باستاپ مەم­لەكەت سالانى جان-جاقتى دامىتۋ ءىس-شارالارىن قولعا الدى. 2010 جىلدان بەرى قاراي اۆتوموبيل ونەركاسىبى جان­داندى. بىرنەشە ءىرى زاۋىت ىسكە قوسىلىپ, جەڭىل جانە كوممەرتسيالىق كولىكتەر شىعارىلا باستادى. ناتيجەسىندە, ءوندىرىس كولەمى ەسەلەپ ارتتى, مىڭداعان جاڭا جۇمىس ورىندارى اشىلدى, وتاندىق اۆتوموبيلدەردىڭ ىشكى نارىقتاعى ۇلەسى ءوستى.

ماسەلەن, 2010 جىلعى مامىردا ىسكە قوسىلعان «الليۋر» زاۋىتى بۇگىندە ەلىمىزدەگى ەڭ ءىرى ءاۆتووندىرىس ورنىنا اينالدى. 3 500 ادام ەڭبەك ەتەتىن الپاۋىت كاسىپورىن 15 جىل­دىڭ ىشىندە 500 مىڭعا جۋىق اۆتوموبيل ءوندىردى. زاۋىت بۇگىنگى تاڭدا «JAC», «Chevrolet», «Kia», «Jetour», «Skoda», «Hongqi» اۆتوموبيلدەرىن جاساپ شىعارادى. كاسىپورىننىڭ جىل ساناپ ءوندىرىسى كەڭەيىپ, الەۋەتى ارتىپ كەلەدى. ماسە­لەن, «الليۋر» 2019 جىلى 26 مىڭعا جۋىق اۆتوكولىك قۇراستىرىپ شىعارسا, بۇل كورسەتكىش 2020 جىلى 40 مىڭنان استى. ال 2021 جىلى اۆتوزاۋىت 60 مىڭنان استام كولىك قۇراستىرىپ شىعارادى.

2024 جىلى زاۋىتتا بىرقاتار ءىرى جوبالار ىسكە اسىرىلدى. «Chevrolet» كولىكتەرىنىڭ قاتارىنا «وnix» قوسىلدى. اتالعان جوباعا 33,7 ميلليارد تەڭگە ينۆەستيتسيا سالىنىپ, قوسىمشا 400 جۇمىس ورنى پايدا بولدى. قوستاناي اۆتوزاۋىتىنىڭ ىشكى نارىقتاعى ۇلەسى بۇگىندە 60 پايىزدان اسىپ وتىر.

«الليۋردىڭ» سىرتىندا, قوس­تانايدا قازان ايىندا «Kia Qazaqstan» زاۋىتى ىسكە قوسىلدى. وتان­دىق اۆتوونەركاسىپتىڭ دامۋى­نا تىڭ سەرپىن قوسقان ايتۋلى كاسىپورىن­نىڭ اشىلۋ راسىمىنە مەملەكەت باسشىسى قاسىم-جومارت توقاەۆ تەلەكوپىر ارقىلى قاتىسىپ, وتكەن جىلى ماشينا جاساۋ سالاسىنا 290 ملرد تەڭگەدەن استام ينۆەستيتسيا تارتىلعانىن ايتتى. «ال بيىل جىل باسىنان بەرى وسى سالاعا 178 ملرد تەڭگە قاراجات سالىندى. اۋقىمدى ءىس-شارالاردىڭ ناتيجەسىندە بۇل باعىتتا بىرقاتار تابىسقا قول جەتكىزدىك. وتكەن جىلى ەلىمىزدە 145 مىڭنان استام كولىك شىعارىلدى», دەدى پرەزيدەنت.

«Kia Qazaqstan» زاۋىتىنا سا­لىنعان ينۆەستيتسيا كولەمى – 131,5 ملرد تەڭگە. كاسىپورىن جىلىنا 70 مىڭ كولىك وندىرەتىن بولادى. ونىم­دەرى ەل كولەمىندە, ودان تىس ورتالىق ازيا, ەاەو ەلدەرىنە ساتىلادى.

زاۋىتتىڭ باس ديرەكتورى كيم دە كيدىڭ ايتۋىنشا, كەلەشەكتە بىرتە-بىرتە جەرگىلىكتى ءونىمنىڭ ۇلەسى ارتا تۇسەدى. كورپوراتسيا قوستانايدىڭ ءتول ءوندىرىسىن دامىتۋ ماقساتىندا كورەيادان ارنايى اۆتوكومپونەنت وندىرۋشىلەردى الدىرتقان. مۇنىڭ سىرتىندا وندىرىسكە «Glovis» لوگيستيكالىق كومپانياسىن تارتىپ وتىر.

