2010 جىلدىڭ ءدال وسى كۇنىندە بيتكويننىڭ قۇرىلتايشىسى ساتوشي ناكاموتو قوعامدىق ومىردەن عايىپ بولىپ, سوڭعى رەت «مەن باسقا ىستەرگە كوشىپ كەتتىم» دەپ حابارلاما قالدىردى, دەپ جازادى Egemen.kz.
ساتوشي ناكاموتو – كريپتوۆاليۋتا تاريحىنداعى ەڭ جۇمباق تۇلعا. ول ءوز ءومىرىن قوعامدىق نازاردان الىستاتىپ, قۇقىقتىق تاۋەكەلدەردەن ساقتانۋ جانە بيتكويننىڭ دەتسەنتراليزاتسياسىن قامتاماسىز ەتۋ ءۇشىن ءىزىن جاسىرعان دەگەن بولجام بار.
Tomshardware مالىمەتىنشە, ناكاموتو العاش رەت 2008 جىلدىڭ 1 قاراشاسىندا توعىز بەتتىك «Bitcoin: A Peer-to-Peer Electronic Cash System» ماقالاسىن جاريالاپ, «قوسارلانعان شىعىن» ماسەلەسىن شەشۋ جولىن ۇسىندى. بۇل جۇيە بلوكچەين تەحنولوگياسىن پايدالانا وتىرىپ, تسيفرلىق اكتيۆتەردىڭ ەكى رەت جۇمسالۋىنا جول بەرمەيتىن بولدى. وسىلايشا, ول ءوز ۇسىنىسىن قوعامعا تانىتىپ, بىرنەشە اي ىشىندە جەتىلدىرىپ, كەيىن 2010 جىلى تولىقتاي عايىپ بولدى.
ەڭ تاڭقالارلىعى, ساتوشيدىڭ العاشقى جىلدارى تاۋىپ العان 1,1 ميلليون BTC مونەتالارى قوزعالىسسىز قالىپ, بۇگىنگى باعاسى شامامەن 99 ميلليارد دوللارعا جەتكەن. كەيبىر ساراپشىلار ونىڭ ومىردەن وزعانىن نەمەسە مونەتالارىنا قول جەتكىزە الماي قالعانىن ايتادى. ال باسقالارى ساتوشي سانالى تۇردە قۇپيالىعىن ساقتاپ وتىر دەپ سانايدى.
بيتكويندە مەرزىمى وتەتىن مەحانيزم, جەلىدە قولدانىلماعانىنا ەشقانداي ايىپپۇل نەمەسە قايتا قايتارۋ مۇمكىندىگى جوق. ال قازىرگى كريپتوگرافيالىق الگوريتمدەر مەن كۆانتتىق تەحنولوگيالار دا SHA-256 الگوريتمىن بۇزا المايدى. سوندىقتان بۇل مونەتالار تەك ناكاموتوعا عانا قولجەتىمدى بولىپ قالا بەرەدى جانە كەلەسى 20-40 جىل ىشىندە ەشكىمنىڭ قولىنا تۇسپەۋى مۇمكىن.
دەگەنمەن, ەگەر ءبىر كۇنى نەگىزىن قالاۋشىنىڭ مونەتالارى قوزعالىسقا تۇسسە, بۇل بۇكىل كريپتوۆاليۋتا نارىعىندا دۇربەلەڭ تۋعىزۋى مۇمكىن. سونىمەن قاتار بۇل ارەكەت مونەتالاردىڭ اشىق كىلتىن كورسەتىپ, بولاشاقتا كۆانتتى كومپيۋتەرلەرگە قاتىستى قاۋىپسىزدىككە اسەر ەتۋى ىقتيمال.
بۇگىنگە دەيىن ساتوشي ناكاموتونىڭ كىم ەكەنى, كريپتوۆاليۋتانى ازىرلەگەن ادامنىڭ قازىر ءومىر ءسۇرۋى نەمەسە ونىڭ قارجىلارىنا قول جەتكىزۋى – الەمنىڭ ەڭ ۇلكەن كريپتوجۇمباقتارىنىڭ ءبىرى بولىپ وتىر.