استانا. 22 ناۋرىز. ۋكراينا بۇقارالىق اقپارات قۇرالدارى ەلدىڭ بۇرىنعى پرەزيدەنتى ۆيكتور يانۋكوۆيچتىڭ ۇلى ۆيكتوردىڭ بايكال كولىنە سۋعا باتىپ كەتكەنىن جاريا ەتتى. بۇل تۋرالى ريا «نوۆوستي» حابارلادى.
ال رەسەيدىڭ توتەنشە جاعدايلار مينيسترلىگىنىڭ جەدەل شتابى توتەنشە جاعداي ناتيجەسىندە بايكال كولىندە ماسكەۋ قالاسىنىڭ تۋماسى ۆيكتور داۆىدوۆتىڭ قازا تاپقانىن باياندادى.
وبوزرەۆاتەل.com مالىمەتىنە قاراعاندا, كىشى ۆيكتور يانۋكوۆيچ بالىق اۋلاپ جۇرگەنىندە مۇزدىڭ استىنا ءتۇسىپ كەتكەن كولىكپەن بىرگە باتقان.
ءوز كەزەگىندە LB.ua باسىلىمى كىشى يانۋكوۆيچتى بايكالدىڭ ۇستىندە وتكەن سپورت شاراسىنا قاتىسقان ەتىپ شىعارۋدا.
توتەنشە جاعدايلار مينيسترلىگى يركۋتسك وبلىستىق باس باسقارماسى بايكالدا بولعان قايعىلى وقيعانى راسقا شىعاردى. بىراق قازا تاپقان كىم ەكەنىن اشىپ ايتىپ وتىرعان جوق. بۇدان ءبىر كۇن بۇرىن, كەشە كولدىڭ ولحون ارالى ماڭىنداعى اۋماعىندا شىنىندا مۇزدىڭ ويىلىپ كەتۋ فاكتىسى ورىن العان. توتەنشە جاعدايلار مينيسترلىگىنىڭ تۇجىرىمىنشا, وقىس وقيعا «قاۋىپسىزدىك تەحنيكاسىنىڭ ورەسكەل بۇزىلۋىنىڭ» سالدارىنان بولعان.
ايتۋلارىنا قاراعاندا, كولىكتىڭ ىشىندە التى ادام بولعان. ول سۋعا باتا باستاعاندا بەس جولاۋشى امان-ەسەن شىعىپ ۇلگەرگەن دە, جۇرگىزۋشى قازا تاپقان.
توتەنشە جاعدايلار جەدەل شتابى وكىلىنىڭ «نوۆوستي» اگەنتتىگىنە بەرگەن مالىمەتى بويىنشا, بايكال كولىندە ورىن العان وقيعانىڭ سالدارىنان قازا تاپقان ماسكەۋ قالاسىنىڭ 1981 جىلى تۋعان تۋماسى ۆيكتور الەكسەەۆيچ داۆىدوۆ كورىنەدى.
مۇرات ايتقوجا.
دەرەك, سۋرەت: ريا «نوۆوستي».