وبلىستىق تاريحي-ولكەتانۋ مۇراجايىندا احمەت بايتۇرسىن ۇلىنىڭ پەداگوگيكا جانە عىلىم ماسەلەلەرى بويىنشا بىشكەكتە وتكەن سەزگە شاقىرىلعانىن راستايتىن قۇندى قۇجات ساقتاۋلى تۇر.
ۇلت ۇستازى سەزگە بارا الدى ما, بارا المادى ما, ول جاعى بەيمالىم. بىرنەشە عالىمنان سۇراپ كورىپ ەدىك, ول كىسىلەر دە بىلمەيتىن بولىپ شىقتى. انىعى سول, مۋزەيدە جاتقان شاقىرتۋ حات اقاڭنىڭ جيىرماسىنشى جىلداردان كەيىنگى كەزەڭدە جاڭاشا سيپاتتا كۇش الا تۇسكەن حالىق اعارتۋ ءىسى مەن پەداگوگيكا سالاسىندا ءبۇتىن تۇركى جۇرتىنا قادىرى اسقان دارا عالىم بولعانىن تاعى ءبىر ايقىنداي تۇسەدى.
سول كەزدەگى قارا-قىرعىز اۆتونومدىق وبلىستىڭ ورتالىعى پىشپەكتەن كەلگەن شاقىرتۋ حاتتىڭ جىلى كورسەتىلمەگەن. بىراق جيىننىڭ 25 مامىردا وتەتىنى جازىلعان. حات «قازاقستان. اقمەشىت. حالىق اعارتۋ كوميسسارى جولداس بايتۇرسىنوۆقا» دەپ باستالادى. اقاڭنىڭ 1920 جىلدىڭ قازان ايىنان باستاپ تۋرا ءبىر جىل قازاق اكسر-ءى حالىق اعارتۋ كوميسسارى قىزمەتىن اتقارعانىن ەسكەرسەك, شاقىرتۋ 1922 جىلدىڭ مامىرىندا كەلگەن بولۋ كەرەك.
«بۇل قۇجاتتىڭ كوشىرمەسىن وسىدان ءتورت جىل بۇرىن ءبىزدىڭ ماماندار ورتالىق مەملەكەتتىك ارحيۆتەن الىپ كەلدى. حات مازمۇنىنا ۇڭىلسەك, احمەت بايتۇرسىن ۇلى قازان, باكۋ ساپارىنا دەيىن وقۋ-اعارتۋ سالاسىنىڭ, ءتىل ءبىلىمىنىڭ بىلگىرى رەتىندە قىرعىز رەسپۋبليكاسىندا وتكەن ۇلكەن جيىنعا شاقىرىلعان. حاتتا سەزدى ۇيىمداستىرۋ بيۋروسى ۇلت ۇستازىنىڭ قازاقستانداعى اعارتۋ سالاسىنىڭ ماسەلەلەرىن جەتە بىلەتىندىگىن دارالاپ كورسەتىپ, اقاڭنىڭ بۇل سالاداعى ءبىلىم-تاجىريبەسى سەزد جۇمىسىنا كوپ سەپتىگىن تيگىزەر ەدى دەگەن ەمەۋرىن تانىتادى. احمەت بايتۇرسىن ۇلى ءومىرىنىڭ بەيمالىم بەتتەرى ءالى دە كوپ. سوندىقتان اتالعان قۇجات احمەتتانۋداعى جاڭا ءبىر ىزدەنىسكە ءىز سالىپ, كادەگە جاراپ قالۋى مۇمكىن», دەيدى مۋزەيدىڭ عىلىمي حاتشىسى ءنازيما وتاشەۆا.
قوستاناي وبلىسى