ء«بىزدىڭ كورپوراتسيا قوستانايدا ءوز تاريحىنىڭ جاڭا ءبىر بەلەسىن باستادى. تىڭ تەحنولوگيامەن جۇ­مىس ىستەيتىن مۇمكىندىكتەر مەن تاجىريبەگە يە 1500-دەن استام ادامنان تۇراتىن قۋاتتى كوماندا قۇرىپ جاتىرمىز. ءبىزدىڭ كورپوراتسيادا جۇمىسشىلاردى كورەياداعى «Kia» زاۋىتتارىنا تاعىلىمداماعا جىبەرۋ ارقىلى مامانداردى دامىتۋ جۇيەسى قالىپتاسقان. مۇنداعى جۇمىسشىلار تىكەلەي «كiا» ماماندارىنان تاجىريبە الىپ, جوعارى تەحنولوگيالىق ۇدەرىستەردى مەڭگەرەتىن بولادى. «Kia» شتاب-پاتەرى ءوز تاراپىنان تاجىريبە الماسۋ جانە قىزمەتكەرلەردىڭ بىلىك­تىلىگىن ارتتىرۋ ءۇشىن كوپتەگەن ينجەنەردى قوستانايداعى زاۋىتقا جىبەرىپ وتىرادى. الداعى ۋاقىتا قوستاناي وبلى­سىنىڭ اكىم­دىگى يندۋستريالىق ايماق­­تا اۆتوكو­مپونەنت ءوندىرىسىن دامىتاتىن لوكاليزاتسيالىق ورتالىق اشۋعا دايىندالىپ جاتىر. مۇنداي اۋقىمدى جوبادان «Kia» كورپوراتسياسى دا شەت قالمايدى. ءبىز كورەي ەلىنەن كوپتەگەن اۆتو­كومپونەنت وندىرۋشىلەردى شاقىرىپ, وسى جەردە ءوز ءوندىرىسىمىزدى اشامىز. بۇل جەردە شىققان ونىمدەر «Kia Qazaqstan» زاۋىتىنا جونەلتىلەتىن بولادى. ءبىز قاجەتتى وندىرىستىك دەڭگەيگە جەتۋ ماقساتىندا جانە قازاقستاندا اۆتوكومپونەنتتەر ءوندىرىسىن قولعا الىپ, لوكاليزاتسيانى دامىتۋ باعى­­­تىندا ەل زاڭناماسىنا سايكەس بارلىق اۆتووندىرۋشىلەرمەن ۇيلەسىمدى ارىپتەستىك قارىم-قاتىناس ورناتۋدى جوسپارلاپ وتىرمىز. ءوندىرىستى «Sorento» مودەلىنەن باستاماقپىز. ال كەلەسى جىلدىڭ قاڭتار ايىنان جاڭا «Sportage» مودەلىن شىعارا باستايمىز. 2026 جىلى تاعى ءبىر جاڭا اۆتوكولىك مودەلىن شىعارۋ جوسپاردا بار», دەيدى كيم دە كي.

ەركەبۇلان الدانىش – زاۋىت­تىڭ دانەكەرلەۋ تسەحىندا اعا دانەكەرلەۋشى. تسەحتا ءبىر اۋىسىمدا 125 ادام جۇمىس ىستەيدى.

«ەكى اۋىسىمدىق جۇمىس رەجى­مىن­دە جى­لىنا 50 مىڭ شاناق قۇراس­تىرا­مىز. ياعني ساعاتىنا شامامەن 16 شاناق جاساپ شىعارامىز. ال كا­سىپورىن تولىق وندىرىس­تىك قۋاتى­نا كوشكەن سوڭ, بۇل مەجە 70 مىڭعا دەيىن ارتادى. تسەحتاعى وندىرىستىك جەلى­لەردىڭ 58%-ى اۆتومات­تان­دى­رىل­عان. 41 دانەكەرلەۋ روبوتى جۇمىس ىستەپ تۇر. جالپى, نەگىزگى جەلىلەردىڭ 96 پايىزى اۆتوماتتى رەجىمدە جۇمىس ىستەيدى. روبوتتار شاناقتىڭ قاڭقاسى مەن نەگىزگى سۇيەكتەرىن دانەكەرلەيدى. ال قول جۇمىسىن قاجەت ەتەتىن جەلى­لەردە ءبىزدىڭ ماماندار شاناقتىڭ ورتالىق, ارتقى بولىگىن, الدىڭعى, ارتقى ەدەنىن, سول جاق جانە وڭ جاق دوڭعالاق بەلدەمەسى سياقتى قوسال­قى توراپتاردى دانەكەرلەيدى. دانە­كەرلەۋشىلەردىڭ جۇمىسىنان كەيىن شاناق بوياۋ تسەحىنا كىرەدى», دەيدى باس دانەكەرلەۋشى.

الداعى جىلدارى وڭىردە اۆتو­موبيل سالاسىن ودان ءارى دامىتۋ كوز­دەلىپ وتىر. ءوندىرىس كولەمىن ۇلع­اي­تۋ جانە جاڭا مودەلدەردى شىعا­رۋ, ەلەكترلى جانە ەكو­لوگيالىق تازا كولىكتەردى ءوندىرۋدى جولعا قويۋ, ءوندىرىستىڭ جەرگىلىكتى ۇلە­سىن ارت­تىرۋ, ەكسپورت گەوگرافياسىن كەڭەي­تۋ, يننوۆاتسيالىق جانە تسيفرلىق تەح­نو­لوگيالاردى ەنگىزۋ ءتارىزدى قات-قابات مىن­دەت­تەر تۇر. ماماندار اتالعان مىن­دەت­تەر­دى ىسكە اسىرۋ سالانىڭ ۇزاق­مەر­زىمدى ءارى تۇراقتى دامۋىن قامتاماسىز ەتەدى دەپ وتىر.

قوستاناي وبلىسى