8 قاراشا كۇنى تۇركىستان وبلىسى جەتىساي اۋدانى العاباس اۋىلىنداعى ەكى قاباتتى جەكە تۇرعىن ۇيدەن ءورت شىعىپ, سول كۇنى 12 ادام قايتىس بولعان ەدى. ورتتەن امان قالعان 3 ادامنىڭ بىرەۋى 1 جەلتوقسان كۇنى اۋرۋحانادا قايتىس بولدى. ال قالعان ەكى ناۋقاستىڭ جاعدايى قالاي؟ تۇركىستان وبلىستىق دەنساۋلىق ساقتاۋ باسقارماسى ەم الۋشىلاردىڭ جاعدايى تۇراقتى ەكەنىن حابارلادى, دەپ جازادى Egemen.kz.
ەرلى-زايىپتى ەم الۋشىلار شىمكەنتتەگى گيپەرباريالىق وكسيگەناتسيا ورتالىعىنان شىعارىلىپ, جەتىسايعا جەتكىزىلگەن. ولار ەمىن جەتىساي اۋداندىق ورتالىق اۋرۋحاناسىندا جالعاستىرىپ جاتىر.
«ەكى ناۋقاس تا كۇيىك جاراقاتىنان كەيىنگى كەزەڭ ءۇشىن قاجەتتى ەمدى قابىلداپ جاتىر. اپپاراتسىز وزدەرى دەم الۋدا, ومىرلىك ماڭىزدى كورسەتكىشتەرى تۇراقتى. ەمدەۋ شارالارى بەكىتىلگەن حاتتاماعا سايكەس جالعاسىپ جاتىر. ناۋقاستاردىڭ جاعدايى دارىگەرلەردىڭ تۇراقتى باقىلاۋىندا», دەلىنگەن تۇركىستان وبلىستىق دەنساۋلىق ساقتاۋ باسقارماسى تاراتقان حابارلامادا.
بۇعان دەيىن ەم الىپ جاتقان 7 جاستاعى قىزدىڭ اۋرۋحانادا كوز جۇمعانىن حابارلاعانبىز.
ءورت تۇرعىن ءۇيدىڭ 360 شارشى مەترىن قامتىعان.
كەيىننەن قۇزىرلى ورگاندار وقيعا ورنىنان فوتو-ۆيدەولار جاريالادى.
پرەزيدەنت قاسىم-جومارت توقاەۆ ورتتەن قازا تاپقانداردىڭ وتباسىلارىنا كوڭىل ايتىپ, ۇكىمەت پەن وبلىس اكىمىنە بارلىق قاجەتتى كومەك كورسەتۋدى جانە قايعىلى وقيعانىڭ سەبەبىن انىقتاۋدى تاپسىردى.