رەسپۋبليكالىق مەملەكەتتىك اكادەميالىق كورەي تەاترىندا باۋىرجان مومىش ۇلىنىڭ تۋعانىنا 115 جىل تولۋىنا وراي «باۋىرجان مومىش ۇلى: دالانىڭ ۇلى. ءوڭ مەن ءتۇس…» اتتى مۋزىكالىق-درامالىق سپەكتاكل العاش رەت كورەرمەنگە جول تارتتى, دەپ حابارلايدى Egemen.kz مادەنيەت جانە اقپارات مينيسترلىگىنىڭ ءباسپاسوز قىزمەتىنە سىلتەمە جاساپ.
قويىلىم تەاتردىڭ بىرنەشە شىعارماشىلىق باعىتىن ءبىر ساحنادا توعىستىردى. دراما, بالەت جانە ۆوكالدىق ترۋپپالاردىڭ بىرلەسكەن جۇمىسى ارقىلى كورەرمەنگە باتىردىڭ تاعدىرى تەك اسكەري ەرلىك تۇرعىسىنان عانا ەمەس, ۇلتتىق رۋح, ىشكى ءتارتىپ پەن تۋعان جەرگە ادالدىق ۇعىمدارى ارقىلى اشىلادى. سپەكتاكلدە باۋىرجان مومىش ۇلىنىڭ رۋحاني بولمىسىنا, ءتىل مەن داستۇرگە, دالا مادەنيەتىنە بايلانىسىنا ەرەكشە نازار اۋدارىلعان.
ساحنالىق شەشىم ەكى كەزەڭدى قاتار بەينەلەۋگە قۇرىلعان. قازىرگى زامان كەيىپكەرلەرى نۋريك پەن اسەم باتىر ەسكەرتكىشى جانىندا جاڭا مەديا فورماتى ارقىلى وتكەنگە كوز جۇگىرتەدى. تسيفرلىق كەڭىستىك ءبىر ساتتە مايدان شىندىعىنا ۇلاسىپ, ۇلى وتان سوعىسى جىلدارىنداعى ەرلىكتىڭ ءمانىن جاڭاشا تۇسىنۋگە جەتەلەيدى.
سپەكتاكل سوڭىندا ۇرپاقتار ساباقتاستىعى يدەياسىن العا تارتادى. ەرلىك تۋرالى ەستەلىك وتكەنگە قۇرمەت قانا ەمەس, بولاشاق الدىنداعى جاۋاپكەرشىلىك رەتىندە كورسەتىلەدى. قويىلىم قازاق جانە ورىس تىلدەرىندە ساحنالانادى.